Նախկինի ու ներկայի միջեւ ավերիչ պատերազմի հետեւանքները
Սյունիքում կրքերը եռում են՝ ջրի երես հանելով մարզում կուտակված խնդիրները: «Սյունյաց երկիր» կայքէջում հրապարակվել է գլխավոր խմբագիր Սամվել Ալեքսանյանի «Կադրային խեղկատակություններ` Սյունիքի բուժական հաստատություններում» վերտառությամբ բաց նամակը՝ ուղղված ՀՀ առողջապահության նախարարի պաշտոնակատար Լևոն Ալթունյանին, ընդարձակ նամակում խմբագիրը մեկ առ մեկ թվարկում է մարզի առողջապահական հաստատություններում նոր մարզպետի ղեկավարման ընթացում տեղի ունեցող «կասկածելի» իրադարձությունները, կադրային նշանակումները ու մարզի բազմաթիվ բժիշկների ու բնակիչների անունից դիմելով՝ ակնկալում անկեղծ և ողջամիտ պատասխան: «Կարող էինք, անշուշտ, մտահոգող հարցերի պատասխանը ստանալու համար դիմել Սյունիքի մարզպետարան կամ տարածաշրջանային բժշկական կենտրոններ, բայց դա անօգուտ և անիմաստ փորձ կլիներ, քանզի ե՛ւ մարզպետարանում, ե՛ւ բժշկական կենտրոններում խստագույնս արգելված է լրատվամիջոցների հարցերին պատասխանելը» միեւնույն ժամանակ տեղեկացնում է նամակագիր-խմբագիրը, ով, հիշեցնենք, նույն խմբագիր է, որ մի առիթով Սյունիքի նախկին մարզպետ Սուրիկ Խաչատրյանին՝ Լիսկային, համեմատել էր Քրիստոսի հետ, իրեն էլ առաքյալի: Ասել է թե, հասկանալի է, թե քամին որ կողմից է փչում, նախկին ու ներկա մարզպետների միջեւ խուլ հակամարտության առաջին պայթյունն է հրապարակային վայրում: Ալեքսանյանը մեկիկ-մեկին թվարկում է մարզի բոլոր առողջապահական հաստատություններում կատարված փոփոխությունները, որոնք ինչպես նամակագիրն է նշում, առողջապահական հիմնարկներում տեղի են ունենում ղեկավար կադրերի պերմանենտ փոփոխություններ՝ հանրությանն անհայտ պատճառներով. առայժմ կադրային ամեն մի փոփոխությունից հետո ասեկոսեների տարափ է միայն… Ավելին, ներկայացնում է, որ գործող մարզպետ Վահե Հակոբյանը հիմնարկների ղեկավար կազմը համալրում է բացառապես Երեւանից բերած մարդկանցով եւ ապստամբության մտադրություն ունեցող կոլեկտիվներին սպառնում վատ հետեւանքներով. <<Գորիսում Սաշա Խաչատրյանին ազատում ենք և փոխարենը Գորիսի բժշկական կենտրոնի տնօրենի պաշտոնակատար նշանակում լավ վիրաբույժի և կազմակերպչի համբավ ունեցող Գագիկ Թունյանին: Երեք-չորս ամիս հետո նրան ազատում ենք զբաղեցրած պաշտոնից՝ փոխարենը պաշտոնակատար նշանակում Գորիսում հարգված բժիշկ և կազմակերպիչ Լևոն Հարությունյանին: Մի քանի օր հետո նրան նույնպես ազատում ենք՝ փոխարենը նշանակում Երևանից բերված մի անձնավորության, որին ոչ ոք դեռևս չի ճանաչում Սյունիքում>>:Եւ այսպես մարզի բոլոր առողջապահական հաստատություններում՝ Կապան, Մեղրի, Սիսիան, Քաջարան..<<Փաստորեն գործ ունենք Սյունիքի առողջապահական համակարգը տրորելու, տեղական կադրերին ծաղրելու ակնհայտ երևույթների հետ, որի հանդեպ, ցավոք, Դուք, որպես նախարար, անհասկանալի և անբացատրելի լռություն եք ցուցաբերում: Ձեր մասնագետներին ծաղրում են, նրանց արժանապատվությունը վիրավորում են, իսկ Դուք լռում եք: Ստեղծված բարոյահոգեբանական մերժելի վիճակը, լարվածությունը, անվստահությունը հաղթահարելու համար որքա՜ն տարիներ ու ջանքեր են պահանջվելու:Գոնե հիմա կարո՞ղ եք Սյունիքի հանրությանը բացատրություն տալ, թե վերջին վեց-յոթ ամսում ինչու են տարածաշրջանային բժշկական կենտրոնների տնօրենները (տնօրենների պաշտոնակատարները) հերթականությամբ ու հաջորդությամբ ազատվել աշխատանքից: Եվ ինչո՞ւ, ի՞նչ հանգամանքների մղումով են Երևանից ղեկավար կադրեր նշանակվել՝ առայժմ առանց մրցույթի>> ,-դիմում է նախարարին նամակագիրը: Իհարկե, հասկանալի է, որ ազատված բժիշկներն ու բժշկական հաստատությունների արդեն նախկին ղեկավարները նախկինում աշխատել են Սուրեն Խաչատրյանի հետ ու կարելի է ենթադրել, որ հենց նրա հետ որոշակի կապն է դարձել աշխատանքային կարիերայի նման հանգուցալուծման պատճառ: Գիտենք նաեւ, որ Երեւանից Սյունիք տեղափոխված մարզպետը իր պատվից վեր է համարում շփվել մարզի բնակիչների, անգամ համայնքապետերի հետ, մարզից մեզ հայտնում են, որ մարզպետը անգամ ենթականերին ձեռքով չի բարեւում եւ առաջնորդվում է ԿԳԲ-ական մեթոդներով: Այնպես որ կասկածից վեր է, որ նա առանց վարանելու կաթվածահար կաներ մարզի առողջապահական համակարգը՝ թքած ունենալով բնակիչների առողջության վրա: Իհարկե,ինչ-որ առումով հասկանալի է նաեւ, թե ինչ պատճառ ունի մարզային բժիկներին յուրայիններով՝ երեւանցիներով փոխարինելու նկրտումները: Հայտնի է, որ ինչպես կրթական, այնպես էլ առողջապահական հաստատությունները համապետական ընտրություններին իշխանությանը ձայն բերող հաստատություններն են: Ըստ ամենայնի մարզպետ Վահե Հակոբյանի կադրային ջարդը այդ իրողությամբ է պայմանավորված,վերջինս խորհրդարանի ընտրություններին առաջադրվել էր ռեյտինգային ընտրակարգով ու մարզում ամենաշատ ձայները ստացել: Հակառակ դեպքում չէր բացառվում, որ Լիսկան իր կուրացիայի տակ կվերցներ համախոհներին եւ կտապալեր մարզպետի ծրագիրը: Անհասկանալի է, թե ընտրություններից հետո ինչու է շարունակվում կադրային քաղաքականությունը: Մի բան փաստ է, որ Սյունիքում բնականոն կյանքը խաթարվել է երկու մարդու անձնական շահերի բախման արդյունքում, եւ անգամ առողջապահության համակարգն է հայտնվել որոշերի կամայականությունների տակ: Անի Սահակյան
Հետևեք մեզ Viber-ում
