Մանկապարտեզ ընդունվելն ավելի բարդ է, քան ԵՊՀ.Սերոբ Խաչատրյան

Կրթության փորձագետ Սերոբ Խաչատրյանը լրագրողների հետ հանդիպմանը կարծիք հայտնեց, որ օպտիմալացումը պետք է մտածված արվի: «Գյուղեր կան, որտեղ ուղղակի չես կարող փակել դպրոցները: Շիրակի մարզում ձմռանը ճանապարհները փակ են, կան գյուղեր լեռնային, որտեղ ճանապարհները վատ են: Եթե այդտեղ անգամ 3 աշակերտ կա, պետք է այդ դպրոցը պահել, նույնը սահմանամերձ գյուղերում:Միեւնույն ժամանակ, գյուղեր կան, որոնք վերջանում են ու անմիջապես մյուս գյուղն է սկսում, եւ եթե ճանապարհի խնդիր չկա, կարող են եւ այդ տեսակ գյուղերն էլ միավորվեն»,- ասաց  կրթության փորձագետը: Սերոբ Խաչատրյանի կարծիքով՝ օպտիմալացումը չպետք է դիտվի որպես բիզնես մտածողության արդյունք՝ փող խնայելու համար։ Կրթության փորձագետը հիշեց Սերժ Սարգսյանի հայտարարությունը, ըստ որի՝ 2040 թվականին պետք է Հայաստանի բնակիչների թիվը հասնի չորս միլիոնի ու հավելեց՝ եթե այդպիսի ռազմավարություն կա, ապա ինչու են դպրոցները փակում. «Օրինակ մանկապարտեզները նախկինում փակեցին, իսկ երբ դրանք դարձան անվճար, բոլորը սկսեցին երեխաներին տանել այնտեղ, հիմա էլ տեղ չկա, պայմաններ չկան, երեխային մանկապարտեզ ընդունելն ավելի դժվար է դարձել, քանի Երևանի պետական համալսարան»։ Սերոբ Խաչատրյանը նշում է, որ աշխարհում ընդունված է աղքատ ընտանիքների երեխաների կրթության համար լրացուցիչ վճարելը, մինչդեռ մեզանում հարուստ եւ ծայրահեղ աղքատ երեխաների կրթությունը նույն չափով է ֆինանսավորվում: Դառնալով ուսուցիչների կրճատմանը, նա առաջարկում է մանկավարժներին կրճատելուց առաջ գիտելիքների ստուգում իրականացնել, եւ բարձր արդյունք ցուցաբերած ուսուցչին արագ աշխատանքի տեղավորել, որովհետեւ, նրա համոզմամբ, մեր երկրում լավ ուսուցիչների թիվը գնալով նվազում է: Սերոբ Խաչատրյանը նաեւ նշում է, որ այսօր փոխվել է ուսուցչի առաքելությունը, մինչդեռ ավանդական դպրոցում նա գիտելիքի փոստատար էր: