Համազգային համաներման ժամանակը, վաղը կարող է ուշ լինել
Հետախուզման մեջ գտնվող ՀՀ նախկին գլխավոր դատախազ Գևորգ Կոստանյանն արձագանքել է Հայաստանում զորահավաք հայտարարելու մասին հայտարարությանը և ՀՀ վարչապետ Նիկոլ Փաշինյանի կոչին: Վերջինս կոչ էր արել զորքերին կցագրված անձնակազմերին ներկայանալ զինկոմիսարիատներ:
Եվ ահա հետախուզման մեջ գտնվող Գևորգ Կոստանյանը միջնորդագիր է ներկայացրել ՀՀ գլխավոր դատախազին, որպեսզի կարողանա գալ և միանալ զորահավաքին:
Ստեղծված իրավիճակում առհասարակ շատերն են կոչ անում դադարեցնել առերևույթ քաղաքական դրդապատճառներով բոլոր քրեական հետապնդումները և վերացնել հայտարարված հետախուզումները՝ տալով հնարավորություն Հայաստանից հեռացած մեր բոլոր հայրենակիցներին անխոչընդոտ վերադառնալ և ծառայել Հայաստանին և Արցախին: Քանզի պահն օրհասական է , իսկ երկիրն այսօր ունի բոլորիս կարիքը՝ նախկին, թե ներկա, հեղափոխական, թե այսպես կոչված հակահեղափոխական: Ժմանակն է մի կողմ թողնել բոլոր տարաձայնությունները եւ համայն հայության համախմբման գործընթաց կազմակերպել: Ինչ վերաբերում է Գեւորգ Կոստանյանին, ապա ներելուց հետո հնարավորություն կունենա հայրենիք վերադառնալ:
Իհարկե, պարոն Կոստանյանը չի վերադառնալու, որ զորակոչվի սահման եւ զենքը ձեռքին դուրս գա թշնամու դեմ, թեպետ այսօր կարելի է պայքարել թեկուզ մեկ մարդու զինվորագրելու համար էլ, բայց նա նա պետությանը, ազգին պետք է որպես միջազգային մակարդակի իրավաբան, փորձագետ, քանզի պատերազմը միայն սահմանին չէ, այն թե տեղեկատվական, թե դիվանագիտական, առավել եւս միջազգային իրավունքի տիրույթում է: Հատկապես 2016 թվականի ապրիլյան պատերազմից հետո, երբ հակառակորդն այդպես էլ կյանքի չկոչեց Վիեննայում եւ Սանկտ Պետերբուրգում ձեռբերված պայմանավորվածությունները՝ սահմանի հետաքննական մեխանիզմի կիրառման հարցում՝ որպես կայունության աճին և վստահության զարգացմանը նպաստող կարևոր միջոցառում: Այդ մեխանիզմների բացակայությունն է, որ թույլ է տալիս կողմերին մեղքը միմյանց վրա բարդել: Հիմա ճիշտ ժամանակն է իրավական պրոցես սկսել Ադրբեջանի դեմ ու անհերքելի է, որ միջազգային մակարդակի իրավաբանների անհրաժեշտություն կա, որպիսիք Հայաստանում մեղմ ասած՝ թափած չեն:
Հիմա մերուձերի խնդիր չկա, նախկին-ներկայի խնդիր չկա, ոտանավորներ գրելու, հիստերիկ բղավելու եւ զառանցանքների փոխարեն կաող ուժերը մոբիլիզացնելու ժամանակն է, վաղը կարող է ուշ լինել:
Նշենք նաեւ, որ Կոստանյանից հետո հայտարարված զորահավաքին արձագանքեցին նաեւ արտերկրում գտնվող Սուրիկ Խաչատրյանը, Միհրան Պողոսյանը:
Անի Սահակյան
Հետևեք մեզ Viber-ում
