Պուտինն իր ծննդյան օրն անդրադարձավ Արցախի շուրջ ողբերգությանը՝ պատերազմի 10-րդ օրը

Վերջապես, Արցախում թուրք-ադրբեջանական տանդեմի սանձազերծած պատերազմի 10-րդ օրը ուղիղ խոսեց լայնածավալ պատերազմի մասին:

Ռուսաստանի նախագահ Վլադիմիր Պուտինը ողբերգություն է որակել Լեռնային Ղարաբաղի իրադարձությունները: «Լեռնային Ղարաբաղի իրադարձությունները ողբերգություն են», - ասել է նա: Պուտինը նշել է, որ Ռուսաստանը մտահոգված է և կոչ է անում հնարավորինս շուտ դադարեցնել կրակը Ղարաբաղում: Նրա խոսքով՝ մարդիկ մահանում են, Մոսկվան հույս ունի, որ հակամարտությունը կավարտվի մոտ ժամանակներս: «Մենք հորդորում ենք, և ես ցանկանում եմ դա նորից ասել, մենք կոչ ենք անում կրակը դադարեցնել, և դա պետք է արվի հնարավորինս շուտ», - ասել է նա «Ռոսիա 24» հեռուստաալիքին տված հարցազրույցում:

Նա մեկ-երկու ուշագրավ ակնարկներ էլ արեց՝ Հայաստանի իշխանությունը Ռուսաստանի ստանձնած պարտավորությունների հարց չի բարձրացնում, իսկ Ռուսաստանը պատրաս է կատարել իր պարտավորությունները, եթե ընդդեմ Հայաստանի խնդիրներ ծագեն: Նա նաև փաստեց, որ Փաշինյանի հետ մշտական կապի մեջ է:

Այսպես, Ռուսաստանի նախագահն, առաջին անգամ, ի դեպ՝ իր ծննդյան օրը, անդրադարձավ Արցախի շուրջ ստեղծված իրավիճակին: Սա փոխում է դասավորությունը հակամարտության շուրջ: Հստակ արձանագրվեց, որ
Ռուսաստանի հարևաններից շատերի մոտ իրավիճակը սրվում է, բայց դա չի նշանակում, որ Մոսկվայի շուրջ «օղակը սեղմվում է»: Այդ կարծիքը նախօրեին հայտնել է ՌԴ նախագահի մամլո խոսնակ Դմիտրի Պեսկովը:

«Իհարկե, կա կոնֆլիկտային որոշակի ներուժ: Դա իսկապես այդպես է, բայց ոչ մի «օղակ» չի սեղմվում», - ասել է Կրեմլի խոսնակը: Պեսկովի փոխանցմամբ, հակամարտությունների սրացման միտումը, դժբախտաբար, նկատելի է ամբողջ աշխարհում: «Ցավալի է, որ կոնֆլիկտային ներուժի մի մասը կուտակվում է մեր սահմանների շուրջ, խոսքը մեզ համար մոտիկ երկրների մասին է, ես նախևառաջ նկատի ունեմ Բելառուսը, Հայաստանը, Ադրբեջանը և Ղրղըզստանը», - նշել է Պեսկովը: Նրա փոխանցմամբ՝ Ռուսաստանը շահագրգռված է, որ հարևան երկրներում կայունություն, խաղաղություն և բարգավաճում հաստատվի:

Մինչդեռ Ռուսաստանի արտաքին հետախուզական ծառայության ղեկավար Սերգեյ Նարիշկինը երեկ ավելի հստակ է եղել իր գնահատականներում:

Մոսկվան մտահոգված է լարվածության աճով Լեռնային Ղարաբաղի շուրջ: Ռուսաստանի համար` որպես ԵԱՀԿ Մինսկի խմբի համանախագահ, նոր պատերազմը տարածաշրջանում անընդունելի է: Մենք ոչ պակաս մտահոգված ենք նաև առ այն, որ ռազմական գործողությունների ընթացքում զոհվում են հայ և ադրբեջանցի բարեկամ ժողովուրդների ներկայացուցիչները:

Ըստ Սերգեյ Նարիշկինի՝ Լեռնային Ղարաբաղի շփման գծում բախումներ նախկինում ևս եղել են: «Իրավիճակի ներկայիս սրումն անհանգստություն է առաջացնում ոչ միայն իր մասշտաբով, այլև արտաքին գործոնների հիմնովին նոր ազդեցությամբ: Ադրբեջանի կողմում այդքան բացահայտ և միանշանակ կերպով հանդես է եկել Թուրքիան: Բացի այդ, Ղարաբաղում սրվող զինված դիմակայությունը մագնիսի պես ձգում է զինյալներին տարբեր միջազգային ահաբեկչական կառույցներից»:

Ռուսաստանի արտաքին հետախուզական ծառայության տվյալներով` հակամարտության գոտի են ակտիվորեն տեղափոխվում Մերձավոր Արևելքում կռվող միջազգային ահաբեկչական կազմակերպությունների, մասնավորապես` «Ջաբհաթ ալ-Նուսրա», «Ֆիրկաթ Համզա», «Սուլթան Մուրադ», ինչպես նաև ծայրահեղական քրդական խմբավորումների վարձկանները: Ընդ որում, խոսքը հարյուրավոր և նույնիսկ հազարավոր արմատականների մասին է, որոնք հույս ունեն գումար աշխատել ղարաբաղյան նոր պատերազմի հաշվին:

Կասկած չունենք, որ միջազգային հանրության օժանդակությամբ հակամարտության կողմերը, ի վերջո, կդադարեն ուժի գործադրել և կնստեն բանակցությունների սեղանի շուրջ: Այնուամենայնիվ, մենք չենք կարող չմտահոգվել, որ Անդրկովկասն կարող է նոր պլացդարմ դառնալ միջազգային ահաբեկչական կազմակերպությունների համար, որտեղից զինյալները հետագայում կարող են ներթափանցել Ադրբեջանին և Հայաստանին հարող պետություններ, այդ թվում`Ռուսաստան:

Այսպես, Սերգեյ Նարիշկինի գնահատականները ենթադրում է, որ Ռուսաստանի կողմից քայլեր լինեն: Հարցը բաց է մնում, թե՝ երբ: Ամեն դեպքում Սերգեյ Նարիշկինը, կարծես հող է նախապատրաստում Ռուսաստանի ավելի ակտիվ ներգրավման հնարավորության համար:

Բոլոր հիմքերը կան, բոլոր մեկնաբանություններն արված են Մոսկվայից: Պուտինը կարծես վերջին նախազգուշացրումն արեց: Գնդակը, ինչպես ասում են՝ Էրդողանի դաշտում է:

Հիմա Էրդողանը պետք է որոշում կայացնի՝ շարունակո՞ւմ է պատերազմել Արցախի համար՝ վերջնականապես հատելով Պուտինի համբերության սահմանները, թե՞ դադարացնելու է իր սանձազերծած պատերազմը չշահելով ոչ մի օգուտ:

Մետաքսյա Շալունց