Նիկոլ Փաշինյանը թյուրիմացության մեջ է․ հարկերը բարձրացում է, որ աշխատատեղերը փակվեն

Արդեն մեկ շաբաթ է, ինչ հագուստի ներկրմամբ և առևտրով զբաղվող ձեռներեցները բողոքում են հագուստի մաքսազերծման նոր կարգից, որով մաքսատուրքը կտրուկ բարձրանում է։ Կառավարության շենքի դիմաց հավաքված առևտրականները պնդում են, որ մաքսային վճարը թանկացել է 4-5 անգամ։ Պետական եկամուտների ծառայության ղեկավերները պնդում են, որ մաքասատուրքը թանկացել է երկու անգամ և դա արվել է դաշտը կարգավորելու նպատակով։
Թե կոնկրետ քանի անգամ է թանկացել մաքսավճարը, թերևս մաթեմատիկական հաշվարկի խնդիր է, բայց փաստ է, որ թանկացել է։ Եթե անգամ իրականությունն այն է, որ հագուստի ներմուծման մաքսատուրքը, ինչպես ՊԵԿ-ն է ասում, բարձրացել է երկու անգամ, ապա պետք է արձանագրել, որ տեղի ունեցել անհեռատես քայլ։
Համավարակի և արտակարգ իրավիճակների պայմաններում հարկեր բարձրացնելը, նշանակում է այդ ոլորտում գործող աշխատատեղերը միտումնավոր փակել։ Կառավարությունն այս պարագայում ուղակի չի հասկանում, որ ամենամեծ հակաճգնաժամային քայլը, որ կարող է իրագործել, գոյություն ունեցող աշխատատեղերի պահպանումն է։ Եթե հագուստի վաճառքով զբաղվողները դառնան գործազուրկ, ապա կառավարությունն ստիպված է լինելու սոցիալական ապահովության միջոցառումների շրջանակում նրանց հատուցումներ տալ, ինչպես որ տալիս է համավարակի ժամանակահատվածում գործազուրկ դարձած  կամ պարապուրդի մատնված բազմաթիվ քաղաքացիների։ Թվաբանական շատ լուրջ հաշվարկ անելու դեպքում, ՊԵԿ-ը թերևս կհամոզվի, որ պետական բյուջեից ավելի շատ սոցիալական հատուցում կվճարի աշխատանքից զրկված հագուստի առևտրականներին, քան այն հավելյալ գումարները, որ հագուստի մաքսատուրքի թանկացման արդյունքում մուտք է արվելու բյուջե։
Իսկ որ առևտրականներից շատերը լրջագույն խնդիր կունենան, կասկածից դուրս է, որովհետև մաքսազերծման գնի բարձրացումը բերելու է վաճառքի գնի թանկացման։ Իսկ բնակչության սոցիալական ներկա պայմաններում գների թանկացումը արդեն իսկ ձախողում է։ Սրանով, ընդամենը Հայաստանի առանց այդ էլ փոքր սպառողական շուկան, կառավարությունն ուղղակի նվիրում է օնլայն վաճառքի խոշոր կենտրոններին, որոնք մեծ մասամբ գործում են Հայաստանից դուրս։ 
Նման վերլուծություններ անելու փոխարեն, ՊԵԿ-ը, մեր տեղեկություններով հանդիպման է հրավիրել բողոքի դուրս եկած հագուստի գործով զբաղվողներին և հաթաթա տվել, թե ինչքան էլ բողոքեն, միևնույնն է՝ ոչինչ չի փոխվելու։ Հավանաբար, իշխանություններին և կոնկրետ Նիկոլ Փաշինյանին թվում է, թե տնտեսական հեղափոխություն իրականացնելու ուղիղ ճանապարհը հարկերը բարձրացնելն է։ Ինչ արած՝ սա կարանտինային Հայաստանն է՝ հեղափոխությունից հետո։

Հայկ Դավթյան