Սարոյան ամուսինները

Հայկական քաղաքական-հասարակական տիրույթում Սարոյան եղբայրների սինդրոմի բազմակի դրսեւորումների ենք ականատես եղել, բայց որ այդ սինդրոմն առկա կլիներ նաեւ ամուսինների մեջ, դժվար էր պատկերացնելը: Ահավասիկ Նիկոլ Փաշինյան-Աննա Հակոբյան զույգը վերջին մեկ շաբաթում դրա վառ արտացոլումն են: Ամուսինը Արցախը հանձնելու փաստաթուղթ է ստորագրել, կինը շարունակում է մնալ դիրքերում, հորդորում է ուրիշներին էլ մնալ ու պահպանել: Իրար հաջորդելով, իրար հակասող գրառումներ են անում, մեկը պարտությունը դրեց հայ զինվորի, բանակի ուսերին, մեկն ասում է՝ բանակը կերտեց մեր հաղթանակը, սա արեց, նա արեց:

Փաշինյանի տիկին Աննա Հակոբյանը երեկ էլ հետեւյալ գրառումն է արել.<< Մեր բանակը, մեր զինվորը անհավասար ու անարդար պատերազմում կանգնեցին մինչեւ վերջ։ Նրանք միայնակ հերոսաբար կռվեցին մի քանի երկրի բանակների դեմ՝ դիմակայելով առջեւից թշնամու, թիկունքից թուլամորթների ու դավաճանների հարվածներին>>։
Տիկին եւ պարոն, մի հատ կողմնորոշվեք, հիմա բանակը կռվել է, թե չի կռվել, զինվորը փախել է առաջնագծից, թե չի պախել, հոգեկան ցնցումների մեջ եք, թե ազգի թույլ նյարդերով հատվածին եք ուզում այդ վիճակում դնել:

Աննա Հակոբյանը շարունակում է.<<2018-ին մենք անհավասար պայքարում հաղթեցինք պետության թալանչիներին, որպես քաղաքացի ուղղեցինք մեր մեջքը, որովհետեւ հավատացինք մեր հաղթանակին ու չընկրկեցինք նրանց դիզած միլիոնների ու ուժի առաջ։
Որպես պետություն եւ ժողովուրդ մենք կուղղենք մեր մեջքը եւ կհաղթենք ամբողջ աշխարհին միայն մի պարագայում, եթե մեկ մարդու նման հավատանք մեր հաղթանակին, հաղթահարենք մեր վախերը, արմատախիլ անենք մեր միջի դավաճաններին եւ չընկրկենք ոչ մի ուժի առաջ>>:

Դեռ հարց է նախկիններն են ավելի մեծ թալանչի, թե դուք, դեռ հարց է նախկիններն են 30 տարում ավելի շատ թալանել, քան դուք՝ երկուսուկես տարում, նախկիններն են ավելի մեծախոս, թե դուք՝ պոռոտախոս ու մեծամիտ, նախկիններն են բանակին նայել, թե դուք, ձեզ թվում է ելակ կերցնելով, պիտի ասեք բանակին լավ եք նայել, դուք ձեզ համար դրոշակ դարձած անգամ մայկա-տռուսիկի հարցը չեք կարողացել լուծել ու դա կփաստեն շատ շատերը: Անամոթներ, դուք ժառանգություն եք ստացել ծաղկող, բարգավաճող, մեծ ներդրումներով Արցախ,աշխարն անգամ իր զարմանքն էր հայտնում՝ ինչպես կարող է շրջափակված երկիրը այսպիսի զարգացում ապրել: Իսկ դուք այսօր ծաղկուն արցախն ավերակների վերածեցիք, այն հանձնեցիք ձեր բարեկամներին , ձեզ ճղեք էլ նախկիններն այդ տարածքը պահել են ու զարգացրել, հանձնել ու ավերել եք դուք, ու հիմա տհասների համար ելույթներ եք ունենում, թե նախկինները թալանել են, կեղեքել են: Հայաստանը տհասների երկիր չէ, գուցե ձեր պես երկու տոկոս տհաս լինի: Դուք եք խոսել դավադիրներից, դուք եք երկիրը պատերազմի տարել, դուք եք ասել Արցախը մարզ է, դուք եք Մեհրիբան Ալիեւային մուղամի ու չայ խմելու հրավիրել, վերջում էլ ձեր լափամանի ճաշով կերակրել զոմբի հանրությանն ու Արցախը հանձնել թուրքին:
Հիմա Աննա Հակոբյանն անամոթաբար կոչ է անում . << Մի՛ հրկիզեք ձեր տները։ Հայ ժողովուրդը պետք է իր տունը պաշտպանող լինի, ոչ թե՝ հրկիզող։
Մենք կհաղթահարենք մեր ներքին խնդիրները, կուղղենք մեր սխալները, եւ դուք կվերադառնաք ձեր տները։ Մենք դա կանենք բոլորս միասին, ամենօրյա քրտնաջան աշխատանքով այնքան, որքան պահանջվի։
Մենք որպես ժողովուրդ եւ պետություն կուղղենք մեր մեջքը։ Հայ ժողովուրդը այլեւս երբեք 1915 թիվ թույլ չի տալու, ամբողջ աշխարհի անտարբեր հայացքի ներքո չի ցեղասպանվելու>>։

Իսկ չի լինի դուք գնաք թուրքի հետ ապրեք, հատկապես, որ իրականություն դարձեցիք ձեր եւ ձեր տերերի վաղեմի երազանքները:

Անի Սահակյան