Արայիկ Հարությունյանի կանխազգացումները. նա հասկացավ` ուր հասանք

Այս հանգամանքներում, երբ լրատվամիջոցներն աշխատում են սահմանափակման ռեժիմով եւ զրկված են ռազմաճակատի, զորքի տեղաշարժի, կորուստների ու ձեռքբերումների, առհսարակ, ցանկացած տեղեկատվություն քննարկելուց, մարդիկ իրար կողք դնելով Արայիկ Հարությունյանի այս օրերի հայտարարությունները կարող են հասկանալ, թե ինչ իրավիճակ է ռազմաճակատում:

Պատերազմի մեկնարկին Արայիկ Հարությունյանը մատ թափ տալով ասում էր՝ «Պատերազմ եք ուզում, կստանաք»: Երկու օր անց հայտարարեց, որ մենք չենք խնդրելու զինադադար, այլ պարտադրելու ենք: Սպտեմբերի 30-ին հերթական ասուլիսում պատասխանելով լրագրողի հարցին, թե ապրիլյան պատերազմի ժամանակ հնարավոր եղավ ռուսական կողմի միջնորդությամբ 3-4 օր հետո հրադադար կնքել, արդյոք հիմա տեսնում է ազդակ երրորդ երկրների կողմից, որ հրադարար կարող է առաջիկա օրերին հաստատվել, Արցախի նախագահը պատասխանեց. «Այն ժամանակ կռվում էր Արցախն Ադրբեջանի դեմ, և ռուսն ի վիճակի էր «համոզելու» Ադրբեջանին և խնդրելու Հայաստանին զինադադարի առումով, այսօր պիտի խոսի Հայաստանի ու Թուրքիայի հետ` Էրդողանի հետ, ես չգիտեմ` ինչքանով է պատրաստ ռուսական իշխանությունը խոսելու Թուրքիայի ղեկավարության հետ»:  Այդուհանդերձ հայտարարեց. «Պատերազմն ավարտվելու է Ադրբեջանի պարտությամբ կամ լավագույն դեպքում ոչ հաղթանակով, հետևանքները` հազարավոր կամ տասնյակ հազարավոր զոհեր, բազմակի անգամ ավելի վիրավորներ իրենց կողմից»:

Ըստ նրա` նաև Ադրբեջանի տնտեսությունն է ճգնաժամի առաջ կանգնելու, սոցիալական լուրջ խնդիրներ է ունենալու ադրբեջանական հասարակությունը: «Իսկ նավթի պաշարները նվազում են, ֆինանսական պահուստները վերջանում են, իհարկե, հասկանում ենք, որ պետք է արդարացնեն ժամանակի ընթացքում փոշիացրած միլիարդները», - ասաց Արայիկ Հարությունյանը:

Ադրբեջանի պարտությունը կանխատեսելուց բացի նույն օրը նա հայտարարեց, որ շուտով ազգը կիմանա նաեւ ներքին դավաճաններին: «Աշխարհում խաղաղություն ամենաշատը ուզում են արցախցիները, բայց մենք նաև չենք կարող պարտադիր պայման ընդունել մի երկրից, որի նպատակն է բնաջնջել Արցախի պատմությունը, ժողովրդին»,-հոկտեմբերի 11-ին կայացած մամլո ասուլիսի ժամանակ ասաց Արցախի նախագահը, ըստ էության, պարզ դարձնելով, որ Ադրբեջանը պայմաններ է թելադրում, այդուհանդերձ չընկրկեց. «Հայտարարելու եմ հայրենական պատերազմ, և կոչ եմ անելու բոլոր հայերին՝ նյութական ու ցանկության դեպքում ֆիզիկական մասնակցություն ունենալ։ Եթե երկարատև պատերազմ են ուզելու, մենք չենք հրաժարվելու»: Երեկ արդեն Արայիկ Հարությունյանը մեկ օրվա ըթացքում երկու ուղերձ ունեցավ՝ արձանագրելով՝ հումանիտար հրադադարի պայմանավորվածությունն այդպես էլ չի պահպանվում, հակառակը՝ «հակառակորդին հաջողվել է ինչ-որ տեղ մխրճվել, ինչ-որ տեղ ունենալ առավելություններ և օր օրի ճակատը տեղափոխել ավելի խոր տարածքներ»:

Ուստի պահն օրհասական է այսօր, «Հայրենիքը պահելու և չպահելու, պատվով ապրելու՝ անպատիվ կյանքով ապրելու իրավունքից հրաժարվելու փոխարեն: Պետք է շարունակենք պատվով ապրել, դրա համար կոչ եմ անում ոչ միայն նյութական, նաև ֆիզիկական մասնակցության, մենք դրա կարիքը զգում ենք: Մենք հաղթելու ենք»:

Անի Սահակյան