Կրեմլը հետևում է. Թուրքիայի ընդլայնման հող է նախապատրաստվում

Ադրբեջանի նախագահը հայտարարել է, որ իր երկրի դեմ ագրեսիայի դեպքում կարող է դիմել Թուրքիային ռազմական օգնության խնդրանքով: «Եթե Ադրբեջանը բախվի ագրեսիայի և Թուրքիայի ռազմական օգնության անհրաժեշտություն տեսնի, ապա մենք կդիտարկենք այդ տարբերակը», - BBC-ի հետ հարցազրույցում ասել է Իլհամ Ալիևը: Նրա խոսքով, «եթե իրավիճակը հետագայում էլ զարգանա ընթացիկ ձևով, ապա Թուրքիային դիմելու առիթ չի լինի»։

Արցախի դեմ շարունակվող թուրք-ադրբեջանական պատերազմում Թուրքիան ակտիվ ներգրավվածություն ունի, այս փաստն թերևս բացի Ադրբեջանից, որևէ այլ երկիր չի հերքում։

Ավելին, Էրդողանն անձամբ իր ելույթներում «հպարտանում» է Լեռնային Ղարաբաղում թուրքական ներկայության համար: Մի շարք երկրների՝ այդ թվում Ֆրանսիայի, Ռուսաստանի հատուկ ծառայությունների տվյալներով՝ Անկարան հարյուրավոր սիրիացի վարձկաններ է ուղարկել Ադրբեջան՝ Լեռնային Ղարաբաղի դեմ հարձակմանը ադրբեջանական բանակին աջակցելու նպատակով:

Այսինքն, Թուրքիայի ներգրավածությունն ամենացայտուն կերպով արդեն իսկ ակնհայտ է, հետևաբար հարց է ծագում, ի՞նչ նպատակով է Ալիևը «սպառնում»...

Այստեղ բացատրությունը շատ պարզ է. Թուրքիան իր մարիոնետ Ալիևի միջոցով հող է նախապատրաստում Թուրքիայի ազդեցության մեծացման ուղղությամբ: Այս մասին արդեն մեկ ամսից ավելի շարունակ քննարկում են ռուսական հեռուստաալիքներով ռուս քաղաքական գործիչներն ու փորձագետները:

Թուրքիային կանգնեցնելու հարցում միակ կարող ուժը նշվում է, որ Ռուսաստանն է, որն էլ ակնհայտորեն, դանդաղ է գործում, նախընտրելով առայժմ երկխոսել պաշտոնական Անկարայի հետ:

Սակայն այն, որ Էրդողանի «ախորժակը» մեծ է՝ գաղտնիք չէ որևէ մեկի համար:
Լեռնային Ղարաբաղում Հայաստանի դեմ ադրբեջանական բանակի ռազմական հաջողությունը նպաստավոր կլինի Բաքվի հետևում կանգնած Թուրքիայի համար, որը կարող է հետագա նվաճումների դիմել՝ թիրախավորելով ռուսական Ղրիմը: Այս հայտնել է Դոնեցկի Ժողովրդական Հանրապետության պաշտպանության նախկին նախարար Իգոր Ստրելկովը՝ YouTube-ի իր ալիքում խոսելով թուրքական հնարավոր էքսպանսիայի մասին, ըստ tert.am-ի՝ գրել է topcor.ru-ն։

Ըստ Ստրելկովի՝ Թուրքիայի գործողությունները դուրս են ԼՂՀ-ի և Անդրկովկասի սահմաններից. ադրբեջանական զորքերի հարձակումները թուրքերի համար լայն հնարավորություններ են ստեղծում իրենց ազդեցության ոլորտն ընդլայնելու համար՝ սպառնալիքներ ստեղծելով անմիջապես Ռուսաստանի համար։ «Թուրքիան մտնում է Անդրկովկաս և այնտեղից չի հեռանա։ Եթե հաղթեն Անդրկովկասում, թուրքերը իրենց առջև կդնեն հերթական խնդիրները, իսկ նրանք արդեն փաստացի չեն թաքցնում դրանք»,- հայտարարել Է ԴԺՀ պաշտպանության նախկին նախարարը:

Նրա խոսքով՝ Թուրքիան չի բավարարվի Լեռնային Ղարաբաղով, և Անկարայի հաջորդ նպատակը կարող է լինել Ղրիմը: Եթե ավելի վաղ Էրդողանի կուսակցության պատգամավորները ակնարկում էին, որ Ղրիմը պետք է թուրքերինը լինի, ապա այժմ նման հռետորաբանություն ունի նաև երկրի նախագահը։ «Էրդողանն արդեն խոսել է այն անարդար պայմանագրերի մասին, որոնց պատճառով «Ռուսաստանը Թուրքիայից խլել է Ղրիմը»»,- ընդգծել է փորձագետը:

Ստրելկովը նշել է, որ այդ կապակցությամբ կարևոր նշանակություն ունի Ուկրաինայի տարածքում թուրքական հարվածային դրոնների արտադրության վերաբերյալ Անկարայի և Կիևի միջև համաձայնությունը։

Այս օրերին քննարկվում է հնարավորություն, որ եթե թուրքական ազդեցությունը Հարավային Կովկասի միջոցով մեծանա, ապա ամենևին էլ չի կարելի բացառել, որ Ադրբեջանում հայտնվի Թուրքիայի ռազմաբազան: Կստացվի՝ ՆԱՏՕ-ի անդամ երկրի ռազմաբազա Հարավային Կովկասում:

Ռուսական շրջանակներից հնչող մտահոգություններն այսպիսով, կապված Էրդողանի «հեռահար» նպատակների հետ, դառնում են ավելի ու ավելի հաճախակի:

Մետաքսյա Շալունց