Էշը, որ էշ է` երկրորդ անգամ նույն ցեխը չի մտնում

Ապրիլի 23-ի դրությամբ Հայաստանում հաստատվել էր կորոնավարակի 50 նոր դեպք։ Վարակվածների ընդհանուր թիվը հասել էր 1523-ի, մահվան դեպքերի ընդհանուր թիվը` 24-ի։

Այն ժամանակ թավշյա «անմեղսունակների» կառավարությունը` Նիկոլի գլխավորությամբ, հղում անելով կորոնավարակին դիմակայելու անհրաժեշտությանը, փակեց Ծիծեռնակաբերդի հուշահամալիրի մուտքերը և արգելեց հպարտ քաղաքացիներին`գնալ և հարգանքի տուրք մատուցել Ցեղասպանության զոհերի հիշատակին։

Փոխարենը` առաջարկեց նշանակված ժամին «մարել բնակարանների լույսերը և սևեռել հայացքները դեպի Ցեղասպանության զոհերի հուշահամալիր կամ դիտել Հանրայինի ուղիղ եթերը և բջջային հեռախոսների լույսերի վառումով պատուհաններից խորհրդանշել միասնական ներկայությունն անմար կրակի շուրջ», հաղորդագրություններ ուղարկել 1915 կարճ համարին` այդպե՛ս «հաստատելով» սեփական մասնակցությունն օրվա խորհրդին։

Սեպտեմբերի 17-ի դրությամբ բացահայտվել է վարակի 295 նոր դեպք, վարակվածների ընդհանուր թիվը 46 671 է, մահվան ընդհանուր դեպքերի թիվը` 1208:

Մահաբեր վիրուսը, առավելապես եղանակային պայմանների բերումով գրանցած հարաբերական նահանջից հետո նորից ակտիվացել է, «աճի» միտում է ցուցաբերում։ ՄԱԿ-ի գլխավոր քարտուղարը հայտարարել է, որ համավարակի բռնկումը դուրս է գալիս վերահսկողությունից։ Հեռու չգնանք` «թավշյա» առողջապահության փոխնախարարն է ասում. «Կորոնավիրուսային վարակի տարածման ինտենսիվության կարևոր ցուցանիշներից մեկը` վերարտադրողականության ցուցանիշը (Rt COVID19) Հայաստանի համար ներկայում աճել է և կազմում է 1,02։ Սույն ցուցանիշը 1-ից բարձր լինելու դեպքում կանխատեսում է վիրուսի արագ տարածում. յուրաքանչյուր 1 վարակված անձ վարակելու է 1-ից ավել անձի։ Ընդամենը մի քանի օր առաջ այն ցածր էր 1-ից և վկայում էր դեպքերի նվազման մասին»։

Իսկ ի՞նչ է անում «անմեղսունակների» վարչախումբը` նույն Նիկոլի գլխավորությամբ. պատրաստվում է «մեծ շուքով» տոնել Հայաստանի անկախության օրը։ Ու դրա համար նախատեսում է վատնել ամբողջ 200 միլիոն դրամ` ավելի քան 400 հազար դոլար (մի 250 հազար դոլա՛ր էլ ավելի վաղ «վարչապետական» ինքնաթիռը ներկելու համար էր դուրս գրել)։

Հիշում եք, չէ՞, սեպտեմբերի 3-ին` կառավարության նիստում, ֆինանսների նախարար Ատոմ Ջանջուղազյանն աննպատակահարմար գտավ միջոցներ հատկացնել դպրոցներին կորոնավարակից պաշտպանվելու` դիմակներ և հակակորոնավարակային այլ ատրիբուտներ ձեռք բերելու համար. ասաց` փող չկա, «պահուստային ֆոնդը ծանրաբեռնված է»։

Հիմա, պարզվում է, փող կա՛։ Գոնե Նիկոլին սպասարկող օդանավը «թարմացնելու», կորոնավարակի պայմաններում «խրախճանք» կազմակերպելու` տոնական միջոցառումների «ֆոնին» կառավարական ողջ շքախմբով, բազմամարդ ընտանիքի անդամներով, բանով ինքնադրսևորվելու և ինքնագովազդվելու, «Մեր ժամանակի հերոսը» թեմայով հերթական անկապ մրցանակաբաշխությունն անցկացնելու համար (ովքեր են «մեր ժամանակի հերոսները»` թերևս պետք չէ հիշեցնել)։ Իսկ վիրուսի նոր բռնկման սպառնալիքը «պոզով-պոչով վախենալու կենդանի» չէ, որ փչացնի Նիկոլի տոնը։

Ինչպես և մարտի առաջին տասնօրյակում, երբ ինքը, համավարակի դեմ կանխարգելիչ քայլեր ձեռնարկելու փոխարեն յուր «շքախմբով», մարզից մարզ ընկած, «այո՛» էր քարոզում և մարդկային կուտակումներ ստեղծում իր շուրջ, հիմա էլ կարելի է շատ հանգիստ հավաքվել և «վայելել օրվա խորհուրդը». եթե կորոնավարակի 50 նոր դեպքը «հիմնավոր» պատճառ էր` խախտելու տասնամյակների պատմություն ունեցող «հին կարծրատիպը», չեղյալ համարելու Ցեղասպանության 105-րդ տարելիցին նվիրված սգո երթը և դնելու աշխարհի բոլոր հայերին միավորող հիշատակի օրը հեռակա կարգով նշելու «նոր մշակույթի» հիմքերը`հուրախություն Թուրքիայի, ապա 300 դեպքը բոլորովին պատճառ չէ` չեղարկելու Անկախության օրվա տոնական միջոցառումները։

Եվ հազար անգամ «ղալաթ կանի» ցանկացած մեկը` «գլուխը պատերով» կտա, եթե ասի, որ Փաշինյանն ու իր մերձավորները դրանից «քյար» ունեն` չեն ուզում բաց թողնել փողեր լվանալու «գյոզալական» առիթը։ Կամ` մտքով կանցկացնի, թե Փաշինյանը վերստին կորցրել է վտանգի զգացողությունը և վերադարձել վարակի «սաղմնային փուլում» հռչակած դուխով կարգախոսին, որ ճարպկորեն փորձեց Գագիկ Ծառուկյանի վրա «սաղացնել». էն, որ ասում էր` կորոնավիրուսն ո՞ւմ շունն ա, պինցետով կհանենք, արաղով կախտահանենք, կպրծնի-կգնա։

Դե, իսկ եթե, բան է, պատահեց` վիրուսը նորից սկսեց հաղթարշավը և հասավ նախկին «բարձր» նշաձողին, դեռ մի բան էլ` նոր բնագծեր նվաճեց, խնդիր չէ. միշտ կարելի է ասել, որ կառավարությունն ամեն ինչ ճիշտ է արել` ավելի լավ ռազմավարություն, քան այն, որ մենք ենք որդեգրել, հնարավոր չէր հորինել, ուղղակի համաշխարհային «թրենդն» է այդպիսին` վարակն ամենուրեք ակտիվացել է (նույնիսկ հարևան Վրաստանում)։ Եվ ընդհանրապես, եթե աշխարհի ամենազարգացած երկիրը, ինչպիսին Միացյալ Նահանգներն է, չի կարողանում դրա հախից գալ, մենք ո՞վ ենք, որ կարողանանք «պանդեմիայի» նոր ալիքի դեմն առնել։

Ի վերջո, կարելի է մեղքը գցել ընդդիմության վրա, ասել, որ ընդդիմությունն է իր «հակասական» հայտարարություններով և «սադրիչ» գործողություններով` բացօթյա տարածքներում «դիմակ կրելով` կրելու», 6 տարեկան փոքրիկներին դիմակախեղդ անելու, դպրոցները կորոնահամակենտրոնացման ճամբարների վերածելու դեմ քարոզելով, Արայիկի հրաժարականի և այլ «անտեղի» պահանջներով բողոքի ցույցեր անելով, մարդկային կուտակումներ ստեղծելով` նպաստել վարակի տարածմանը։

Ինչո՞ւ չէ`կարելի է նաև ընդդիմադիր ուժերին պատախանատվության ենթարկելու հարց բարձրացնել, որ իմանան` որտեղ են ձմեռում խեցգետինները...

Լիլիթ Պողոսյան