«Արյունալի» կրքեր. Աննա Հակոբյանն ընդվզում է Նիկոլ Փաշինյանի որոշման դեմ

Ռ․Յոլյանի անվան Արյունաբանական կենտրոնի շուրջ աննախադեպ զարգացումներ են ընթանում։ Հոկտեմբերի 1-ին ավարտվում է պրոֆեսոր տնօրեն Սամվել Դանիելյանի աշխատանքային պայմանագիրը։ Վերջերս առողջապահության նախարարությունը հայտնեց, թե մտադիր չէ երկարացնել պայմանագիրը։ Նկատենք, որ Սամվել Դանիելյանը ոչ միայն Հայաստանի, ոչ միայն տարածաշրջանի, այլեւ աշխարհի մասշտաբով բարձրակարգ մասնագետ է, ավելին՝ եթե կուզեք նրա անձով է պայմանավորված ողջ ինստիտուտի արդյունավետ գործունեությունը եւ նախարարության դիրքորոշումը բնական է, որ ընդվզման պատճառ պետք է դառնար։ Եւ այդպես էլ եղավ։

Այդ հայտարարությանը հաջորդեց Հայաստանի մանկական քաղցկեղի և արյան հիվանդությունների կենտրոնի ղեկավար Գևորգ Թամամյանի և մի շարք աշխատակիցների ազատման դիմումները։ Նրանք բաց նամակով դիմել էին վարչապետ Նիկոլ Փաշինյանին՝ խնդրելով ընթացք տալ տվյալ որոշման վերանայմանը՝ հնարավորություն ընձեռելով շարունակել «ոլորտի զարգացմանն ուղղված անավարտ ծրագրերը»։

Առողջապահության նախարարությունն անդրադարձել է կենտրոնի բժիշկների ազատման դիմումներին ու բաց նամակին՝ նշելով, որ «ազնիվ չէ շահարկել պացիենտների առողջությունը․ ուղղակի լրացել է տնօրենի աշխատանքային պայմանագրի ժամկետը»։

Միքանիօրյա խմորումներից հետո, երեկ վարչապետ Նիկոլ Փաշինյանը ֆեյսբուքյան իր էջում բարի լուր ավետեց․ «Առողջապահության նախարարին հանձնարարեցի երկարացնել Ռ. Յոլյանի անվան Արյունաբանական կենտրոնի տնօրենի հետ աշխատանքային պայմանագիրը:
Չթաքցնեմ, տարակուսած եմ, որ այս պատմության ընթացքում որոշ բժիշկների կողմից թեկուզ ոչ ուղղակի սպառնալիք է հնչել հիվանդ երեխաներին թողնել առանց խնամքի: Եթե նրանք երեխաներին բուժում են այնպես, ինչպես խոսում են, մտածելու շատ լուրջ բան ունենք:
Ամեն դեպքում նման կեցվածքը չի կարող անարձագանք մնալ, առնվազն ստուգելու համար տպավորությունների եւ իրականության հարաբերությունները»:

Իհարկե, տարակուսելի է, թե ինչու է անձնակազմին հաթաթա տալիս, փոխանակ դա անի այն մարդկանց նկատմամբ, ովքեր փորձում էին ինստիտուտը դարձնել իրենց բոստանը եւ դրանով էր պայմանավորված նաեւ անվանի բժշկի հետ պայմանագիրը չերկարացնելու մտադրությունը։ Պատահական չէ, որ նույն օրը, երբ Փաշինյանը հայտարարեց պայմանագիրը երկարացնելու հանձնարարականի մասին, տիկինը՝ Աննա Հակոբյանն էլ տեղեկացրեց, որ դադարեցրել է «Ժպիտների քաղաք» բարեգործական հիմնադրամի հոգաբարձուների խորհրդի նախագահի լիազորությունները: Այս մասին նա հայտնել է իր ֆեյսբուքյան էջում: «Սիրելի հայրենակիցներ, Սույն հայտարարությամբ դադարեցնում եմ «Ժպիտների քաղաք», City of Smile Charitable Foundation / Սիթի օֆ Սմայլ բարեգործական հիմնադրամի հոգաբարձուների խորհրդի նախագահի լիազորությունները։ Վստահ եմ, մեր երեխաները հուսալի եւ ապահով ձեռքերում են»,- գրել է նա։

Իրականում խոսում են, որ Աննա Հակոբյանը այս ինստիտուտի ղեկավարի պաշտոնում իր «մարդուն» է ցանկացել նշանակել, բավականին եկամտաբեր մեխանիզմներով հետագայում գումար աշխատելու նպատակով։ Նա է նախարարին հանձնարարել չերկարացնել պայմանագիրը, ինչից հետո առաջացել է այս «բոլոլան», արդյոք հիմնադրամում իր գործունեությունը պայմանավորված է նրանով, որ համաձայն չէ ամուսնու որոշման հետ, հստակ պնդել չենք կարող, բայց ինչպես ասում են՝ առանց կրակ ծուխ չի լինում։

Անի Սահակյան