Ում համար է արվում «Պատրոն Դավո» շոուն

Պաշտպանության նախկին նախարար Դավիթ Տոնոյանի նախկին խորհրդական, զենքի բիզնեսով զբաղվող Դավիթ Գալստյանին, որը հանրությանը հայտնի է «Պատրոն Դավո» մականունով, ԱԱԾ-ն կասկածում է առանձնապես խոշոր չափերով գումարներ հափշտակելու մեջ: ԱԱԾ-ն Դավիթ Գալստյանին բերման է ենթարկել, ներգրավել որպես մեղադրյալ և կալանքի միջնորդություն ներկայացրել դատարան։ Որոշ լրատվամիջոցներ երեկ օրվա սկզբում տեղեկացրեցին՝ իբր Պատրոն Դավոն ձերբակալվել է:

ԱԱԾ-ից հայտնում են, որ Դավիթ Գալստյանն արտերկրում գրանցված և իրեն պատկանող ընկերության տնօրեն Ա.Բ.-ի հետ ՀՀ ԶՈՒ ԳՇ կարիքների համար պետք է մատակարարեր 1983-1986թթ. արտադրության հրանոթի համապատասխան տրամաչափի կրակոցներ, սակայն, նախատեսված զինատեսակի փոխարեն, խաբեության եղանակով ՊՆ-ին մատակարարվել են 1977 թվականի չեխական արտադրության մեկ այլ տեսակի հրանոթի կրակոցներ, որոնք իրենց մարտավարական և տեխնիկական հատկանիշներով էապես զիջել են ՊՆ-ի կողմից պատվիրված զինատեսակներին: Գործարքի ընդհանուր արժեքը կազմել է 1 մլն 83 հազար դոլար:

Երեկոյան հայտնի դարձավ, որ սույն անձը չի ձերբակալվել, ընդամենը մի քանի ժամով բերման է ենթարկվել ԱԱԾ:
Դեռեւս ամիսներ առաջ մամուլում լուրեր սպրդվեցին Պատրոն Դավո-Դավիթ Տոնոյան հանցավոր զույգի զենքի ապօրինի գործարքների մասին, սակայն այդ լուրերը որեւէ ընթացք չունեցան, ինչն եկավ ապացուցելու, որ կոռուպցիոն այս սխեման չէր կարող գործել, եթե չլիներ Նիկոլ Փաշինյանի բարձր հովանավորչությունը: Այս օրերին կատարվողն էլ ընդամենը էժանագին շոու է, որով իբր ուզում են ցույց տալ, որ պատրաստ են պատժել մեղավորներին:

Մինչ հայրենիքի փրկության համար պայքարողներին ընդամենը իշխանությանն ուղղված կոչերի համար ձերբակալում են, միլիարդավոր դոլարների և կապերի տիրապետող սույն անձը, ով ՀՀ-ում զբաղեցրած բարձր պաշտոնական դիրքի շնորհիվ կարողացել է զենքի պետգնումներում ներգրավվել և այդ լծակներով մտնել զենքի միջազգային առևտրի շուկա, ընդհուպ Թուրքիայի հետ գործարքներ անել, այսօր՝ իր կալանավորման սանկցիան քննարկելուց օր առաջ, ազատորեն շրջում է քաղաքում:

Սկանդալային գործարքներով հայտնի դարձած Պատրոն Դավոն, հիշեցնենք, ըստ հրապարակումների, Հայաստանին զենքը մատակարարում է իր երկու օֆշորային ընկերությունների միջոցով, որոնք գրանցված են Վիրջինյան և Կայմանյան կղզիներում:
Պատրոն Դավիթը, ինչպես նշեցինք, չի խորշել առևտուր անել Թուրքիայի և Ղազախստանի հետ։ Փաստաթղթերից մեկում երևում է, որ վերջնական շահառուն Թուրքիայի Պաշտպանության նախարարությունն է, որին զենք է վաճառել Դավիթ Գալստյանին պատկանող «Մոսթոն էնջիներինգը»։ Ղազախական 10 մլն 500 հազար փամփուշտները, որոնք Դավիթ Գալստյանը վաճառել է թուրքերին, հայոց բանակի առնվազն 10 տարվա պաշարն է կազմում։

ՀՀ-ին և Թուրքիային զենք վաճառողը նույն անձն է, ինչը չէր մտահոգում ոչ Նիկոլ Փաշինյանին, որ Դավիթ Տոնոյանին, ոչ էլ ԱԱԾ-ին։
ՊՆ-ն թավշյա հեղափոխությունից մի քանի ամիս հետո անտոկոս 3,5 մլն դոլարանոց վարկ է տրամադրել Գալստյանին պատկանող օֆշորային ընկերությանը, որը մինչ այժմ չի վերադարձվել պետությանը։ Պատրոն Դավոյին հիշել են միայն հիմա, երբ Նիկոլ Փաշինյանը իր իշխանությունը պահելու համար շոուների, եւ այն էլ հուժկու շոուների կարիք է զգում: Հակառակ դեպքում՝ Դավիթ Գալստյանից առաջ, կամ նրա հետ միասին կձերբակալվեին թե Դավիթ Տոնոյանը, թե Նիկոլ Փաշինյանը:

Անի Սահակյան