Ճաճոյի Էդոյի որդին երկու անչափահաս երեխա ունի, երեխաները սպանության ժամանակ տանը չեն եղել armtimes.com

Լոռու մարզում սպանվել է հայտնի քրեական հեղինակություն «Ճաճոյի Էդոյի» որդին՝ Տիգրան Մարտիրոսյանը: Վերջինիս սպանելու մեջ կասկածվում է կինը` Լիաննա Կիրակոսյանը: Տիգրան Մարտիրոսյանը եւ Լիաննա Կիրակոսյանը իրենց երկու անչափահաս երեխաների հետ բնակվում էին Լոռու մարզի Գուգարք գյուղում: Այս մասին armtimes.com-ին տեղեկացրեց Գուգարքի համայնքապետ Աշոտ Աշուղյանը: «Նրանք ընտանիքում չորս հոգի էին՝ հայրը, մայրը եւ երկու երեխաները: Կարծեմ մեկը տղա է, մյուսը՝ աղջիկ: Նրանք մեր գյուղում չէին բնակվում, Վանաձորի գրանցում ունեին, բայց շուտ-շուտ գնում-գալիս էին գյուղ»,- ասում է Աշոտ Աշուղյանը: Աշուղյանի խոսքով՝ «Ճաճոյի Էդոյի» որդին մեկ սեփական առանձնատուն ունի Գուգարք գյուղի կենտրոնում եւ մեկ բնակարան Վանաձոր քաղաքում: Տիգրանը, ըստ գյուղապետի, 34 տարեկան էր, իսկ նրա կինը՝ Լիանան 32 տարեկան: «Նորմալ տղա էր, ակուրատնի ընտանիք էր: Հեչ չգիտեմ, թե ինչի պատճառով են կռվել, դա միայն կինը կիմանա»,- նշեց համայնքապետը: Armtimes.com-ի այն հարցին, թե դեպքը որտեղ է տեղի ունեցել, Աշոտ Աշուղյանը նշել է. «Գյուղում են վիճել, կարծեմ տան բակում է միջադեպը տեղի ունեցել: Չգիտեմ վեճի թեման ինչն է եղել, իրենք, որ գյուղում շատ չէին ապրում, բնակիչների հետ այդպես չէին էլ շփվում: Քաղաքում բիզնեսներ ունեին, գնում-գալիս էին»,- ասաց գյուղապետը: Վերջինիս տեղեկություններով՝ Տիգրան Մարտիրոսյանի եւ  Լիաննա Կիրակոսյանի երկու անչափահաս երեխաները գտնվում են մոր՝ Լիաննայի ծնողների տանը, ովքեր բնակվում են Վանաձորում: