Պատեհ-անպատեհ չօգտագործել «Թուրքիա- Ադրբեջան» տերմինաբանությունը՝ որպես ընդդիմությանը հակազդելու միջոց.Փաշինյան

«Ելք» խմբակցության պատգամավորները «Հեռուստատեսության եւ ռադիոյի մասին» ՀՀ օրենքում փոփոխություններ եւ լրացում կատարելու մասին նախագծի քննարկման ժամանակ մտահոգություն հայտնեցին, որ առաջարկվող փոփոխությունը, որով նախատեսվում է ՀՀ տարածքում թվային ռադիոհեռարձակման անցնելու շրջանակում ռադիոհաճախականությունների նոր մրցույթներ հայտարարել,  կարող է խախտել խոսքի ազատության իրավունքը, քանի որ Հայաստանում կան ռադիոընկերություններ, որոնք լրատվական բնույթի են, իսկ դրանց թվայնացումը կարող է խնդիրներ առաջացնել: «Առաջարկում եմ իմ այցելությունը «Ելք» խմբակցություն` սպառիչ պատասխաններ տալու համար»,-նշեց ՀՀԿ-ական պատգամավոր Արման Սաղաթելյանը և հավելեց, որ սա նաև արվում է անվտանգության նկատառումով՝ ադրբեջանական եւ թուրքական ռադիոհաճախականությունները ՀՀ տարածքում արգելափակելու նպատակով և հեգնեց, որ եթե խախտվի, ապա նրանց խոսքի ազատությունը պետք է խախտվի ՀՀ տարածքում: Նիկոլ Փաշինյանը  հորդորեց պատեհ-անպատեհ չօգտագործել «Թուրքիա- Ադրբեջան» տերմինաբանությունը՝ որպես ընդդիմությանը հակազդելու միջոց: «Երբ դուք խոսեք Թուրքիայի եւ Ադրբեջանի մասին, ես ձեզ հիշեցնելու եմ, որ դուք միակ իշխանությունն եք, որը զինադադարից հետո տարածք է զիջել Ադրբեջանին: Չհամաձարկվեք ամեն անգամ մեզ հիշեցնել Թուրքիայի, Ադրբեջանի մասին, հակառակ դեպքում կհիշեցնենք քառօրյա պատերազմը, Արցախն ու Հայաստանը պաշտպանելու ձեր ձախողումը, դեռեւս չի քննվել, թե ՀՀԿ-ական որ բարձրաստիճան ներկայացուցիչները ձախողեցին պատշաճ պաշտպանությունը: Կոչ եմ անում մյուս անգամ մեր խմբակցության հարցերին ի պատասխան հայրենասիրական դրոշներ չբարձրացնել կոնտեքստից դուրս»,- ասաց Փաշինյանը: