Ով է իրականում տեռոր իրականացնում

44 օր տեւած պատերազմի ընթացքում հանրությանը ստով կերակրողներ իշխանությունները, որոնք ամեն օր հաղթական լուրեր էին հաղորդում՝ թաքցնելով պարտությունները եւ ճշմարտությունը, մի քանի օր է շրջանառության մեջ են դրել մեդիատեռոր հասկացությունը: Իշխանական տարբեր չինովնիկների, ինչպես նաեւ Նիկոլ Փաշինյանի կողմից հայտարարություններ են հնչում, թե որոշ շրջանակներ իրենց դեմ մեդիատեռոր են իրականացնում, կեղծ լուրեր տարածում, որոնք նպատակ ունեն հանրության շրջանում խուճապ եւ անհանգստություն առաջացնել, հանրությանը տրամադրել իշխանության դեմ եւ այդպիսով ապակայունացնել իրավիճակը ու իշխանություն վերցնել:

Իհարկե, այսպիսի ստորություն միայն իշխանության մտքով կարող էր անցնել եւ այս հայտարարություններն, ըստ էության, ինքնախոստովանական ցուցմունք են առ այն, որ պատերազմի ընթացքում իրենք ստել են հանուն իշխանության, որ չկորցնեն այն՝ թքած ունենալով Արցախի եւ պետական շահի վրա: Բայց դե ունենք այն, ինչ ունենք: Հիմա հասկանանք, թե ով է իրականում հանրության նկատմամբ տեռոր իրականացնում՝ հայտնի ընդդիմադիր շրջանակները, որոնց մասին ակնարկում են իշխանությունները, թե հենց իրենք:

Երեկվանից լուրեր են տարածվում, որ հայկական կողմը 100-ից ավելի նոր գերներ ունի, մեր զինվոր եւ կամավոր տղաները գերի են ընկել Արցախի գյուղերի պաշտպանական մարտերում՝ Հին Թաղեր, Խծաբերդ: Ընդ որում նշված համայնքները վերջնականապես անցան ադրբեջանական վերահսկողության տակ եւ այդ մասին հայտնել են համայնքապետերը: Հիմա ինչ է ասում իշխանությունը, ինչ են ասում պաշտոնական եւ պատկան գերատեսչությունները: Համայնքների հանձնման մասին որեւէ պարզաբանում չեն ներկայացրել, փոխարենն իրենց քայլից մի պատգամավորուհի՝ Նազելի Բաղդասարյանը տեղեկություններ ունի, որ դրանք մեր վերահսկողության տակ են գտնվում, թե որտեղից աղջնակին նման տեղեկություններ, թերեւս ինքը պիտի պատմի, սակայն համայնքապետերը պնդում են, որ համայնքները անցել են թշնամուն:
Իսկ նոր գերիների հարցում իշխանությունն ի դեմս ՊՆ-ի ուղղակի ծաղրում է հասարակությանը: Մինչ համացանցը անհանգստության նոպաների մեջ պարզաբանումներ է պահանջում, ՊՆ-ից տարածվում է հաղորդագրություն, թե Պաշտպանության նախարարությունը չի մեկնաբանում զինվորների գերեւարման վերաբերյալ ադրբեջանական լրատվամիջոցների տեղեկությունները եւ վերջին ժամերին տարածված տեսանյութերը՝ հայտարարելով, թե պարզաբանումների է սպասում Արցախի ՊԲ-ից: Բայց տասը ժամ է անցել, իսկ ՊՆ-ն որեւէ նոր բան չի հայտնել, ինչ է այդքան դժվար է ՊԲ-ից պարզաբանում ստանալը եւ հանրությանը տեղեկացնելը: Մարդիկ ժամեր շարունակ տագնապի նոպաների մեջ են, բայց իշխանության կողմից զրո արձագանք: Կամ երկու օր առաջ գիշերվա կեսին ոստիկանական զորքերով իշխանությունը ողողել էր Երևանը ու ոչ մի բացատրություն, թե ինչ է կատարվում: Հետո էլ սկսեցին բողոքել մեդիատեռորից:

Հիմա ով է տեռոր իրականացնում՝ դուք, թե ուրվականները, վեր կացեք ու ասեք՝ ճիշտ են ասում կամ ստում են, կամ սխալ են ասում՝ այսքան չի, այնքան է: Մի բան ասեք, ձայն հանեք: Թեպետ Դուք էնքան եք ստել, որ ձեր ոչ մի ասածին այլևս չեն հավատում, ոչ մեկը չի հավատում: Ձեզ ոչ մեկ այլեւս լուրջ չի ընդունում, այնպես որ հեռացեք, քանի դեռ ուշ չէ:

Անի Սահակյան