Պուտինը դեռ հանդուրժում է Էրդողանի սանձարձակությունները նախկին ԽՍՀՄ տարածքում

Թուրքիայի նախագահականի մամուլի խոսնակ Իբրահիմ Քալընը նախօրեին հեռախոսազրույց է ունեցել ԱՄՆ նորընտիր նախագահի ազգային անվտանգության հարցերով խորհրդական Ջեք Սալավանի հետ:

Քալընի և Սալավանի հեռախոսազրույցը Ջո Բայդենի նախագահ ընտրվելուց հետո Թուրքիայի և ԱՄՆ-ի միջև բարձր մակարդակի առաջին շփումն է: Կողմերը քննարկել են Թուրքիա-ԱՄՆ երկկողմ հարաբերությունները, ինչպես նաև մտքեր փոխանակել Սիրիայի, Լիբիայի, Արևելյան Միջերկրականի, Կիպրոսի, Աֆղանստանի և Լեռնային Ղարաբաղի հարցերի շուրջ:

Նրանք ակնկալում են, որ երկու դաշնակից երկրները այս նոր փուլում ամուր, կայուն և կառուցողական հարաբերությունների մոդել կհաստատեն: Հեռախոսազրույցի ընթացքում համաձայնություն է ձեռք բերվել այնպիսի քայլեր ձեռնարկել, որոնք կնպաստեն ՆԱՏՕ-ի ամրապնդմանը, ինչպես նաև տարածաշրջանային և գլոբալ խաղաղության ու կայունության հաստատմանը:

Էրդողանը Պուտինի հետ Լեռնային Ղարաբաղի շուրջ համաձայնությունների եկավ, հիմա անցավ ԱՄՆ-ի հետ քննարկումներին:

Ադրբեջանն էլ շարունակում է Թուրքիայից զենք գնելու պայմանագրեր կնքել: Սելջուկ Բայրաքթարը, որը Էրդողանի փեսան է և հայտնի՝ Բայրաքթարների ընկերության ղեկավարը, հայտարարել է Ադրբեջանի հետ նոր պայմանագրեր կնքելու մտադրության մասին: «Որպես Թուրքիայի տեխնոլոգիական հիմնադրամ՝ մենք ցանկանում ենք համագործակցել Ադրբեջանի հետ՝ Տեխնոլոգիական փառատոնի շրջանակներում»:
Ադրբեջանական լրատվամիջոցների փոխանցմամբ՝ այս մասին հայտարարել է գործնական-մարտավարական միջին բարձրության անօդաչու թռչող սարք Bayraktar TB2-ի ստեղծող, Թուրքիայի նախագահ Ռեջեփ Թայիփ Էրդողանի փեսա Սելջուկ Բայրաքթարը: «Մոտ ժամանակներս մենք կապեր կունենանք Ադրբեջանի հետ այդ հարցի շուրջ», - ընդգծել է Ս. Բայրաքթարը:

Թուրքիայի ամրապնդումն Ադրբեջանում, արդեն ակնհայտ է, այն ոչ թե տնտեսական, այլ նաև ռազմաքաղաքական: Բայց Թուրքիան չի սահմանափակվում միայն Ադրբեջանով:
Նախկին խորհրդային միության պետություններն են նրա սլաքների ներքո:

Թուրքիայի ազգային պաշտպանության փոխնախարարը հանդիպել է Ղազախստանի արդյունաբերության և ենթակառուցվածքների զարգացման նախարար Բեյբութ Աթամկուլովի հետ և քննարկել նրա հետ ռազմատեխնիկական համագործակցությունը:

Այս մասին հայտնում է Ղազախստանի նախարարության մամուլի ծառայությունը:
«Հանդիպման շրջանակներում բանակցություններ են վարվել ռազմատեխնիկական համագործակցության ոլորտում առկա իրավիճակի և համագործակցության հեռանկարների շուրջ: Նախարար Բ. Աթամկուլովը նշել է «Kazakhstan Aselsan Engineering» ղազախ-թուրքական համատեղ ձեռնարկության արտադրական հաջողություններն օպտիկայի և ռադիոէլեկտրոնիկայի ոլորտում», - ասվում է հայտարարության մեջ: Բանակցություններից հետո կողմերն ընդգծել են Ղազախստանի և Թուրքիայի միջև ռազմատեխնիկական ոլորտում հարաբերությունների զարգացման կարևորությունը:

Ինչպես է Պուտինը հանդուրժում Էրդողանի սանձարձակ քաղաքականությունը նախկին խորհրդային միության հանրապետություններում, դա այլ թեմա է:
Ինչ-որ պահից սկսած, Ռուսաստանն, իհարկե, կարող է ընդդեմ քայլերի գնալ, բայց առայժմ Կրեմլում իշխում է Թուրքիայի և Ադրբեջանի հետ փոխհարաբերություններում առևտրատնտեսական շահը:

Մետաքսյա Շալունց