«Հոկտեմբերի 8-ին, երբ դեռ մարտերը գնում էին Հադրութի կողմը, արդեն մշակվել էր, որ Շուշին պիտի հանձնենք». Բագրատյան (video)

«Չի եղել այդպիսի աղետ մեր երկրի պատմության մեջ: 1992-1994 թվականներին Արցախի 4400 քառակուսի կմ-ին գումարվել է 8200 քառակուսի կմ, և Արցախի Հանրապետությունը դարձել է 12.600 քառակուսի կմ:Ստորագրվել է թուղթ, որով 12.600 քառակուսի կմ-ից 10.100-ը տրվում է թուրքերին, մնում է 2.500-ը: Նման ձևի 10.100 քառակուսի կմ-ն հանձնելն անընդունելի է: Այս հետքը երկու տարի առաջ երևում էր, երբ հարձակվում էր քաղաքական կուսակցությունների վրա, երբ հարձակվում էր ստրատեգիական դաշնակիցների վրա, նախկին զինվորականների: Այս տարի հոկտեմբերի 8-ին, երբ դեռ մարտերը գնում էին Հադրութի կողմը, արդեն մշակվել էր, որ Շուշին պիտի հանձնենք, հարավային կորպուսն ամբողջովին ջարդվեց»,- Ազատության հրապարակում հանրահավաքի ժամանակ ասաց ՀՀ նախկին վարչապետ Հրանտ Բագրատյանը:

«Չնայած այնտեղ, որտեղ քաջաբար տղաները կանգնած էին, կարող էին հակագրոհել, հետ բերել, բայց դա չէր թույլատրվում: Եվ արդեն Շուշին գրավելուց, նրանք գրավում էին, մենք հետ էինք գրավում, նորից տալիս էինք, նորից հետ էինք գրավում, և մեզ ասում էին՝ հետ եկեք, որովհետև հոկտեմբերի 8-ին արդեն Փաշինյանին ասվել էր՝ Ալիևն ուզում է բոլոր 7 շրջանները, դրան գումարած՝ Շուշին, գումարած՝ ինչ կհասցնի գրավել բուն Լեռնային Ղարաբաղից, մի բան էլ՝ ՀՀ-ից, կամ Ղազախի շրջանի գյուղերը, նաև հարավում Գորիսից Կապան գնացող ճանապարհը, էլ չեմ խոսում Մեղրիի միջանցքի մասին, որի մասով ասում են, որ ընդամենը ճանապարհ են տալիս: Սա անընդունելի բան է, սա արվում է նրա համար, որ ունենանք իբր թե զրոյական պրոբլեմներ Ադրբեջանի և Թուրքիայի հետ, և սորոսական, գրանտակեր մասսան այստեղ ծավալվի, այսպես ասած, սկսի դեմոկրատիա կառուցել: Մեզ տանում են նրան, որ Հայաստանը պետք է դառնա թուրքական վիլայեթ, ինչպես Վրաստանը: Մենք աղաչել ենք, որ սա ստորագրենք, որովհետև Ալիևն ասում էր՝ լրիվ եմ ուզում: Մենք խնդրել ենք սրա համար:

Եթե Փաշինյանը մնա իշխանության՝ վստա՞հ եք, որ վաղը Երևանը չի տալու: Ինչպե՞ս պետք է տանենք երկրի նախագահին, ով ասում է՝ ես տեղյակ չեմ: Սահմանադրությամբ, ղարաբաղցիների կյանքի պատասխանատուն է Արմեն Սարգսյանը»,- նշեց նա: