Գերիների հարցն ու մեղավորների փնտրտուքը

Իշխանությունն ու գրպանային ընդդիմությունը պատերազմի պարտության եւ հետպատերազմական չլուծված խնդիրների համար ամեն օր նոր մեղավոր ու պատասխանատու են գտնում: Մի օր ընդդիմությունն է մեղավոր, երկրորդ օրը՝ նախկինները, ապա՝ լրագրողները, նրանք ում ասես, ինչ մանիպուլացիայով ասես մեղադրում են՝ փորձելով արդարացնել Նիկոլ Փաշինյանի հայտնի դարձած <ես եմ գլխավոր պատասխանատուն, բայց ոչ մեղավորը> թեզը:
Այսօր դատավորների դերում ԵԽԽՎ հայաստանյան պատվիրակությունն էր, ավելի կոնկրետ՝ Փաշինյանի ուսապարկերն ու նրանց դուստր  ձեռնարկություն՝ ԼՀԿ-ի առաջնորդ, բոլոր ժամանակներ իշխանության ծառա Էդմոն Մարուքյանը:

Ինչպես հայտնի է անցած շաբաթ ԵԽԽՎ նստաշրջանի ընթացքում մեր պատվիրակությունը չկարողացավ հայ ռազմագերիների հարցը մտցնել ընթացիկ քննարկման, ինչի պատճառով պատվիրակությունն արժանացավ քննադատությունների, հատկապես պատվիրակության ղեկավար Ռուբեն Ռուբինյանի աշխատանքի մասին տարբեր գնահատականներ հնչեցրեցին: ԼՀԿ-ական պատգամավոր Կարեն Սիմոնյանն
ասել էր` Ռուբեն Ռուբինյանը վաղուց է տապալել ԵԽԽՎ-ում աշխատանքները եւ պարզապես տեխնիկական աշխատանք է կատարում իրականում, որեւէ շոշափելի արդյունք իր աշխատանքից չի լինում: Ասուլիսոմ ի պատասխան այս հարցի Ռուբեն Ռուբինյանը պատասխանեց. «Ես դրան չեմ արձագանքի, դրան կարձագանքի պարոն Մարուքյանը»: Վերջինս այնպես պաշտպանեց ոչ միայն Ռուբինյանին, այլեւ ողջ պատվիրակությանը, որ կարելի էր մտածել, թե հաջորդ քայլով կզրկի իր խմբակցության պատգամավորին մանդատից՝ հրեշտակ իմքայլականներին վարկաբեկելու համար.
.«Յուրաքանչյուր պատգամավոր իր կարծիքն ունի: Պատվիրակության որեւէ անդամի կատարած աշխատանքը որեւէ մեկը չի կարող թերագնահատել կամ նվաստացնել: Մեր ցանկացած պատվիրակություն թիմ է, որը պիտի միասնական գործի՝ առանց անձնական խնդիրների նայելու: Այս առումով մենք երբեք մեզ այն ժամանակի ընդդիմության պես չենք պահում: Այն ժամանակ եղել են դեպքեր, որ ընդդիմությունն այլ տոմսերով, այլ ինքնաթիռով է մեկնել, որպեսզի իրար չտեսնեն: Մենք այդ գծի մեջ չենք, կարծում եմ, որ թիմային աշխատանք է կատարվում: Ես կարծում եմ պատվիրակության որեւէ անդամի դերը չի կարելի թերագնահատել», ասաց Մարուքյանը: Ռուբինյանի աչքերը փայլեցին ոգեւորությունից
«Ես էլ հավելեմ, որ համաձայն եմ պարոն Մարուքյանի հետ»,- ասաց նա: Ուղիղ հարցին`գերիների հարցը օրակարգ չմտցնելու համար արդյո՞ք կար պատվիրակության թերացումը, Դուք տեսնու՞մ եք այստեղ պարոն Ռուբինյանի թերացումը, Էդմոն Մարուքյանը պատասխանեց. «Եթե նախաձեռնությունը չարվեր, ես անպայման կքննադատեի պատվիրակության ղեկավարին եւ կասեի, որ նման առաջարկ եմ արել եւ չի ընդունվել: Երբ մենք գնալուց առաջ քննարկել ենք, թե ինչ անենք, ես առաջարկել եմ, որ պիտի անպայման պահանջենք դեբատ: Բոլորով որոշել ենք, որ դա պետք է անել>>,-ասաց Մարուքյանը լեզու դնելով իշխանական Հովհաննես Իգիթյանի բերանում:

Իգիթյանը գերիների հարցն օրակարգ չմտնելու հարցում մեղադրեց լրագրողներին
Նրա խոսքով` ՀՀ–ից Եվրոպա հասնող տեղեկատվական հոսքերն ավելի շատ քաղաքական իրավիճակի մասին են, քան գերիների հարցի հրատապության։

«Այն ալիքը, որը գալիս է Հայաստանից, ես կասեի` նույնիսկ ալիք չէ, այլ ապատեղեկատվական ցունամին, լրիվ այլ տեղեկություններ է հասցնում այնտեղ։ Եվ պատկերացրեք, որ գերիների հարցն այդ աղմուկի մեջ կորչում էր, և մարդիկ մեզ ուրիշ հարցեր էին տալիս, հարցնում էին քաղաքական իրավիճակից, նոր ընտրություններից և այլն»,– ասաց Իգիթյանը։

Համաձայնեք, որ սա էժանագին մանիպուլացիա էլ չէ, սա նիկոլփաշինյանական կրուտիտ է, որով վարակվել են իր ողջ թիմով: Մեկ ամիս առաջ էլ իրենց վարչապետն էր ասում, թե ընդդիմությունն ու իրենց հավաքները վնասում են գերիների վերադարձի գործընթացին, ընդդիմությունը մոտ քսան օրը ձեռնահ մնաց նման ակցիաներից, սակայն Փաշինյանը մոսկովյան հանդիպումից ձեռնունայն վերադարձավ՝ օդում կախված թողնելով գերիների հարցը: Այնպես որ ուզում եք կատարվածի մեղքը սեփական ընտանիքի անդամների վրա բարդել, միեւնույն է, դրանից իրավիճակը չի փոխվելու:

Ինչ վերաբերում է Էդմոն Մարուքյանին, ապա առնվազն տարակուսելի է՝ ինչու է նա պահանջում Փաշինյանի ու իշխանության հրաժարականը, եթե նրանք այդքան լավ են աշխատում: 

Անի Սահակյան