Սերժ Սարգսյանի պարտքը
Եվրամիությունը լիահույս է, որ Հայաստանն այս անգամ կստորագրի՝ նոր Համապարփակ և ընդլայնված գործընկերության համաձայնագիրը։ Տարածաշրջանային այցով Հայաստանում գտնվող Եվրոպական խորհրդարանի արտաքին հարաբերությունների հանձնաժողովի նախագահ Դեյվիդ Մաքալիստերն հրավիրված մամուլի ասուլիսին պատասխանելով «Ազատության» հարցին, ասաց, որ այդ համոզմանն է եկել նախագահ Սերժ Սարգսյանի հետ քննարկման արդյունքում: «Այո, Հայաստանը Եվրասիական տնտեսական միության անդամ է, գիտենք, թե ինչ կատարվեց 2013 թվականին, բայց այժմ նախագահ Սարգսյանը պատրաստ է հավակնոտ համաձայնագիր ստորագրել Եվրոպական միության հետ և սա կարևոր է մեզ՝ Եվրամիության համար», - նշեց Մաքալիստերը: - «Հույս ունեմ, որ այս մանրակրկիտ և բարդ բանակցային գործընթացը կհասնի ավարտին, քանի որ դա շահեկան կլինի Հայաստանի ժողովրդի և բիզնեսի համար», - հավելեց նա: Եվրամիությունը, հիշեցնենք, ավելի վաղ Հայաստանի հետ բանակցում էր մեկ այլ՝ Ասոցացման համաձայնագրի կնքման շուրջ։ 2013 թվականի սեպտեմբերին, սակայն, մոտ երեք տարվա բանակցություններից հետո շատերի համար անսպասելիորեն նախագահ Սերժ Սարգսյանը հայտարարեց, որ Հայաստանը ԵՄ-ի փոխարեն նախընտրում է Մոսկվայի նախաձեռնությամբ ստեղծված Եվրասիական տնտեսական միությունը։ Հայաստանի և Բրյուսելի միջև նոր շրջանակային համաձայնագիրն, ըստ Եվրոպական խորհրդարանի ներկայացուցչի ամենայն հավանականությամբ կստորագրվի նոյեմբերին։ Նկատենք, որ Եվրամիության արտաքին հարաբերության և անվտանգության հարցերի հանձնակատար Ֆեդերիկա Մոգերինին Բրյուսելում Հայաստան-ԵՄ խորհրդի նիստից հետո Հայաստանի արտգործնախարար Նալբանդյանի հետ համատեղ ճեպազրույցում հայտնել էր Հայաստանի հետ հարաբերությունը խորացնելու Եվրամիության պատրաստակամությունը: Կողմերը հույս էին հայտնել նաև, որ աշնանը Բրյուսելում տեղի ունենալիք Արևելյան գործընկերության Վեհաժողովում Հայաստանն ու ԵՄ-ն կստորագրեն հարաբերության նոր համաձայնագիրը: Փաստորեն, Բրյուսելում այդ հանդիպումից հետո Երևան է ժամանել նաև Եվրախորհրդարանի պատվիրակությունը, որը Հայաստանի բարձրագույն ղեկավարության հետ հանդիպումներում ամփոփել է համաձայնագրի շուրջ բանակցության ներկայիս փուլի արդյունքը: ԵՄ-ի հետ ապագայում ստորագրվելիք համաձայնագիրը չի լինելու նախկինում բանակցված ու տապալված ԵՄ Ասոցացման համաձայնագիրը: Այն կունենա որոշակի քաղաքական և տնտեսական մաս, բայց չի կարող հակասել Հայաստանի` ԵՏՄ-ին անդամակցության պարտավորություններին, այն ինչի անվերջ մի քանի տարի կրկնում էին Հայաստանի իշխանությունները: Այսինքն, նոր համաձայնագիրը չի կարող ունենալ՝ Հայաստան-ԵՄ ազատ, անմաքս առևտուրի գաղափարը, ինչը Հայաստանի ելքը ԵՄ-ի մեծ շուկա ուղիղ ճանապարհ էր: Բայց ԵՄ-ի հետ նոր համաձայնագիրն էլ, թեև նկատելիորեն հետ կլինի Ասոցացման համաձայնագրից, այնուամենայնիվ, քայլ է, որով իշխանությունները որոշակի շանս են ստանալու Հայաստանում դրական փոփոխություններ իրականացնել` գործնականում: Իհարկե, նրանք կարող են, ինչպես ասում են` թուղթ ստորագրել, բայց իրականում ոչ մի նշանակալի բան էլ չանել, այսինքն, հասարակությունը չզգա, որ Հայաստանը մի կարևոր քայլ է իրականացրել: Չէ որ նախադեպերի պակաս չունենք` միայն թղթի վրա եղածը` ցույց տալ, որ կիրառելի չէ առօրյայում: Այստեղ կա, իհարկե, նաև Մոսկվայի գործոնը: Կարո՞ղ է Մոսկվան վերջին պահին որոշել, որ Հայաստանը նույնիսկ այդպիսի համաձայնագիր չպետք է ստորագրի ԵՄ-ի հետ... Ամեն ինչ հնարավոր է: Սակայն, եթե կա հնարավորություն և այդ հնարավորությունը կյանքի կոչվի` Հայաստանի իշխանությունը երկրի ներսում իր քաղաքացիներին է, նախևառաջ, պարտավոր ապացուցել, որ չպետք է ամեն լավ բան վարկաբեկել: Մետաքսյա Շալունց
Հետևեք մեզ Viber-ում
