Սերժ Սարգսյանը վերադարձնում է թիմը

Սերժ Սարգսյանը Հովհաննես Հովսեփյանին կրկին նշանակել է Նախագահի վերահսկողական ծառայության ղեկավար, որտեղ նա պաշտոնավարում էր 2008-2016-ի մարտ, իսկ մարտին նշանակվեց ՊԵԿ ղեկավար, պաշտոնում մնաց մի քանի ամիս ու հեռացավ: Այսպիսով՝ ով է Հովհաննես Հովսեփյանը, որն արժանացել է նախագահի անվերապահ վստահությանը: Հովհաննես Հովսեփյանը արմատներով Տավուշի մարզի Իջեւանի տարածաշրջանի Վազաշեն գյուղից է։ Նա ծնվել է Իջեւան քաղաքում, միջնակարգ դպրոցն ավարտել Վանաձորում։ Դպրոցում սովորելուն զուգընթաց` 15 տարեկան հասակում աշխատանքի է անցել Վանաձորի մորթու-մուշտակի ֆաբրիկայում, եղել է խառատի աշակերտ, ապա առաջին կարգի խառատ: Ձեռք բերելով խորհրդային տարիներին պարտադիր համարվող 2 տարվա աշխատանքային ստաժը՝ դարձել է Երեւանի պետական համալսարանի իրավաբանական ֆակուլտետի ուսանող: 1996 թվականին աշխատանքի է անցել ՀՀ նախագահի աշխատակազմի իրավաբանական բաժնում` սկզբում զբաղեցնելով առաջին կարգի, ապա առաջատար մասնագետի պաշտոնները, հետո էլ նշանակվել պետաիրավական վարչության գլխավոր մասնագետի խորհրդատու: 2002-ին նշանակվել է ՀՀ նախագահի աշխատակազմի կադրերի վարչության պետի պաշտոնում: Չորս տարի նախագահի աշխատակազմում աշխատելուց հետո՝ 2006-ին, Հովսեփյանը հեռացել է նախագահականից Արտաշես Թումանյանի հետ ունեցած հակամարտության արդյունքում: 2007-ին դարձել է Հանրապետական կուսակցության անդամ եւ նույն տարվա փետրվարի 27-ին նշանակվել ՀՀ տարածքային կառավարման նախարար Հովիկ Աբրահամյանի խորհրդական, իսկ 2007-ի դեկտեմբերի 27-ից նշանակվել տարածքային կառավարման նախարարի տեղակալ եւ այս պաշտոնում մնացել մինչեւ 2008-ի մայիսի 26-ը: Հովսեփյանը կարելի է ասել նախկին վարչապետ Հովիկ Աբրահամյանի կադրն էր համարվում երկար տարիներ: Հովսեփյանին կառավարման համակարգ է մտցրել հենց Աբրահամյանը, նշանակել տվել տարածքային կառավարման նախարարի խորհրդական, աջակցել փոխնախարար նշանակվելու գործում, ավելի ճիշտ համատեղ անց կացնելով ընտրական հաջող կամպանիա Հովսեփյանին արժանին են մատուցել խորհրդականից փոխնախարար դարձնելով: Բայց տարիների ընթացքում Հովսեփյանը տեղավորվել է Սերժ Սարգսյանի շրջապատում: Հովհաննես Հովսեփյանը քաղաքական երկարամյա կարիերայի ընթացքում վաստակել է փորձառու եւ հավասարակշռված անձնավորության համբավ,տիրապետում է կառավարման հմտություններին,բայց հրապարակայնություն չի սիրում, այդուհանդերձ առաջին անգամ նշանակվելով վերահսկողական ծառայության պետ նա որոշակի կշիռ վերադարձրեց կառույցին՝ հանրայնացնելով մի քանի աղմկոտ չարաշահումների փաստերը: Հովսեփյանի անունը մի քանի անգամ շոշափվել է Արամի հասցեի բազմաբնակարանների հետ կապված, սակայն նրա կապն այնքանով է, որքանով նախագահը այդ սրված խնդիրը վերցրեց իր վերահսկողության ներքո, իսկ Հովսեփյանի անունն էլ շոշափվեց ի պաշտոնե, հիշենք նաեւ, որ ձերբակալություններ էլ եղան… Մի բան փաստ է, որ Հովսեփյանը կայացրեց վերահսկողական ծառայությունը, իր ազդեցությունը, դիրքն ունի, կառավարությունը այդ մարմնի նկատմամբ անկասկած զգոն է: 2016-ի մարտին Հովսեփյանը տեղափոխվեց գործադիր՝ զբաղեցնելով ՊԵԿ ղեկավարի պաշտոնը, որը մինչ այդ գործում էր ֆինանսների նախարարության հետ համատեղ ու ՀՀ ֆինանսական մուտքերն ու ելքերը տնօրինում էր մեկ մարդ՝ Գագիկ Խաչատրյանը: Հարկային-մաքսային վարչարարության արդյունքում կազմաքանդված տնտեսությունը պահելու խնդիր կար, ինչով պայմանավորված Սերժ Սագսյանը ՊԵԿ ղեկավար նշանակեց Հովսեփյանին, որը Գագիկ Խաչատրյանին հաջորդելով ռադիկալ քայլեր էր սկսել ոլորտի առողջացման հարցում, բայց երկար պաշտոնավարել չհաջողեց: Ամիսներ հետո նոր վարչապետ Կարեն Կարապետյանը այդ պաշտոնում ցանկացավ իր մարդուն տեսնել: Հովսեփյանը վերջին ընտրություններին կրկին ստանձնել էր կոորդինատորի դեր ու առանցքային դերակատարում:Նա շարունակում է մնալ իր նախագահի վստահելիների շարքում եւ հերթակա հատուցման ժամը, ահա, չուշացավ: Անի Սահակյան