Գիտության քաղքենին. իշխանության հույսը ժանգոտած զենքն է

Ներքաղաքական խառնակ ժամանակներն ու իշխանության թշվառ մենությունը վերջիններիս մղել են ոտքի հանել բոլոր ժամանակների գրպանային մտավորականությանը: Եւ ահա, իշխանության ծոցագրպանում տեղավորվելու հրմշտողի մեկնարկը կարծես տրված է: Ֆայլաբազառային մտավորականությունը առաջիկայում մայրուղի դուրս կգա՝ իր գնահատված արժեքին դոմինանտ էլ կսկսի քծնել իշխանություններին, մի բան, որն արել է բոլոր իշխանությունների ժամանակ: Ահավասիկ առաջին ծիծեռնակը, մինչ բանականություն ունեցող ցանկացած հայ ահազանգում է ապազգային այս իշխանության դավադիր ծրագրերի մասին, արվեստագիտության դոկտոր, պրոֆեսոր, ԳԱԱ թղթակից անդամ Հենրիկ Հովհաննիսյանը սազն առել ու իշխանության գովքն է անում, բայց ավելի շատ ողբում ընդդիմության համար.
«Ես հեղափոխությամբ ներշնչվածներից եմ, մասնակիցը չեմ եղել, բայց չունենալով քաղաքական լավատեսություն՝ ես այս հեղափոխությամբ լավատես դարձա քաղաքականապես եւ հիմա էլ եմ լավատես»,- նա ասպարեզ է իջել, որ իր չհիմնավորված լավատեսությամբ նաեւ մեզ վարակի ասելով. «Մեծ բաների չի կարելի սպասել…մեր հնարավորություններին նայենք, մեր դրությանը նայենք, կողոպտված երկրին նայենք: Եվ ի՞նչ` կախարդական փայտիկով հեղափոխությունը եղավ, ուրեմն վաղը չէ մյուս օրը կամ երկու տարի հետո պետք է աշխատավարձերը բարձրանա՞ն…Այսպես չի կարելի մտածել, այսինքն`քաղքենին մնում է քաղքենի»:

Անդրադառնալով մի քանի ընդդիմադիր ուժերի հանրահավաքին, Հենրիկ Հովհաննիսյանը կարծիք է հայտնում, որ չկան գաղափարներ եւ չկա գաղափարախոսություն, որ նրանց միավորի. «Հայտարարեցին մի բան, որ իրենց նպատակն է շուտափույթ ազատվել Նիկոլ Փաշինյանից, ողբամ զձեզ, եթե դա է ձեր ողորմելի նպատակը, ուրիշ նպատակ չունե՞ք…Ես կուզենամ տեսնել, թող հրապարակեն իրենց գաղափարախոսությունը, ծրագիրը, անելիքները, որտե՞ղ են նրանց առաջարկները, եթե իմ առաջ դրական ծրագիր լինի, առաջարկեր, որ մարդկանց մտածել կտան, ես կանցնեմ նրանց կողմը, ամբողջ ձայնով կսկսեմ նրանց կողմից խոսել…Իրականում այդ ուժերն իրար հետ համաձայնության գալ չեն կարող, որովհետեւ ամեն մեկն իրեն թագավոր է պատկերացնում»:

Հենրիկ Հովհաննիսյանին մեծահոգաբար խորհուրդ կտանք իր ողբը պահել իր համար, քանզի եթե Նիկոլ Փաշինյանը շարունակեց պետություն կառավարել իր ողբը ոչ միայն իր , այլ իր պես խաբվածներից շատերին է պետք գալու, ինչ վերաբերում է ընդդիմության գաղափարազուրկ լինելու մասին, ապա նման բան ասողներն առաջին հերթին իրենք են արժանի այդ ողբին, փաստերոն, ընդդիմություն, որ ոչ վաղ անցյալում պատերազմ է հաղթել, պետություն կայացրել, տնտեսություն շենացրել, չունի ոչ մի գաղափար եւ այդ ամենն արել է ակամայից: Ով գաղափարախոսություն չունի ավանդական դաշնակցությունը, թե Գագիկ Ծառուկյանը, ում թիմում տնտեսական հեղափոխության համալիր ծրագիր են առաջ քաշում, մարդ, ով ահռելի ներդրումներ է արել այս երկրում եւ պատրաստ է, եթե իշխանությունները թույլ տան: Թե Արթուր Վանեցյանն ասելիք չունի, իսկ գուցե այնքան շատ ունի, որ դրանից է սարսափած այս իշխանությունը ու պատերազմի դաշտ է հանել իր հնամաշ արսենալը:
Հետաքրքիր է՝ ինչպես է քո տղան այդ ասելիք ու գաղափար չունեցող ընդդիմության, երեկվա իշխանության ի մասնավորի՝ Ռոբերտ Քոչարյանի ժամանակ դարձել ՀԷԿ-երի ու հանքերի տիրակալ, իսկ գուցե ձեր քծնանքը ժողվարչապետին մեկ նպատակ ունի՝ պահել ու պահպանել դիզած հարստությունը: Այդ ինչպես Երեւանի կենտրոնում տների ու կարողության տեր դարձաք, գուցե այդ մասին պատմեք ժողովրդին:
Որ ասում եք ամենից շատ վախենում եք քաղքենուց, քանզի քաղքենին դատում է իր բարեկեցության դիրքերից, թերեւս չեք սխալվում, այո ձեր օրինակը ձեր խոսքի վառ վկայությունն է:
Ողջ կյանքում արվեստի, հայրենի գրականության, գրագիտութան ջադագով լինելով հանդերձ այսօր ձեր կռիվը փոխանակ իշխանության դեմ լիներ՝ հանձին կրթության ապազգային չափորոշիչների, դուք եկել ընդդիմության դարդն եք լացում: Ժամանակին ձեզ պես պալատական մտավորականներ էլ Նիկոլ Փաշինյանի շարժումն էին նսեմացնում, թե ինչ եղավ հետո, գիտենք բոլորս: Այնպես որ պետք չէ հողմաղացների դեմ կռիվ տալ , հատկապես որ դիմացինդ ժողովուրդն է:

Անի Սահակյան