Ինչու է իրականում Գեւորգ Պետրոսյանը հեռանում
Գևորգ Պետրոսյանը հայտնում է «Բարգավաճ Հայաստան» խմբակցությունից դուրս գալու մասին: Ֆեյսբուքյան իր էջում Պետրոսյանը գրել է՝ որոշումը դժվարությամբ է կայացրել։ «Միաժամանակ, հաշվի առնելով այն, որ առաջնային մանդատ կրող պաշտոնյայի թիվ մեկ առաքելությունը ցանկացած իրավիճակում երկրի ու ժողովրդի համար գերկարևոր խնդիրներին առավելագույնս արագ և համարժեք արձագանքելու պարտականությունն է, այլ ոչ թե անձնական զգուշավորության մասին հոգածությունը, ինձ համար անընդունելի է հստակ քայլեր կատարելու հարցերում հապաղումը, ինչը պայմանավորված է խմբակցությանն անդամակցության հանգամանքով», - գրել է Պետրոսյանը՝ շարունակելով․ - «Երկրում արդեն տևական ժամանակ սկիզբ առած ակնհայտ անօրինական հետապնդումներին ու ապօրինություններին ճիշտ ժամանակին հստակ քաղաքական գնահատականներ տալու վճռականության պակասն ինձ համար անընդունելի մոտեցում է, իսկ երբ ես լրացրել եմ այդ պակասը և իրերն անվանել եմ իրենց անուններով, հարուցել եմ առանձին գործընկերների անբացատրելի անհանգստությունը: Վերը նշվածով պայմանավորված՝ այլևս նպատակահարմար չեմ գտնում «Բարգավաճ Հայաստան» խմբակցության կազմում իմ գործունեությունը»:
Պետրոսյանը նշել է, որ կշարունակի Ազգային ժողովում իր աշխատանքը՝ որպես անկախ պատգամավոր։
Ինչպես հայտնի է Գեւորգ Պետրոսյանը ԲՀԿ-ի ամենաարմատական պատգամավորներից մեկն է, ով հատկապես վերջին ժամանակներս Նիկոլ Փաշինյանին եւ իր իշխանությանն անխնա է քննադատում: Եւ ըստ իր հայտարարության՝ պատգամավորին չի բավարարում կուսակցության <<հապաղումները>>, ուստի ինքն իրեն ազատում է կուսակցական կապանքներից:
ԲՀԿ-ն Հայրենիքի փրկության շարժման առանցքային դերակատարներից է, որը կապիտուլացիայի ստորագրումից հետո պահանջում է Նիկոլ Փաշինյանի հրաժարականը: Գագիկ Ծառուկյանը դեռեւս պատերազմից առաջ էր իշխանության դեմ պայքար սկսել՝ հայտարարելով կառավարության 100 տոկոս հրաժարականի մասին: Սակայն մի բան է ասելը, մեկ այլ բան այդ ուղղությամբ քայլեր անելը: Հատկապես նոյեմբերի 9-ից հետո, երբ իշխանության դեմ պայքարը քաղաքական դաշտից տեղափոխվել է հայրենիքի փրկության տիրույթ եւ այժմ քաղաքական սակարկությունների, հաշվարկների ու վախերի ժամանակը չէ: Մինչդեռ տեղեկություններ կան, որ Գագիկ Ծառուկյանը սեպարատ բանակցությունների մեջ է Նիկոլ Փաշինյանի հետ, մամուլում գրվեց, որ նա հնարավոր է կոալիցիա կազմի: Իհարկե, ստվերային պայմանավորվածությունների, հնարավոր համագործակցության մասին բոլոր լուրերը Գագիկ Ծառուկյանը հերքեց իր վերջին հարցազրույցում, սակայն փաստն այն է, որ ԲՀԿ-ն ակտիվ չի պայքարում իշխանության դեմ: Գեւորգ Պետրոսյանի տարածած հայտարարությունը հենց այդ մասին է: Այսինքն, ի հեճուկս Գագիկ Ծառուկյանի հերքումների, իր սեփական թիմում եւս գոհ չեն կուսակցության քայլերից, եւ գտնում են, որ կարող են ավելին անել, բայց չեն անում: Իսկ ովքեր էլ անում են, որոշ պատգամավորների անհանգստությունն են հարուցում: Մյուս կողմից՝ մամուլում գրվեց, որ առաջիկա ընտրություններին Գագիկ Ծառուկյանը ցանկանում է նոր ցուցակով մասնակցել, որտեղ տեղ չեն գտնի Գեւորգ Պետրոսյանը, Նաիրա Զզոհրաբյանը, Միքայել Մելքումյանը, հին գվարդիայի այլ ներկայացուցիչներ:
Եւ չի բացառվում քաղաքական վերադասավորումներին ընդառաջ Գեւորգ Պետրոսյանը փորձում է ինքն էլ դիրքավորվել, հասկանալ, թե որ դաշտում ինքն ունի անելիք:
Անի Սահակյան
Հետևեք մեզ Viber-ում
