Նիկոլ Փաշինյանը Արայիկ Հարությունյանի հրաժարականից առաջ պահանջ կդնի

Քաղաքական թեժ աշունը մեկնարկեց ԿԳՄՍ նախարար Արայիկ Հարությունյանի հրաժարականով։ Նիկոլ Փաշինյանի թեթև ձեռքով սուպերնախարար հռչակված Արայիկ Հարությունյանը քաղաքական-հասարակական և հանրային հնարավոր բոլոր շերտերին իր դեմ հանելու բացառիկ տաղանդի շնորհիվ շարունակում է կրքեր բորբոքել։ Նրա հրաժարականի հարցն արդեն հարցապնդման տեսքով մտել է Ազգային ժողով՝ Լուսավոր Հայաստան խմբակցության նախաձեռնությամբ։ Արայիկ Հարությունյանը Ազգային ժողովում մենամարտ տվեց պաշտոնի պահպանելու համար և շատ հստակ հայտարարեց, որ իր օրակարգում հրաժարականի հարց չկա։ Չնայած խորհրդարանաի դրսում հավաքված ամբոխը ևս խարհրդարանական ընդդիմության հետ միասին պահանջում էր սուպերնախարարի հրաժարականը, սակայն նա, միևնույնն է՝ մնաց անդրդվելի։ Ինքնապաշտպանական բանզդը Արայիկ Հարությունյանին  անգամ քաղաքական ոչ կոռեկտության դրդեց։ Երբ հարց բարձրացվեց չափորոշիչների և առարկայական ծրագրերի մասին, որոնք առաջ են բերել հանրության ընդգծված դժգոհությունը, քանի որ դրանց մեջ ազգայինի մոտեցումները կամ անտեսված են կամ նվազագույնի հասցված, Արայիկ Հարությունյանը ուղղակի չզսպեց ցասումը․ « Այս չափորոշիչների շնորհիվ մի խումբ կոտայքցիներ կսովորեն հարգել դիմացինին, ղեկավարել սեփական հորմոնները, սիրել եկեղեցին եւ այլեւս եկեղեցու տարածքում չի լինի օտարի նկատմամբ սեռական բռնություն, այ դա է սովորացնելու սա»: ԲՀԿ խմբակցության մոտ մեկ տասնյակ պատգամավորներ ի պատասխան ճեպազրույց հրավիրեցին՝ հայտարարելով, որ ԲՀԿ-ն բոյկոտում է կառավարության հետ հարցուպատասխանը եւ փաստաբանի հետ քննարկելու են Արայիկ Հարությունյանի «լպիրշ եւ անբարո» պահվածքին իրավական գնահատական տալու հարցը: Շատ թափանցիկ ակնարկն ուղղված էր ԲՀԿ առաջնորդ Գագիկ Ծառուկյանին, ավելի հստակ՝ նախկինում նրան վերագրվող հայտնի քրեական գործին։

Գագիկ Ծառուկյանին մեղադրելով սակայն Արայիկ Հարությունյանը հազիվ թե կարողանա ապահովագրել սեփական վարկանիշի աղետալի կորուստը։ Վերջին հաշվով՝ Ծառուկյաանը մեղավոր չէ, որ Արայիկ Հարությունյանը վատ նախարար է, և ԲՀԿ առաջնորդի մութ անցյալը ԿԳՄՍ անփառունակ նախարարի համար պայծառ ապագայի երաշխքի չի կարող լինել։ Պարզ է, որ Նիկոլ Փաշինյանը որոշել է դեռևս պահել սեփական քաղաքական զինակցին։ Չնայած իշխանական խմբակցության պատգամավորներից շատերը սիրով կմիանային Արայիկ Հարությունյանի հրաժարականի պահանջին, սակայն վստահաբոր կարելի է ասել, որ քվեարկության ժամանակ, ի կատարումն Նիկոլ Փաշինյանի հրահանգի, նրանք Արայիկ Հարությունյանի հրարժարականը կմերժեն։
Փաշինյանը սակայն սեփական վարկանշի հաշվին չի կարող հավերժ խնայել Արայիկ Հարությունյանին։ Արայիկ Հարությունյանը որպես նախարար ուղղակի չընակլվեց ո՛չ հասարակության, ո՛չ կրթական համակարգի, ո՛չ ակադեմիական հանրույթի, ո՛չ էլ մշակույթի և սպորտի աշխարհում։ Սա այնքան ակնհայտ իրողություն է, որ անգամ կյուր լինելու դեպքում էլ, Փաշինյանը չի կարող հանրային իրողությունը չտեսնել։ Արայիկ Հարությունյանին նախարարի պոստում պահելու միակ տարբերակը նրա սկսած կործանարար քաղաքական կուրսը փոխելն է, առաջին քայլը կարող է դառնալ գրականության և պատմության չափորոշիչները հետ կանչելն ու արմատապես փոխելը։ Ընդ որում նման պահանջ ԿԳՄՍ նախարարի առջև պարտավոր է դնել հենց Նիկոլ Փաշինյանը։ Ավելին՝ Արայիկ Հարությունյանը նաև պարտավոր է ներողություն խնդրել ակադեմիական հանրույթից՝ նրանց խավարամիտ անվանելու, և ընդհանրապես գիտական համայնքի հետ վիրավորական հռետորաբանությամբ խոսելու, գոռոզ և ամբարտավան վերաբերմունք դրսևորելու համար։ Սակայն սուպերնախարարն առայժմ ճիշտ հակառակ քայլեր է անում։ ։ Հետևաբար, եթե ոչ այս անգամ, մեկ ուրիշ անգամ նրա հրաժարականն անխուսափելի է և դա հրաշալի հասկանում են և՛ ինքը՝ նախարարը, և՛ նրա շեֆ Նիկոլ Փաշինյանը։

Նաիրա Բաղդասարյան