Հրապարակից հնչող ընդդիմադիրների ճառերը ծաղրուծանակի առարկա են դարձնելու հայ ժողովրդին․ Անդրանիկ Միհրանյան

Մոսկվայի միջազգային հարաբերությունների պետական ինստիտուտի պրոֆեսոր, քաղաքագետ Անդրանիկ Միհրանյանը կարծում է, որ ներկայումս Հայաստանում  ստեղծված քաղաքական, պետական և ռազմական ճգնաժամը կարող է լուծվել ապստամբության և դիկտատուրայի հաստատման միջոցով։

<<Եթե ճիշտ են այն բոլոր մեղադրանքները, որոնց մասին ասվում է, ինչ բացթողումներ և ոչ կոմպետենտ կառավարում է իրականացվել պատերազմի ժամանակ, ինչեր են վաճառել և ինչ կոռուպցիոն գործարքի ու դավաճանական քայլերի են գնացել, իբր թե կոռուպցիայի դեմ պայքարի համար իշխանության եկած այս տգետները, ապա սրանց հանդեպ գործադրվող ցանկացած քայլ կլինի արդարացված և օրինական, որովհետև իրենք իրենց սահմանադրությունից դուրս են դրել>>,- hayeli.am-ի հետ զրույցում նման կարծիք հայտնեց ռուսաստանաբանակ քաղաքագետը՝ մեկնաբանելով իշխանափոխության և Նիկոլ Փաշինյանի հրաժարականին հասնելու՝ ընդդիմության որդեգրած քայլերի արդյունավետության հարցը։

Նրա կարծիքով՝ երբ իշխանությունը դառնում է բռնատիրական, ոչ պետական, դավաճանական, ապա և՛ ամերիկյան, և՛ եվրոպական, և՛ ընդհանրապես բոլոր դեմոկրատական սահմանադրություններով նախատեսվում է, որ ժողովուրդն իրավունք ունի դիմելու ապստամբության։ <<Բոլոր դեմոկրատական սահմանադրությունները նախատեսում են ապստամբության իրավունք։ Եթե իշխանությունը ոչ կոմպետենտ է, դավաճանական է ու պարտված, ապա ապստամբությունը միակ ճանապարհն է․
պետք է գնալ և վերցնել կառավարությունը, Ազգային Ժողովը, ձևավորել միապետություն և ստեղծել նորմալ պետականություն։ Ցավոք, մենք չունեք մի այնպիսի գեներալ, որն այդ ռիսկին կգնա և դավաճանին կհեռացնի։ Մենք չունենք ոչ Նապոլեոն Բոնապարտ, ոչ Ֆրանցիսկո Ֆրանկո, ինչպես ֆրանսիացիները․․․․ Մեր ազգն այնքան է ընկել, որ ցավոք չունի անգամ մի գնդապետ Սուրետ Հուսեյնով, որը գնաց և իր զինվորներով սատկացրեց պարտված Էլչիբեյին և վերջ տվեց նրա իշխանությանը։ Նրանք չներեցին Էլչիբեյին՝ պարտության համար։ Դրանից հետո եկավ Ալիևը, սկսեց իր ծրագիրը։ Փաշինյանը ավելի ստոր և զազրելի կերպար է, քան Էլչիբեյը, խայտառակ ձևով պարտություն է կրել, բայց մենք չունենք հայկական Էլչիբեյին հեռացնող մեր գնդապետ Հուսեյնովին։ Սա իրապես խայտառակ երևույթ է, որը բացատրություն չունի>>,- նշում է Միհրանյանը։

Քաղաքագետը կարծում է, որ այժմ Հայաստանում պետք է ուժեղ միապետություն հաստատվի, և անկախ նրանից, թե ով կլինի միապետը, նա պետք է հստակ նպատակ դնի՝ փրկել պետությունը․ << Այո՛, հիմա Հայաստանում պիտի դիկտատուրա հաստատվի։
Հազար կողմից արհավիրք ու մարտահրավեր է գալիս․ թշնամին, որ կարծում է, թե ծնկի է բերել հայ ժողովրդին, պիտի փորձի հնարավորինս շատ բան պոկել Հայաստանից։ Պետք է հաստատել դիկտատուրա և պահել պետությունը, թե չէ հրապարակներում կանգնած ճառեր ասելով, առանց ուժեղ միապետության, ոչ մի հարց չի լուծվելու։ Մենք կորցնելու ենք պետականությունը։ Այսօր հրապարակից հնչող ընդդիմադիրների ճառերը ծաղրուծանակի առարկա են դարձնելու հայ ժողովրդին և կործանելու են պետությունը։ Հիմա ճառ ասելու ժամանակը չէ, պետք է պետականությունը փրկել կործանումից>>,- իր միտքն ամփոփեց Անդրանիկ Միհրանյանը՝ կոչ անելով անիմաստ ճառերից անցնել կտրուկ գործողությունների։

 Hayeli.am