Ի՞նչ «փոխզիջում», այ ընկեր...

Հայաստանի ԱԳ նախարար Զոհրաբ Մնացականյանը հարցազրույց է տվել ֆրանսիական France 24 լրատվականին:

Նա, մի կողմից արձանագրում է, որ Լեռնային Ղարաբաղի պաշտպանական զորքերը, Հայաստանի Հանրապետությունն ու իր զինված ուժերը բացարձակապես որևէ մտադրություն չունեին իրավիճակն առավել սրելու: «Ադրբեջանի կողմից ագրեսիա է սանձազերծվել 2016թ.-ին, 2020թ.-ի հուլիսին, և այժմ վերսկսվեց զանգվածային էսկալացիան Ադրբեջանի հետ Արցախի շփման գծի ողջ երկայնքով: Եվ սա նախապես պլանավորված, հետևողականորեն պլանավորված լայնածավալ հարձակում է շփման գծի ողջ երկայնքով: Մեղադրանքների խաղը, որ Ադրբեջանը փորձում է պարտադրել մեզ, արդարացված չէ: Մենք ևս մեկ անգամ կրկնում ենք, որ եղել են բազում առաջարկներ՝ ձևավորելու ռիսկերի նվազեցման, հրադադարի խախտումների հետաքննության և զինադադարի ռեժիմի ամրապնդման շատ հստակ մեխանիզմներ, որոնք կտրականապես մերժվել են Ադրբեջանի կողմից, քանի որ ուժի կիրառումը հենց Ադրբեջանի գործիքն են», ասում է Մնացականյանը:

Լրագրողը հարցնում է՝ մտավախություն ունե՞ք, որ իրավիճակը կարող է էլ ավելի սրվել: «Մենք շատ մտահոգված ենք այս ագրեսիվ, լայնածավալ հարձակումով. Ադրբեջանը մտադրություն չունի գործել լարվածության թուլացման ուղղությամբ: Եվ իհարկե, մենք պատրաստ ենք յուրաքանչյուր զարգացմանը, որը շատ վտանգավոր է տարածաշրջանի համար, բայց ինչպես ես ասացի, մենք պատրաստ ենք պաշտպանվել ամենավճռական կերպով»:

Ապա` հարցնում են՝ Լեռնային Ղարաբաղի չլուծված հակամարտության լուծում տեսնու՞մ է հայկական կողմը: Զոհրաբ Մնացականյանի պատասխանը, երբ ինքն էլ արձանագրում է, որ Արցախը ենթարկվում է լայնածավալ ագրեսիայի, պարզապես ցնցող է. «Իհարկե, մենք եղել և մնում ենք լիովին հավատարիմ Լեռնային Ղարաբաղի հակամարտության բացառապես խաղաղ կարգավորմանը, ինչի համար կա միջազգայնորեն ընդունված, միջազգային մանդատ ունեցող ձևաչափ՝ ԵԱՀԿ Մինսկի խմբի համանախագահությունը, որի կազմում ընդգրկված են Ֆրանսիան, Միացյալ Նահանգները և Ռուսաստանի Դաշնությունը: Մենք լիովին հավատարիմ ենք այս գործընթացին՝ լուծելու այս հակամարտությունը բացառապես խաղաղ ճանապարհով, և գտնելու այնպիսի լուծում, այնպիսի կարգավորում, որը բացառապես հիմնված է փոխզիջման վրա, այնպիսի մի լուծում, որն ընդունելի է, ինչպես նշել է Հայաստանի վարչապետը, Հայաստանի ժողովրդի, Արցախի ժողովրդի և Ադրբեջանի ժողովրդի համար: Դժբախտաբար, մենք առերեսվում ենք Ադրբեջանի բացառապես առավելապաշտական դիրքորոշման հետ, որը մերժում է Արցախի ժողովրդի և նրա իշխանությունների, հայ ժողովրդի շահերի և մտահոգությունների որևէ դիտարկում: Առավելապաշտական մոտեցումը եղել և մնում է մերժված: Մենք պատրաստ ենք փոխզիջման: Այնուամենայնիվ, այս լայնածավալ էսկալացիան բերում է նոր իրավիճակ, որին մենք ստիպված ենք առերեսվել»:

Ուրեմն, երբ հայկական բանակը կատաղի մարտերի մեջ է արդեն երեք օր, միայն պակասում է պաշտոնական Երևանից՝ «մենք պատրաստ ենք փոխզիջման» հայտարարությունը:

Մի կողմից՝ Հայաստանի ԱԳՆ-ն երեք օր է հայտարարում է, որ հայկական ուժերը կռիվ են տալիս Թուրքիայի դեմ, որտեղից էլ ի դեպ երկու օր է, ինչ ամենաբարձր մակարդակով սպառնում են, որ «վերջակետ են դնելու Ղարաբաղի հարցի վրա՝ մեկընդմիշտ», իսկ Հայաստանի արտգործնախարարը «փոխզիջման» գնալու պատրաստակամության ամենահարմար պահն է, պարզվում է, գտել...

Հասկանալի է, որ Հայաստանը ցանկանում է ցույց տալ, որ կառուցողական կողմ է, պատրաստ է բանակցությունների, որ պատերազմի կողմնակից չէ, բայց ի՞նչ ենք զիջելու Թուրքիային ու Ադրբեջանին, երբ արդեն իսկ լայնածավալ պատերազմը սանձազերծված է:

Փոխանակ հիմա հասնել նրան, որպեսզի Ադրբեջանի ու Թուրքայի դեմ պատժամիջոցների դեմ կիրառման միջազգային հանրության կողմից, որպեսզի նրանք խնդրեն հայկական կողմից բանակցություններ ու փոխզիջում, Երևա՞նն է հիշեցնում փոխզիջման մասին...

Բա ասում էիք՝ «մենք գիտենք ինչ ենք բանակցում», «մենք մեր կետը ունենք»...

Հիմա պարզվեց «փոխզիջո՞ւմն» է ձեր կետը:

Մետաքսյա Շալունց