Ինտրիգը մնում է
«Կանյաչնիում» ավարտվեց «Ծառուկյան» դաշինքի նիստը, որի ընթացքում որոշվել է, թե ով կլինի ԱԺ փոխնախագահը, ԱԺ-ում խմբակցության ղեկավարը, քարտուղարը: ԱԺ-ում խմբակցությունը կղեկավարի Գագիկ Ծառուկյանը, ԱԺ փոխնախագահ կդառնա Միքայել Մելքումյանը: Նաիրա Զոհրաբյանը, Վարդեւան Գրիգորյանը, Վարդան Բոստանջյանը կղեկավարեն հանձնաժողովները: Մամուլում գրվել է, որ ըստ Դոնթի բանաձեւի ԲՀԿ-ին կհասնի 3 մշտական հանձնաժողով՝ եվրաինտեգրացիան, գյուղատնտեսության եւ բնապահպանության, տարածքային կառավարման եւ տեղական ինքնակառավարման հանձնաժողովը: «Կանյաչնի» շտապող պատգամավորության թեկնածուները ուշագրավ է, որ տեղյակ չէին, թե ինչու են իրենց հրավիրել ժողովի։ Բայց այդպես անտեղյակ էլ հեռացան, ավելի ճիշտ լրագրողներին չասացին, թե ինչպիսի որոշում է ընդունվել ամենաինտրիգային հարցի շուրջ։ Խոսքը ԿԸՀ-ից ինքնաբացարկի դիմումները հետ ստացած պատգամավորների մասին է, որոնք ընդդիմանալով Գագիկ Ծառուկյանի որոշմանը, վերցրել են իրենց մանդատները։ «Ծառուկյան» դաշինքի` ինքնաբացարկի դիմումի չեղարկման հայտ ներկայացրած թեկնածուներն են` Արարատ Զուրաբյան, Սերգեյ Բագրատյան, Արթուր Մանուկյան, Նապոլեոն Ազիզյան, Խաչիկ Մանուկյան, Արտյոմ Ծառուկյան, Հարություն Ղարագյոզյան, Վահան Կարապետյան, Մուշեղ Սաղաթելյան, Հրանտ Դավթյան,Մանուկ Սուքիասյան եւ Ալիկ Եղիկյան։ Ինքնաբացարկի չեղարկման 12 հայտերից բավարարվեց միայն 8-ը, վերջին չորսը ոչ անցողիկ տեղերում են ու մանդատ չեն ստանում։ Այսօրվա հանդիպմանը նշված ցանկից երեւացին միայն Նապոլեոն Ազիզյանը եւ Արարատ Զուրաբյանը։ Հանդիպման ավարտից հետո լրագրողները մուտքի մոտ առաջինը հանդիպեցին Արարատ Զուրաբյանին, ով եւս ինքնաբացարկի դիմումը հետ վերցրածներից է։ Հարցին՝ մնալո՞ւ է պատգամավոր, պատասխանեց, որ վաղը կլինի ԱԺ առաջին նիստը, որի ժամանակ ամեն ինչ պարզ կլինի: Իսկ մյուս օրերին լ է լինելու, հարցին նա չպատասխանեց ու հեռացավ։ «Վերցնելու եմ մանդատը»,- մինչեւ Կոնյաչնի մտնելը լրագրողներին հայտարարեց Նապոլեոն Ազիզյանը։ Լրագրողները նրան հիշեցրին իր հայտարարությունը, թե պատրաստ էր մանդատը փռել Ծառուկյանի ոտքերի առաջ, ինչին Ազիզյանը արձագանքեց. «Ո՞վ ա ասել, ե՞ս եմ ասել, ճիշտ չեմ ասել»։ Ըստ Նապոլեոն Ազիզյանի՝ իր պատգամավոր լինել-չլինելու հարց չի բարձրանալու եւ հայտարարեց՝ «Ես պատգամավոր եմ»: ՀՀԿ-ից Ծառուկյան դաշինք տեղափոխված Վարդան Ղուկասյանն էլ հավաքից հետո տեղեկացրեց, որ նիստն ընթացել է եղբայրական մթնոլորտում։ Հարցին՝ առաջին անգամ է մասնակցում այս դաշինքի նիստին, տարբերություն կա՞ ՀՀԿ-ի եւ ԲՀԿ-ի միջեւ, Վարդան Ղուկասյանը ասաց․ «Ոչ, բոլորն էլ նույն հայերն են»։ Այդ դեպքում ինչո՞ւ տեղափոխվեցիք Ծառուկյան դաշինք, հարցին էլ պատասխանեց․«Ես չեմ տեղափոխվել։ Կյանքն է տեղափոխել, դուք, դուք»։ Վարդան Ղուկասյանը իրեն բնորոշ անկեղծությամբ ըստ էության իրերն իրենց անուններով է կոչել, ամենայն հավանականությամբ դաշինքը ԱԺ-ում կհայտարարի ընդդիմադիր լինելու մասին, սակայն դա միայն կարգավիճակով, իսկ իրականում կգործի այն տիրույթում, որը նրա համար կգծի ՀՀԿ-ն։ Անի Սահակյան
Հետևեք մեզ Viber-ում
