Սբազանի շառաչուն ապտակը

Որ Հայաստանի վարչապետի աթոռին նստածն այլեւս քաղաքական դիակ է, այդ փաստն ապացուցող բազում իրողություններ կան, դրանցից մեկն էլ հոգեւորականության ընդվզումն է, ըմբոստությունը վարչապետի նկատմամբ: Թվում էր, թե երբեք ու որեւէ հանգամանքներում այս ամենահանդուրժողական եւ ներողամիտ խավին հնարավոր չի լինլու հունից հանել, նրանք իրենց բողոքի ձայնը չբարձրացրեցին նույնիսկ այն ժամանակներում, երբ գալով իշխանության Նիկոլ Փաշինյանը խաչակրաց արշավանքներ սկսեց Մայր աթոռի եւ վեհափառի դեմ, հեղափոխական հրոսակներ գրոհեցին մեր սուրբ տաճար, սակայն պահն օրհասական է, ճակատագրական, հայրենիք կորցրած ցանկացած հայ, առավել եւս հոգեւորական չպետք է անտարբեր ու հանդուրժող լինի ստեղծված իրավիճակին:

Հենց միայն նրա համար, որ մի գրչի հարվածով բարբարոս եւ անաստված թուրքին են հանձնել մեր պատմությունը, Աստծո տները` մեր եկեղեցիները: Սա այն դեպքը չէ, երբ ըմբոստացող, բողոքի ձայն հանող հոգեւորականներին պետք է մեղադրել քաղաքականությանը խառնվելու մեջ, հովիվն այնտեղ պետք է լինի, որտեղ հոտն է: Մենք տասնամյակներ շարունակ բողոքել ենք, որ հոգեւոր դասն անհաղորդ է քաղաքացիներիս ցավեին ու հոգսին, նրանց պասիվությունն ակնհայտ է եղել ներքաղաքական լարման նույնիսկ պիկին, մինչդեռ այսօր մեկը մյուսին հաջորդում է շառաչուն ապտակով` առ Նիկոլ Փաշինյան: Կապիտուլացիայի ստորացուցիչ ակտի ստորագրումից օրեր անց հայտարարությամբ հանդես եկավ Մայր Աթոռի դիվանապետ Արշակ Եպիսկոպոս Խաչատրյանը: «ՆԻԿՈԼ ՓԱՇԻՆՅԱՆԸ ՊԵՏՔ Է ՀԵՌԱՆԱ...
Այն, ինչ այս պահին կատարվում է Ազատության հրապարակում, չափազանց մտահոգիչ է, հղի` ծանր հետևանքներով: Նիկոլ Փաշինյանը ձախողել է երկրի ղեկավարումը և պետք է հեռանա ժողովրդի և իրավապահների միջև բախումներից և, որ ամենից վտանգավորն է, արյունահեղությունից խուսափելու համար: Ժամանակն է անձնական անվտանգությունը զոհել պետության ապագայի համար>>,- գրել էր նա: Հիշեցնենք, որ անաստված իշխանությունն այդ գրառումից հետո նրան հրավիրեցին ԱԱԾ: Բայց ինչպս տեսնում ենք դրանով հնարավոր չէ մյուսների աչքը վախեցնել:

Դեկտեմբերի 7-ին Նիկոլ Փաշինյանն այցելել էր Գյումրի՝ մասնակցելու երկրաշարժի անմեղ զոհերի հիշատակին նվիրված արարողությանը, այն տեղի է ունեցել Սուրբ Ամենափրկիչ եկեղեցու բակում՝ հուշակոթողի մոտ:
Սակայն ավանդույթին հակառակ արարողակարգը չի վարել Շիրակի թեմի առաջնորդ Միքայել Աջապահյան սրբազանը, նրան փոխարինել է մեկ այլ հոգևորական, ինչը ստիպեց պարզել, թե ինչու է բացակայում Սրբազանը։ «Հրապարակին» Շիրակի թեմի առաջնորդն այս կապակցությամբ փոխանցել է .<<Նա իմ վարչապետը չէ, որ ես նրա առաջ հոգեհանգստի կարգ մատուցեի>>։
Աջապահյանը հույս է հայտնել, որ մեր երկիրը գոնե շուտով կունենա այնպիսի ղեկավար, որն ի զորու կլինի երկիրը դուրս հանել այս ծանր կացությունից։

Մեկնաբանություններն ավելորդ են:

Անի Սահակյան