Աթոռն ընդամենը կահույքի բաղկացուցիչ մաս է ինձ համար. Արփինե Հովհաննիսյան
ԱԺ փոխնախագահ, արդարադատության նախկին նախարար Արփինե Հովհաննիսյանը Հանրային հեռուստաընկերության «Օրակարգից դուրս» հաղորդման եթերում հայտարարել է, որ աթոռն ընդամենը կահույքի բաղկացուցիչ մաս է իրեն համար: «Եթե շատերի համար նման պաշտոն զբաղեցնելը կարող է թռիչքային, հեղափոխական և այլ ձևերով հորջորջվել, ես հակված եմ համարելու, որ այդ ճանապարհն ավելի շատ էվոլյուցիոն, քան ռևոլյուցիոն է»,- նշել է Արփինե Հովհաննիսյանը: Նա նշել է, որ հաջորդ տարվա հունվարին կլրանա իր աշխատանքային գործունեության 15 տարին. 2003 թ. նշանակվել է Արդարադատության նախարարության դատաիրավական բարեփոխումների վարչության քրեակատարողական բարեփոխումների առաջին կարգի մասնագետ: Դա ինչպես այն ժամանակ, այնպես էլ հիմա համարվում է պետական ծառայության համակարգի ամենաստորին օղակը, որտեղից, իր խոսքով, սկսել է իր առաջին քայլերը: ԱԺ փոխնախագահը աշխատանքից դուրս, իր խոսքով, պարզապես Արփինե Հովհաննիսյան է: Երբեմն խմորեղեն է պատրաստում մայրիկի բաղադրատոմսով: Սիրում է թեյ, իրավաբանություն, գիրք կարդալ, իր ուսանողներին, ընկերներին։ Իսկ այն հարցին, թե ո՞ւմ է սիրում Արփինե Հովհաննիսյանը, նա պատասխանեց. «Կիմանաք, հաջորդիվ, այս պահին խոսում էինք այլ ձևաչափով, կխոսենք շուտով՝ բոլորովին այլ ձևաչափով»:
Հետևեք մեզ Viber-ում
