Իսկ Աննա Հակոբյանը իր ասածի տակից դուրս գալու է՞

Ռազմական դրության իրավական ռեժիմի նախօրեի խստացումներից հետո էլ իշխանության ներկայացուցիչները չեն դադարում ազգի միասնականությունը խաթարող հայտարարություններ անե: Սա մեղմ է ասած, նրանք նույնիսկ սպառնում են քաղաքական այլախոհներին նախկին եւ մեր օրերի հայտարարությունների համար: Չնայած պատերազմի առաջին օրերից ընդդիմությունն աննախադեպ միասնականություն է դրսեւորում, լրատվամիջոցները չեն շեղվում իշխանության հաստատած կանոններից, բայց իրավապահները շարունակում են ընդդիմախոսներին եւ ոչ յուրային լրատվամիջոցներին իսպառ լռեցնելու փորձերը:

Մարդկանց կանչում, բացատրագիր են պահանջում, կամ էլ հորդորում հեռացնել գրառումը՝մոռանալով, թե ինչ էին անում այսօրվա իշխանավորները ապրիլյան պատերազմի օրերին եւ այսօր: Ինչպիսի դեզինֆորմացիա հրամցվեց, թե զինվորը զենք չի ունեցել կռվելու, սոված են եղել, վառելիքի փոխարեն ջուր է եղել զինտեխնիկայում, որ պատերազմը պայմանավորված է եղել եւ այսպես շարունակ: Այդ ամենը մոռացել են, եւ հիմա տեսնում ենք հավատաքնչությամբ են զբաղված, իսկ լիդերությանն էլ հավակնում է իմքայլական պատգամավոր Անդրանիկ Քոչարյանը, ով մեկ նախկին նախագահների մասին է ճամարտակում, մեկ ընդդիմադիրների՝ իբր ինքը մտահոգված է հայրենիք, պետություն պահպանելու վեհ գաղափարով, իսկ մյուսները դավաճաններ են: Այս մարդը մոռացել է, որ իր ղեկավարությամբ քաղաքական ղեկավարությունը մեկ տարի շարունակ ապրիլյան պատերազմի քննիչ հանձնաժողովի շրջանակում
զբաղված էին հերոսնեին վարկաբեկելու, ամեն բան ոտնատակ տալու, արժեզրկելու, ստեր տարածելու գործով:

Ցավալին այն է, որ հիմա էլ շարունակում է նույն առաքելությունը նախկինների դեմ, իհարկե, ձեռքի հետ էլ իրենց գրանտակերներից մեկին է կպնում անաչառության պատրանք ստեղծելու համար, բայց տողատակերն, անշուշտ, հասկանալի է: Այսպիսով՝ մի կողմից հայտարարում են, որ վերջին խստացումները հարկավոր են խուճապային տրամադրությունների իսպառ բացառման, անկումային տրամադրությունների կանխման, միասնականության եւ այլնի համար, մյուս կողմից չեն ասում, թե ով է այսքան ժամանակ նման հայտարարություններ արել, դավաճաններ որոնելու պառակտիչ հայտարարություն արել, զորքի թվաքանակի, շարժի մասին գաղտնիքներ հայտնել: Փոխարենը՝ Անդրանիկ Քոչարյանը նոր թիրախ է ընտրել՝ ի դեմս նախկին վարչապետ Հրանտ Բագրատյան, բայց մինչ նրան հասնելը, անդրադարձավ Դանիել Իոննիսյանին, ով զրահաբաճկոնների եւ սաղավարտների անհրաժեշտության մասին էր հայտնել:

«Դա խայտառակություն է, դա շատ նման էր Հրանտ Բագրատյանի և մյուսների այն տեսակետներին, որ Ալիևի տեղը լինեի հիմա կհարձակվեի Հայաստանի վրա։ Հիմա շատ արդարացի շատերն ասում են՝ Հրանտ Բագրատյան, դու դա որ ասեցիր, դրա պատասխանատվությունը, դրա տակից դուրս գալու ես թե չէ։ Վերջին հաշվով պատերազմի ժամանակ հակառակորդը օգտագործում է բոլոր հնարքները»։

Հետաքրքիր է՝ իսկ ինչու Անդրանիկ Քոչարյանը չի հիշում վարչապետի տիկին Աննա Հակոբյանի կոչերը,պատերազմից ընդամենը մեկ ամիս առաջ տիկինը «ռազմահայրենասիրական և գերմարտական» լուսանկարներ էր տարածում եւ զենք վերցնելու քարոզ անում, երբ ընդամենը մի քանի օր առաջ քարոզում էր խաղաղություն: Միթե մի բան գիտեր:

Անի Սահակյան