Հարավարևելյան հատվածում վերադարձրել ենք կարևոր դիրքեր, մնացել է վերադարձնենք մեկը. պահեստազորի գնդապետ
hayeli.am-ը զրուցել է պահեստազորի գնդապետ, ազատամարտիկ Վոլոդյա Հովհաննիսյանի հետ, ով այս պահին գտնվում է Արցախի հարավարևելյան սահմանագծում: Վերջինս ներկայացրել է այդ հատվածում տիրող իրավիճակը.
- Երեկվանից մարտական գործողություններ ենք իրականացնում, մեր զինվորներն ու սպաներն, անցնելով հակահարձակման, վերադարձրել են պատերազմի առաջին օրերին կորցրած դիրքերը: Այս հատվածում մենք ամենամեծ կորուստներն ունեինք, բայց, շնորհիվ մեր մարտական գործողությունների, մնացել է կորցրած մեկ դիրք վերադարձնենք, որը ևս ռազմավարական նշանակություն ունի:
Ինչպե՞ս են տրամադրված զինվորները:
- Մեր զինվորների տրամադրվածությամբ ուղղակի հիացած եմ՝ աննահանջ, անկոտրուն: Պատկերացնում ե՞ք՝ 10 հոգով կռվել են, ճեղքելով հակառակորդին ու վերադարձնելով մեր դիրքերը: Հենց հիմա մեր դիրքերի մոտ ընկած են հակառակորդի զրահամեքենաները, տանկերը, նրանց զինվորների դիերը: ԱԻՆ-ի հետ հրաշալի աշխատում ենք, կառավարման համակարգը գործում է անխափան, ամեն ինչ նորմալ է:
Հայաստանից կամավորները օգնություններ են ուղարկում՝առաջին անհրաժեշտության իրեր, սնունդ: Ընդհանրապես՝ ինչի՞ կարիք ունեն մեր զինվորները:
- Մեզ օգնություն դեռ չի հասել: Իրականում ամեն ինչի կարիք էլ ունեն էս պահին մեր տղաները, բայց ամենակարևորը՝ քնելու կարիք ունենք: Երեկ հերթապահել ենք «Սիսական» ջոկատի տղաներով, որպեսզի մեր զինվորները կարողանան մի քիչ քնել: Վերջին հինգ օրվա մեջ առաջին անգամ մեր զինվորները կարողացել են երեկ գիշերը քնել:
Այսօր հաղորդվեց, որ պատերազմի սկսելու օրվանից առաջին անգամ գիշերը շփման գծում տիրել է հարաբերական անդորր:
-Գիշերը շփման գծում իսկապես համեմատաբար հանդարտ էր: Հրազենային զենքերից եղել են կրակոցներ, բայց արդեն այսօր առավոտյան ժամը 10-ից հակառակորդը նորից կրակ է բաց թողել: Հենց հիմա հզոր հրետանային կռիվ է ընթանում, մեր հրետանավորները շատ դիպուկ են: Անուններ չեմ տա այս պահին, սակայն կասեմ՝ այստեղ հրաշալի ղեկավարում է ընթանում և մեր զինվորներին շատ ոգևորեց փորձված զինվորականների, երկրապահի մուտքը սահման:
Թշնամին շատ մարդկային կորուստներ է՞ կրել:
- Այո՛, մեր զինվորները կարողացել են շարքից հանել ոչ միայն տասնյակներով զինտեխնիկա, այլև թշնամուն պատճառել են հարյուրավոր, եթե ոչ հազարավոր մարդկային կորուստներ:
Այդ զինտեխնիկայի կորուստը, որը կրում է թշնամին, հնարավոր է՞ վերականգնել և մեր կողմից այն կիրառել:
-Մեզանում կա վիրավորում ստացած մի սպա, բազմափորձ տանկիստ, որը նշում է, որ մենք կարող ենք որոշակի տանկեր վերականգնել ու կիրառել հակառակորդի դեմ:
Հետևեք մեզ Viber-ում
