Մեծ առավելություն է, երբ ՌԴ-ից ռազմական տեխնիկա են ձեռք բերում ներքին գներով.Լևոն Այվազյան

Ռուսաստանի հետ Հայաստանն ունի գործակցային տարբեր ծրագրեր, որոնցից մեկը միջպետական վարկի շրջանակում Հայաստան ներկրվող սպառազինությունն ու ռազմական տեխնիկան է։ ՀՀ ՊՆ պաշտպանական քաղաքականության վարչության պետ Լևոն Այվազյանի խոսքով` այն իրականացվում է ըստ սահմանված ժամանակացույցի։ Լրագրողնրի հետ հանդիպմանը,նա հայտնեց,որ  Հայաստան-Ռուսաստան 200 մլն միջպետական վարկի շրջանակներում սպառազինության մատակարարումը իրականացվում է առանց ուշացումների, նույնիսկ որոշ զինատեսակների մատակարարումը կատարվում է ժամանակից շուտ: «Հայ-ռուսական ռազմատեխնիկական համագործակցությունը տեղի է ունենում ինչպես միջպետական վարկի, այնպես էլ՝ երկկողմ համագործակցության շրջանակներում։Դա երկու պետությունների Պաշտպանության նախարարությունների միջև ռազմատեխնիկական համագործակցությունն է, որը նույնպես ենթադրում է սպառազինության տեսակների ներկրումներ, ռազմարդյունաբերական ձեռնարկությունների համագործակցություն և այլն։ Մենք ՌԴ-ի հետ ունենք հատուկ համաձայնագրեր, որոնք մեզ թույլ են տալիս ռազմատեխնիկական ոլորտում համագործակցություն իրականացնել հատուկ պայմաններով։ ՌԴ-ից կարողանում ենք դրանք ձեռք բերել ներքին գներով։ Այսինքն նույն գները, որոնք գործում են ռուսական բանակի համար, գործում են նաև հայկական բանակի համար», - ասաց Լևոն Այվազյանը։ Լևոն Այվազյանը շեշտեց` դա մեծ առավելություն և յուրահատուկ արտոնություն է, որը հնարավոր է դարձել իրականացնել ռուս դաշնակիցների հետ։