Ունա՞կ է Փաշինյանը Ադրբեջան-Նախիջևան կապը ՀՀ տարածքով չեղարկել. Հարցնում է Դավիթ Շահնազարյանը

ՀՀ վարչապետ Նիկոլ Փաշինյանը, ըստ ամենայնի, ոգևորված Ռուսաստանի նախագահ Վլադիմիր Պուտինի երեկվա ելույթից, երբ նա նշեց, որ՝ Փաշինյանն ասել է այն ամենն, ինչ եղել է և նրան չի կարելի դավաճանության մեջ մեղադրել, այսօր հանդես է եկել ստեղծված վիճակը հաղթահարելու ուղիների, մեթոդների և ծրագրերի թեմայով՝ իրեն համարելով ստեղծված վիճակի թիվ 1 պատասխանատուն:

Նա առաջիկայում ամենակարևոր անելիքների ճանապարհային քարտեզ է ներկայացրել, որոնց առաջին և երկրորդ կետերը հետևյալն են. «1.Ղարաբաղի հարցի բանակցային գործընթացի վերականգնում ԵԱՀԿ ՄԽ համանախագահության ձևաչափով՝ Արցախի կարգավիճակի և իրենց բնակության վայրեր արցախցիների վերադարձի հարցի առաջնահերթության ընդգծմամբ: 2. Ապահովել արցախցիների վերադարձը իրենց հայրենի օջախներ...»:

Մնացած կետերը, բարի ցանկությունները մեջբերելու կարիք չկա, եթե Փաշինյանին հաջողվի 6 ամիս իշխել՝ այդ ժամանակ հանրությունը ինքը հնարավորություն կունենա տեսնելու, թե իր հայտարարածի քանի տոկոսն է նա կարողացել իրականություն դարձնել:

Ճանապարհային քարտեզի առաջին և երկրորդ կետերը Փաշինյանը կրկնել է վերջին օրերին ՀՀ Ազգային անվտանգության ծառայության նախկին ղեկավար, արտակարգ և լիազոր դեսպան Դավիթ Շահնազարյանի առաջարկած կետերը, մեկ բացառությամբ, Շահնազարյանը ոչ թե նշել է «վերականգնել» ԵԱՀԿ Մինսկի խմբի գործությունը, այլ՝ ԵԱՀԿ Մինսկի խումբը պետք է սկսի աշխատել: Շահնազարյանն ասել էր, որ հնարավորինս արագ ԵԱՀԿ Մինսկի խումբը պետք է սկսի իր աշխատանքները և պետք է առաջ մղվի ԵԱՀԿ Մինսկի խմբի կողմից Արցախի կարգավիճակի հարցը:

Փաշինյանն այսօր նշել է, թե իր ճանապարհային քարտեզի իրագործման համար կառավարության կազմում փոփոխություններ է իրականացնում, այդ փոփոխությունների իմաստը և նպատակը կլինի իր ծրագրի առավել արդյունավետ իրականացումը: Նա նշում է, թե միջոցառումների իրագործումը անշրջելի ինստիտուցիոնալ ռելսերի վրա դնելը կտևի վեց ամիս, իսկ 2021թ. հունիսին հանդես կգա ճանապարհային քարտեզի իրագործման հաշվետվությամբ:

Նկատենք, որ Դավիթ Շահնազարյանը «Հայելի»-ին տված հարցազրույցում խոսեց նոյեմբերի 10-ին ստորագրված փաստաթղթի մասին, նշելով, որ ոչ ոք չի խոսում դրա չեղարկման մասին, կարևոր է, թե ինչպես է այն կիրառվելու, փաստաթուղթն այլ բան է, կիրառումը այլ բան: «Արցախցիները պետք է վերադառնան Արցախ, եթե արցախցիները Արցախ չգնացին, միջազգային հանրությունն ասելու է՝ խաղաղապահներն այնտեղ ի՞նչն են պաշտպանում, տարա՞ծքը...»:

Ըստ Շահնազարյանի՝ նոյեմբերի 10-ին ստորագրված փաստաթղթով, կարելի է նույնիսկ հասնել նրան, որպեսզի կիրառվի միայն խաղաղապահների տեղակայման հարցը, սակայն նա վստահ է, որ Փաշինյանն ի վիճակի չէ Ռուսաստանի իշխանությունների հետ թե այդ, թե այլ կարևոր հարցերով պայմանավորվածությունների գալ:

Շահնազարյանն ասում է, որ՝ հաջորդ կառավարությունը պետք է բացառի ադրբեջանցիների վերադարձն Արցախ, այդ թվում՝ Ստեփանակերտ: Բայց ունա՞կ է Նիկոլ Փաշինյանը նման որոշումներ կայացնել ու պայմանավորվել Ռուսաստանի իշխանությունների հետ:

Հաջորդ հանցավոր կետը, որը ներառվել է փաստաթղթում՝ Հայաստանի տարածքով Ադրբեջան-Նախիջևան կապի հաստատումն է, որը ըստ Շահնազարյանի, նույնպես պետք է բացառել, քանի որ դա մի կետ է, որը հակասում է ՀՀ ինքնիշխանությանը և այդ ճանապարհը պետք է հսկեն բացառապես ՀՀ սահմանապահները: Այս հարցում ևս, պետք Հայաստանի իշխանությունը վճռորոշ բանակցություններ ունենա Ռուսաստանի բարձրագույն իշխանության հետ:

Այս ամենն ապահովելու համար ըստ Շահնազարյանի, Հայաստանում անհրաժեշտ է իշխանության ձևավորում, որը կվայելի Ռուսաստանի իշխանության անվերապահ վստահությունը:

Մետաքսյա Շալունց