Միայն Նիկոլ Փաշինյանն է հրաժարվել

Հայկական Ժամանակը գրում է.ՀՀ կենտրոնական ընտրական հանձնաժողովը Երեւանի ավագանու ընտրություններին մասնակցած քաղաքական ուժերից միայն մեկի ներկայացուցչի ինքնաբացարկի դիմումն է ստացել. խոսքը «Ելք» դաշինքի՝ Երևանի քաղաքապետի նախկին թեկնածու Նիկոլ Փաշինյանի մասին է: Այս մասին  ասաց ԿԸՀ նախագահ Տիգրան Մուկուչյանը: ԿԸՀ նախագահի խոսքով՝ Երեւանի ավագանու նիստը տեղի է ունենալու նախորդ ավագանու լիազորությունների դադարեցման օրը: Հանձնաժողովը Երեւանի ավագանու անդամների վկայականները կհանձնի միայն բողոքարկման վերջնաժամկետի ավարտից հետո: Նշենք, որ «Երկիր Ծիրանի» կուսակցությունը վարչական դատարանում բողոքարկում է մայիսի 14-ին կայացած ընտրության արդյունքներն անվավեր չճանաչելու մասին ԿԸՀ-ի որոշումը: Կուսակցությունը հանձնաժողովից պահանջել էր անվավեր ճանաչել ընտրությունների արդյունքները, սակայն նրանց դիմումը չէր բավարարվել: «Երկիր ծիրանի» կուսակցության նախագահ Զարուհի Փոստանջյանը երեկ «Ազատություն» ռադիոկայանի ուղիղ եթերում անդրադառնալով ավագանու մանդատները վերցնել-չվերցնելու հարցին, ասել էր հետեւյալը. «Կարծում եմ մենք ամենուր ենք լինելու: Դուք մեզ տեսնելու եք բոլոր վայրերում որտեղ կա առաջին գիծ, պայքարի գիծ, որտեղ մենք դասալիք չենք լինելու, որտեղ պետք է իրերն իրենց անունով կոչել, որտեղ պետք է քարկոծել, ես բառի բուն իմաստով չեմ ասում, փոխաբերական իմաստով եմ ասում, որտեղ մենք վերցրել ենք բարձունք, ապա այդ բարձունքից մենք այո, քարկոծելու ենք»: Վարչական դատարանից Զարուհի Փոստանջյանը որեւէ սպասելիք չունի, բայց միեւնույնն է դիմել է: Ստացվում է, որ Երեւանի ավագանու առաջին նիստին, որը նախատեսվում է հունիսի 9-ին, «Երկիր Ծիրանի» կուսակցությունը նույնպես կմասնակցի: Հիշեցնենք, որ Երեւանի ավագանու 65 հոգանոց կազմում 14-ը ներկայացնելու են «Ելք» դաշինքը, 46-ը՝ ՀՀԿ-ն եւ 5-ը` «Երկիր Ծիրանի» կուսակցությունը: Օրվա մյուս հրապարակումներին ծանոթացեք թերթի այս համարում: