Ռուսական վարկածով՝ «թուրք սուլթանը ռևանշի է դիմել». սպասենք Պուտինի արձագանքին, Իրանն արդեն բանագնաց է ուղարկում

Այսօր առավոտյան ՀՀ Պաշտպանության նախարարության մամուլի քարտուղարը հայտնեց, որ ժամը 10:00-10:15 սահմաններում, հերթական անգամ խախտելով հրադադարի ռեժիմը, ադրբեջանական կողմը անօդաչուներով (որոնցից մեկը ընկել է Հայաստանի տարածքում) և հրթիռահրետանային միջոցներով հրետակոծել է ՀՀ հարավային սահմանի Իրանի հետ հատման կետի հայկական սահմանապահ ուղեկալի դիրքերը: «Արձանագրելով հրադադարի ռեժիմի հերթական խախտումը և ՀՀ պետական սահմանի հրետակոծությունը, ՀՀ պաշտպանության նախարարությունը հայտարարում է, որ ստիպված է լինելու պատասխան հարվածներ հասցնել ադրբեջանական ուժերի ուղղությամբ», - գրում է Շուշան Ստեփանյանը: Քիչ անց նա հաղորդեց, որ ՀՀ հարավային սահմանի ուղղությամբ հակառակորդի ձեռնարկած ոտնձգության հետևանքով զոհեր և վիրավորներ չկան և «Հայկական կողմն արդեն իսկ դիմել է պատասխան գործողությունների»:

Այնուհետև Պաշտպանության նախարարության մամուլի քարտուղարը հաղորդեց, որ հակառակորդը շարունակել է կրակ վարել ՀՀ հարավային սահմանի ուղղությամբ, կան վիրավորներ: Հայաստանի հարավային ուղղությամբ ադրբեջանական ոտնձգությունները կանխելու նպատակով ՀՀ սահմանապահ ուժերը դիմել են կանխարգելիչ գործողությունների` հակառակորդին պատճառելով զգալի վնասներ և կորուստներ, հաղորդում է Պաշտպանության նախարարության խոսնակը: «Հակառակորդը սահմանի տվյալ հատվածում օգտագործում է անօդաչու թռչող սարքեր», - գրել էր Շուշան Ստեփանյանը:

ՀՀ պաշտպանության նախարար Դավիթ Տոնոյանն այսօր հրամանատարական կազմի հետ քննարկել է ՀՀ հարավային սահմանում առկա օպերատիվ իրադրությունը և առաջիկա քայլերն ու խնդիրները: «Բոլոր շարժերը մեր կողմից ֆիքսվում է, չունենք անձնակազմի կորուստներ, չունենք մարդկային ոչ մի կորուստ, տեխնիկայի կորուստներ: Իրավիճակն, ընդհանուր առմամբ, շփման գծում մեր կողմից վերահսկելի է:

ՀՀ զինված ուժերը, մեր անձնակազմը պատրաստ է ցանկացած վայրկյանի, երբ հակառակորդը փորձի պետական սահմանը խախտել, առկա բոլոր ուժերով կհասնենք հուժկու հարված և կկիրառենք զինանոցում գտնվող բոլոր զենքի տեսակները»,-ասել է ՀՀ ՊՆ ներկայացուցիչը: Նաև նշվել է. «Գիտենք իրենց բոլոր կրակային դիրքերի տեղերը: Եթե հանկարծակի կրկնվեց, սաղ խոցելու ենք, ջարդելու ենք: Հակառակորդի ոտնձգությունը չենք թողնելու»:

Արձանագրելով հրադադարի ռեժիմի հերթական խախտումը և ՀՀ պետական սահմանի հրետակոծությունը, ՀՀ պաշտպանության նախարարությունը հայտարարեց, որ ստիպված է լինելու պատասխան հարվածներ հասցնել ադրբեջանական ուժերի ուղղությամբ:

Մեկ ամիս լայնածավալ պատերազմի արդյունքներից դժգոհ Էրդողանն ու Ալիևը որոշել են Հայաստանի նկատմամբ հոգեբանական ճնշում իրականացնել՝ ցույց տալով, թե հաջորդ թիրախը՝ Հայաստանի սահմաններն են:

Ռուսական շրջանակների գնահատականներին, անշուշտ հետաքրքիր կլինի այսօր հետևել: Ռուս ռազմական լրագրող Սեմյոն Պեգովն իր WarGonzo-ի տելեգրամի էջում օրինակ արդեն իսկ կարծիք է նետել, թե՝ «Էրդողանի հատուկ ջոկատայինները պատրաստվում են Հայաստան ներխուժել»: Պեգովը այդ մասին նշել է՝ հղում անելով WarGonzo-ի՝ Ստամբուլի աղբյուրներին: Ավելին, Սեմյոն Պեգովը, կարծես, ներկայացնում է դրա պատճառը, թե ինչու է այսօր նման բան տեղի ունեցել ՀՀ հարավային սահմանի Իրանի հետ հատման կետում: Ըստ ռազմական լրագրողների՝ տեղեկությունները, որ երեկ ՌԴ օդատիեզերական ուժերը հուժկու հարված էին հասցրել Սիրիայի հյուսիսում Թուրքիայի աջակցությունը վայելող գրոհայիններին, «զայրացրել են Էրդողանին» և «թուրք սուլթանը ռևանշի է դիմել՝ հարձակում գործելով Հայաստանի հարավում»:
Ռուսական կողմին՝ Հայաստանին չօգնելու քաղաքականությունը արդարացնելուն ուղղված քա՞յլ է արդյոք ռուս ռազմական լրագրողի դատողությունը, թե՞ իրականություն՝ ցույց կտա ժամանակը:

Հիշեցնենք, երեկ մի շարք լրատվամիջոցներ հաղորդեցին, որ Ռուսաստանի օդատիեզերական ուժերը հուժկու հարված են հասցրել Սիրիայի հյուսիսում Թուրքիայի աջակցությունը վայելող գրոհայիններին։ Տարբեր լրատվամիջոցներ հայտնեցին, որ ռուսական ռազմական ինքնաթիռները ոչնչացրել են Իդլիբի նահանգում գտնվող գրոհայինների ճամբարը։ Տարբեր աղբյուրներ հայտնում են, որ Ռուսաստանի ՕՏՈւ–ի հասցրած հարվածից զոհվել և վիրավորվել է ավելի քան 100 գրոհային, իսկ նրանց մարզական ճամբարն ամբողջովին ոչնչացված է։

Մի բան պարզ է՝ Ռուսաստանն արդեն առավել հստակ պետք է լինի: Հայաստանի սահմանին այսօր առավոտյան տեղի ունեցածը պահանջում է արդեն կոնկրետ արձագանք և գործողություն Մոսկվայից: Եթե մինչ այժմ ՌԴ-ից նշում էին, թե պատերազմը Հայաստանի սահմանին չի ընթանում, ՌԴ-ն չի կարող ներգրավել, ապա այսօր Հայաստանի սահմանին տեղի ունեցածը չի կարելի ոչ մի կերպ անտեսել:
Հարևան Իրանն իր հերթին բավական անհանգստացած է:

Այսօր ռուսաստանյան «ՌԻԱ Նովոստի» լրատվական գործակալությունը հայտնել է, որ Իրանի նախագահի հատուկ բանագնացը կայցելի Մոսկվա, Երևան և Բաքու: Իսկ Իրանի ԱԳՆ քաղաքական հարցերով փոխնախարար Աբբաս Արաղչին ժամանել է Արդեբիլ նահանգի Փարսաբադ Մողան օդանավակայան՝ այցելելով Հայաստանին ու Ադրբեջանին սահմանակից տարածքներ, հայտնել է IRNA-ն։ Իրանցի պաշտոնյան հակամարտող կողմերին կոչ է արել և նախազգուշացրել՝ հրետանային հարվածներ չհասցնել իրանական ջրամբարներին ու էլեկտրակայաններին։ Արաղչին ասել է, որ Արաքս գետի երկայնքով Իրանն ունի ջրամբարներ ու էլեկտրակայաններ, ուր ևս պատրաստվում է այցելել։ Նա հավելել է, որ դրանք առաջնային նշանակություն ունեն Իրանի համար և չպետք է վնասվեն երկու հարևանների հակամարտության ընթացքում։

Մետաքսյա Շալունց