Չի բացառվում՝ ընդդիմության միասնական թեկնածու դառնա Օնիկ Գասպարյանը. Գառնիկ Իսագուլյան
«Իրավիճակից ելնելով՝ «Հայրենիքի փրկության շարժումը» կաշկանդված չէ ԳՇ պետ Օնիկ Գասպարյանին առաջադրել ընդդիմության վարչապետի թեկնածու»,- մեզ հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը:
Նշենք՝ օրերս ԳՇ-ն հաղորդագրություն էր տարածել, որ պահանջում է Նիկոլ Փաշինյանի ու այս կառավարության հրաժարականը, որին հաջորդեց իշխանության կողմից ԳՇ պետին պաշտոնանկ անելու քայլերը:
«Ընդդիմությունը կարող է փոխել իր մարտավարությունն ու ռազմավարությունը՝ գնալով ավելի ճկուն քայլերի: Ստեղծվել է մի իրավիճակ, որ թե՛ վարչապետը, թե՛ նախագահը իրավունք չունեն ԳՇ պետ Օնիկ Գասպարյանին ազատելու աշխատանքից: Այս պահին ընդդիմությունը կարող է հայտարարել, որ իրենց վարչապետի միասնական թեկնածուն է դառնում Օնիկ Գասպարյանը, եթե իհարկե ինքը կհամաձայնի»:
Ըստ Գառնիկ Իսագուլյանի՝ ստեղծված իրավիճակը որևէ ձև չի կաշկանդում, որ ընդդիմությունը գնա այս քայլին. «Այդ դեպքում ստացվում է, որ կա բանակ, որն աջակցում է Օնիկ Գասպարյանին և կա ժողովուրդ, որը ևս աջակցում է ԳՇ պետին»:
Իսագուլյանը ևս մեկ անգամ շեշտեց, որ ԳՇ-ի հայտարարությունը չէր նշանակում, որ իրենք աջակցում են ընդդիմությանը, բայց ընդդիմությունը կարող է ու պետք է աջակցի ԳՇ պետ Օնիկ Գասպարյանին:
Հետևեք մեզ Viber-ում
