Մուկուչյանի ջանը սաղ

Թեեւ Նիկոլ Փաշինյանն ու իրքայլականները հայտարարեցին, որ արտահերթ խորհրդարանական ընտրությունների հանրային պահանջ չկա եւ ըստ այդմ ընտրություններ չեն անցկացվի, սակայն ակտիվորեն լծվել են Ընտրական օրենսգրքի բարեփոխման աշխատանքներին: Ըստ մամուլի` եկող շաբաթ կավարտվեն աշխատանքները, նախագիծը կուղարկվի Վենետիկի հանձնաժողով, միջին հաշվարկով մինչեւ մայիս կընդունվի նախագիծը եւ Վենետիկի պահանջին համաձայն ընդունվելուց վեց ամիս հետո հնարավոր է ընտրություն իրականացնել: Դատելով փոփոխությունների բովանդակությունից, Նիկոլ Փաշինյանը շատ հանգամանալից պատրաստվում է ընտրություններին, պարզապես ցանկանում է ԸՕ-ն ձեւել իշխանության, ավելի ճիշտ Քաղաքացիական պայմանագրի վրայով, նոր գնալ ընտրությունների: Այսպիսով այն պնդումները, թե ռեյտինգային ընտրակարգը նոր ԸՕ-ով չի գործի, սին են, մտացածին: Ինչպես իմքայլական Հհամազասպ Դանիելյանը հայտարարեց, իշխանությունը չի մերժել համամասնական ընտրակարգի բաց ցուցակների տարբերակը: Սա ռեյտինգայինի քողարկված մոդելն է, մի տարբերությամբ, որ այն ցուցակում ընդգրկված բոլոր թեկնածուների համար հանրապետության ողջ տարածքում է վարկանշային քվեարկություն լինելու: Այսինքն, կապ չունի ցուցակում տեղերի հաջորդականությունը, խորհրդարան կանցնեն նրանք, որոնց անվան դիմաց քաղաքացիները քվեաթերթիկում հատուկ կնշեն եւ ըստ այդմ էլ ով շատ ձայն հավաքեց, նա էլ կանցնի խորհրդարան: Նիկոլ Փաշինյանն ու իր թիմը, որ այդքան քննադատում էին նախկիններին՝ ասելով, որ ռեյտինգային ընտրակարգը Սերժ Սարգսյանը ստեղծել է իր իշխանությունը պահելու, վերարտադրելու համար, հիմա ըստ էության գնում են նուն ճանապարհով: Այս մոդելը հնարավորություն կտա փաշինյանին վերահսկել իր օլիգարխներին, քրեական տարրերին, բոլոր-բոլորին: Քանի որ քվեարկության արդյունքում երեւալու է, ով ինչքան է աշխատել ու ինչ արդյունքներ է գրանցել: Հաջորդ կարեւոր փոփոխություններից մեկը կուսակցությունների համար անցողիկ շեմը մեկ տոկոսով իջեցնելն է, իսկ դաշինքների դեպքում բարձրացնելը: Կարելի է ենթադրել, որ Նիկոլ Փաշինյանը մտադիր է ընտրություններին խաղարկել մանր-մունր գրպանային կուսակցություններին, ոմանց անցկացնել խորհրդարան, դրա համար իջեցրել է անցողիկ շեմը, որ կեղծիքի դեպքում ստիպված չլինեն մեծ ռիսկերի գնալ, փոխարենը չի խրախուսում դաշինքների ձեւավորումը՝ կռահելով, որ հնարավոր է իր դեմ ընդդիմադիր մեծ բլոկ ձեւավորվի: Իսկ այդ բլոկի ամբիցիոզ ուժեր տեսնելով, որ միայնակ մասնակցության դեպքում շեմն իջել է, կգնան միայնակ, ինչու ոչ գործակցելով իշխանության հետ: Մյուս կարեւոր փոփոխությունը ըստ մամուլի այն է, որ խորհրդարանում կոալիցիա կարող են կազմել ոչ թե երեք , այլ ավել ուժեր: Նիկոլ Փաշինյանը հասկանում է,որ ինքը 50+1 չի կարողանալու ձգել եւ մանր-մունր ուժերի հետ կոալիցիայով է հնարավոր հասնել մեծամասնության: Դեռեւս չի հրապարակվել ԸՕ նախագիծը, չի բացառվում, որայլ անակնկալներ եւս լինեն: Չնայած ինչ էլ լինի, Մուկուչյանի ջանը սաղ, առանց ԸՕ-ի էլ Նիկոլն ինչքան ուզի, այնքան կխփի:

Անի Սահակյան