Որն է ավելի մեծ խայտառակությունը

Պատերազմն էլ չսանձեց իշխանականների ցինիզմը: Իրենց ժողովրդավարության ռահվիրաներ հռչակածներից մեկը հաթաթա է տալիս մարդկանց, թե պատերազմն ավարտվի, նոր կզբաղվենք ձեզանով, մեկ ուրիշը նախկիններին է ծեփում ասֆալտին, երրորդն էլ մարդասիրական ու մարդասիրություն քարոզում: Իմ Քայլի պատգամավոր Վահագն Թեւոսյանը հանդես է եկել հետեւյալ գրառմամբ.<<ՄԱԿ-ի գրասենյակի դիմաց դագաղ դնելը խայտառակություն է:
Հրեա ժողովրդին Իսրայելի ղեկավարությունից չտարանջատելը խայտառակություն է:
Վիեննայի դեպքերի վրա չարախանդալը խայտառակություն է:
Մարդ լինել դադարելը խայտառակություն է>>:

Փաստորեն, կենդանի մարդկանց տների առջեւ դագաղներ դնելը, սեւ ժապավեններ կապելն ու ծաղկեպսակներ <<նվիրելը>> խայտառակություն չէ, իսկ ՄԱԿ-ի գրասենյակի դիմաց դագաղ դնելը խայտառակություն է: Ռուսաստանի եւ նրա ղեկավարի, ռուս ժողովրդի դեմ մինչ հեղափոխությունը նման ակցիաներ անելը խայտառակություն չէ, բայց հրեա ժողովրդին Իսրայելի ղեկավարությունից չտարանջատելը խայտառակություն է:
Եւ առհասարակ, ովքեր են խոսում խայտառակությունից, երբ իրենք իրենց գործունեությամբ խայտառակություն են: Խայտառակություն չէ՞ երկուսուկես տարի շարունակ հայտարարել, թե հետ են վերադարձրել պետությունից թալանած գումարը, Հայաստանը փողի խնդիր չունի, իսկ այսօր պարզվի, որ Հայաստանը սպառազինության, օդը պահելու լուրջ խնդիր ունի:

Երկուսուկես տարի հայտարարել, որ բանակցում են սեփական կետից, ու որ Ալիեւը կողմ է խնդրի լուծմանը, բայց հասնել պատերազմի:

Խայտառակություն չէ՞, երբ պատերազմական այս օրերին յուրաքանչյուր հայ իր ունեցվածքից մաս է հանում Համահայկական հիմնադրամին՝ պատերազմական կարիքները հոգալու նպատակով, սակայն պարզվում է իշխանության ուշքն ու միտքը սեփական գրպանները պարգեւավճարներով տռզացելն է: Արդեն հայտնի է, որ եկող տարվա բյուջեի նախագծում պարգեւավճարների ֆոնդը ոչ միայն պահպանվել է, այլեւ մեծացել 21 տոկոսով:

Խայտառակություն չէ, որ սոցապնախարարությունը Արցախից եկած փախստականների խնդիրների հանդեպ անգործության է մատնված, փոխարենը անհատ քաղաքացիներն են նրանցով զբաղվում:

Իսկ խայտառակություն չէ, որ Քաղպայմանագիրը կամավորականների ջոկատ են կազմում ու գնում Ստեփանակերտի բունկերներում ժամանակ անցկացնում, առաջին տիկինն էլ խնամված, վարսահարդարված շրջագայում է Արցախում եւ հրահանգավորում գեներալիտետին: Այն, որ նա կանանց ջոկատ է կազմել ու տուրիստական շրջագայություններ է իրականացնում սահմանամերձ գոտիներում:

Խայտառակություն չէ՞, երբ սահման պահող պայմանագրային զինծառայողների աշխատավարձերն այս օրերին կրճատվել է, բայց պատերազմական իրավիճակից ելնելով նրանք չեն բարձրաձայնում, իսկ այս ընթացքում իշխանության ուշադրությունը միայն սեփական կարիքներն են:

Անի Սահակյան