Վրեժխնդրության ձախողված պլան

Հայաստանի անկախության 29-ամյակին նվիրված պարգեւատրումները մեկ անգամ եւս պատռեցին այս իշխանության դեմքը՝ ցույց տալով, որ Նիկոլ Փաշինյանը պետությունը ղեկավարելու հարցում էլ առաջնորդվում է անձնական համակրանքներով եւ հակակրանքներով, քինախնդրությամբ:
Այսպիսով՝ սեպտեմբերի 21-ին հայտնի դարձավ, որ վարչապետի առաջարկությամբ նախագահ Արմեն Սարգսյանի կողմից առողջապահական հաստատությունների մի խումբ ներկայացուցիչներ ստացան պետական պարգևներ կորոնավիրուսի համավարակի դեմ պայքարում ունեցած ավանդի համար, ավելի ուշ, սակայն, պարզ դարձավ, որ «Նորքի» աշխատկիցներից և ոչ մեկը պետական պարգևի չարժանացավ: Այն դեպքում, երբ «Նորք» ինֆեկցիոն հիվանդանոցն ընդունել է կորոնավիրուսով հիվանդ առաջին պացիենտին։ «Նորք» ինֆեկցիոն հիվանդանոցը ողջ այս մղձավանջի ընթացքում սպասարկել է կորոնավիրուսով մեկուսացվածներին, բոլոր այն հյուրանոցներին, որտեղ պահվել են կորոնավիրուսի թեսթ հանձնածներն ու հիվանդ քաղաքացիները։
Ինչու չեն պարգեւատրել, կարելի է կռահել, որովհետեւ նախ առողջապահության նախարարի աթոռը զբաղեցնող Արսեն Թորոսյանը վատ հարաբերություններ ունի
«Նորք» ինֆեկցիոնի տնօրեն Մհեր Դավիդյանցի հետ,եւ ամենակարեւորը՝ Դավիդյանցը բացահայտեց այս իշխանության կեղծիքը՝ միամտորեն խոստովանելով, որ Հայաստանում կորոնովիրուսով վարակվածության դեպքեր գրանցվել են հունվար-փետրվար ամիսներին եւ ոչ թե մարտի 1-ին, ինչպես պաշտոնապես է հայտարարվել: Պարետատան նիստից հետո նա լեզվի սայթաքում թույլ տվեց, որից հետո մեծ աղմուկ բարձրացավ եւ բոլորը սկսեցին իշխանությանն ու հատկապես Փաշինյանին մեղադրել վարակը տարածելու հարցում, քանզի ստացվում է՝ նա գիտեր այդ մասին, բայց շարունակում էր սահմանադրական հանրաքվեի քարոզարշավ անել:

Մանր քինախնդիրները որոշել են ըստ էության այս ճանապարհով վրեժխնդիր լինել Նորքի բժիշկների նկատմամբ, դե իսկ երկրի գլխավոր տուրիստ Արմեն Սարգսյանն էլ իրեն նեղություն չի տվել մի հատ կարդալ, կամ հանձնարարել, որ կարդան , մինչեւ կստորագրի պարգեւատրումների հրամանագրերը:
Այս նենգ պատմությունը գուցե չբացահատվեր, եթե առողջապահական այս հաստատության անձնակազմը բաց նամակով հանդես չգար՝ եւ հիշեցներ, որ հիվանդանոցը եղել է հիվանդության դեմ պայքարի առաջամարտիկ:

Միայն դրանից հետո վարչապետի խոսնակը շեֆի օրինակով սկսեց կրուտիտ անել, թե, առաջիկա օրերին եւս 100 բժիշկ ու նրանց մեջ նաեւ «Նորք» ինֆեկցիոնի բժիշկներից շատերը, կրկին կպարգեւատրվեն։
Նրանց կապկեց նաեւ նախագահականը՝ հիշեցնելով, որ Հանրապետության նախագահը չի կարող պետական պարգևներով պարգևատրել կամ պատվավոր կոչումներ շնորհել իր հայեցողությամբ: «Ինչ վերաբերում է «Նորք» ինֆեկցիոն հիվանդանոցի աշխատակիցների նամակին, այդ կապակցությամբ նախագահ Արմեն Սարգսյանի հանձնարարությամբ Հանրապետության նախագահի աշխատակազմի ղեկավարը կապ է հաստատել նրանց ներկայացուցչի հետ և հրավիրել հանդիպման Հանրապետության նախագահի նստավայր»: Ակնհայտ է, որ հետին թվով փորձելու են սխալնեի ուղղում անել, բայց միեւնույն անպատասխան է մնում կարեւոր մի հարց՝ մինչեւ ե՞րբ են էս մարդիկ իրենց ֆոբիաներով ու նեղ անձնական վրեժխնդրությամբ երկիր կառավարելու:

Անի Սահակյան