Մահափորձի գործով ձերբակալվածները քիլլերներ են

Երկու օր է՝ մամուլը գրում է երկու հեղինակությունների՝ Դոն Պիպոյի եւ Վստրեչի Ապերի դեմ կատարված մահափորձի մասին։ Ըստ այդմ, երեք անձ տուն են վարձել Էջմիածնում եւ նախապատրաստվել մահափորձին, որը կանխվել է իրավապահների կողմից։ Ինչպես նշում է ոստիկանությունը․ «Օպերատիվ-հետախուզական և քննչական անհետաձգելի միջոցառումների արդյունքում՝ այսօր, մայիսի 24-ին, ժամը 18-ի սահմաններում, ոստիկանության քրեական հետախուզության, կազմակերպված հանցավորության դեմ պայքարի գլխավոր և Արմավիրի մարզային վարչությունների ծառայողները խափանեցին սպասվող ծանր հանցագործությունը, կանխեցին հանցավոր ծրագիրն ու անակնկալի բերելով նշված բնակարանում գտնվող երեք անձանց՝ վնասազերծեցին և բերման ենթարկեցին ոստիկանության ՔՀԳՎ»։ Իսկ բնակարանի խուզարկությամբ հայտնաբերվել են զենք, զինամթերք։ newsbook.am-ի տեղեկություններով՝ մահափորձի պատվիրատուն Արտյոմ Հարությունյանն է՝ քրեական աշխարհում հայտնի Արտյոմ Կանևսկոյը՝ 2010 թվականին մահացած «օրենքով գող» Արմեն Կանևսկոյի եղբայրն է: hraparak.am-ը  լրացուցիչ մանրամասներ ճշտեց այս գործով։ Մասնավորապես այն, որ ձերբակալվածները վանաձորցի քիլլերներ են, որոնց վարձակալած տանը զենք են հայտնաբերել, իսկ բջջայիններում այլ ապացույցներ՝ լուսանկարներ եւ այլն։ Նրանք խոստովանել են իրենց մեղքը եւ մանրամասն պատմել, թե ինչն ինչպես էին անելու։ Վստրեչի Ապերը՝ Արամ Վարդանյանը, որն այս գործով պետք է տուժողի կարգավիճակ ստանա, դեռեւս չի հրավիրվել հարցաքննության։ Ինչպես հայտնի է, հեղինակությունները խուսափում են ցուցմունք տալուց, իրավապահների հետ ուղիղ համագործակցությունից։ Նրա նկատմամբ անցյալում էլ մահափորձ կազմակերպվել՝ 2007 թվականին։ Իսկ Դոն Պիպոյի դեմ նման մահափորձ եղել է 2013 թվականին։ Հիշեցնենք, որ Դոն Պիպոն՝  Արթուր Ասատրյանը Հայաստանից հեռացել է գեներալ Մանվելի հետ հակասությունների պատճառով, այժմ բնակվում է Իտալիայում, որտեղ ծաղկող բիզնես ունի եւ հսկայական սեփականություն։ Դեպքի առթիվ հարուցվել է քրեական գործ 35-104 հոդվածի (սպանության նախապատրաստություն) եւ 235 հոդվածի հատկանիշներով (ապօրինի զենքը պահելը, կրելը): Ընթանում է նախաքննություն։