Շատ բարձր աշխատավարձը դեռևս չի նշանակում կոռուպցիայի բացառում. Գևորգ Կոստանյան

«Դատավորի բարձր աշխատավարձը դեռևս չի նշանակում կոռուպցիայի բացառում: Դատավորների կողմից կոռուպցիոն դրսևորումներն ավելի խորը արմատներ ունեն: Մենք ունենք իրավիճակ, որը միայն Հայաստանին չէ բնորոշ: Եթե ունենաս դատավորի շատ բարձր աշխատավարձ, դա ինքնին դեռևս չի նշանակում կոռուպցիայի բացառում: Դա կարող է նվազեցնել կոռուպցիոն վարքագծի ռիսկը, բայց բացառել անհնար է: Հետևաբար, դատավորների կոռուպցիոն վարքագծի կանխման տեսակետից միայն սոցիալական ապահովության երաշխիքների բարձր լինելը դեռևս կոռուպցիայի բացառման երաշխիք չէ», - լրագրողների հետ զրույցում ասաց ԱԺ ՀՀԿ խմբակցության պատգամավոր Գևորգ Կոստանյանը: « ԱԺ-ում քննարկված օրենսդրական նախաձեռնության նպատակն այն էր, որպեսզի թոշակի գնալուց հետո դատավորն ավելի շատ գումար չստանա, քան գործող դատախազը:Այս օրենքի ընդունումը ուղղակի անհրաժեշտություն էր, որովհետև բազմաթիվ լրջագույն կադրեր և՛ դատախազությունում, և՛ քննչական կոմիտեում ուղղակի ֆորմալ տեսակետից սոցիալական ապահովության անկայունության պատճառով պատրաստ էին համակարգը լքել, իսկ նման կադրերի կորուստը վնաս է հասցնում պետությանը», - ընդգծեց նա: «Ես երբեք չեմ վիճարկում «ձուկը գլխից է հոտում» ասացվածքը, բայց ես ասացվածքին չանդրադառնամ: Ես կարող եմ իմ պաշտոնավարման ժամանակի առումով ասել: Իմ պաշտոնավարման ժամկետում, եթե կա մեկը և կլինի որևէ մեկը, որ կասի՝ այսինչ դատախազը կաշառք է վերցրել, առավել ևս վերևներին է տվել, եթե անգամ նման հայտարարություն լինի, ես պատրաստ եմ ինքս միջնորդել այդ հարցի կապակցությամբ քրեական գործ հարուցել»,-նշեց Կոստանյանը պատասխանելով հարցին, թե հայտնի խոսք կա «ձուկը գլխից է հոտած», իսկ կաշառք վերցնողները կիսվում են վերևների հետ: