Երևան-Դոհա չվերթի իրականացումը կախված է ԱՄՆ-ից

Արաբական չորս պետություն՝ Սաուդյան Արաբիան, Արաբական Միացյալ Էմիրությունները, Բահրեյնը և Եգիպտոսը, հայտարարել են դիվանագիտական հարաբերությունները խզելու մասին։ Այս փաստը կարող է առաջիկայում լուրջ խնդիրներ ստեղծել նաև մեզ համար. գրել է «Ժամանակ»-ը: «Մասնավորապես՝ Qatar Airways-ը, 2016 թվականից սկսած, կանոնավոր չվերթներ է իրականացնում Երևանից Դոհա։ Երկրները, որոնք դադարեցրել են դիվանագիտական հարաբերությունները Կատարի հետ, դադարեցրել են նաև օդային և ցամաքային հաղորդակցությունը։ Հիմա Երևան-Դոհա չվերթը կշարունակի գործել, թե ոչ, կախված է ԱՄՆ-ից։ ԱՄՆ-ը կոչ է արել, որ դիվանագիտական հարաբերությունները դադարեցված երկրները լեզու գտնեն Դոհայի հետ։ Չի բացառվում, որ այս երկրները, որոնք ԱՄՆ դաշնակիցներն են, պահանջեն Վաշինգտոնից Կատարի դեմ կիրառել պատժամիջոցներ, որոնք առաջին հերթին կարող են առնչվել Qatar Airways-ին։ Այդ դեպքում Երևանը ստիպված կլինի դադարեցնել կանոնավոր չվերթները դեպի Կատարի մայրաքաղաք։ Qatar Airways-ը Միջին Արևելքի ամենամեծ ավիաընկերություններից մեկն է, ունի մեծ ցանց և թռիչքներ է իրականացնում ավելի քան 140 ուղղությամբ», - նշել է թերթը: