Օղակը նեղանում է,իշխանությունը նախազգուշացնող կրակոցներ է արձակում

Ազգային անվտանգության ծառայությունը երեկ բերման էր ենթարկել Վերահսկիչ պալատի նախկին նախագահ Իշխան Զաքարյանին, նրա որդուն եւ եղբորը եւ մի քանի ազգականի: ԱԱԾ աշխատակիցները ներխուժել են Զաքարյանների տուն և առաջարկել իրենց հետ գնալ: Ապա հայտնի դարավ, որ խնդիրը վերաբերում է Գառնու տարածքում Զաքարյանների հիմնած այգուն: Բայց թե ինչու ծանուցագրով չեն հրավիրել և ինչու են նման մեթոդներով մարդկանց բերման ենթարկել, պարզ չէ:

Որպեսզի հասկանանք՝ ինչու են այդպես գործել եւ առհասարակ, ինչու են Զաքարյանն ու իր մերձավորները հայտնվել իրավապահների ուշադրության կենտրոնում, պետք է հիշել կենսագրական որոշ դրվագներ, հատկապես այն, որ Իշխան Զաքարյանը 1997-ից՝ Ռոբերտ Քոչարյանի Հայաստան գալուն պես, նրա հետ սերտ համագործակցած, նրա ամենամտերիմներից մեկն է։ Ռոբերտ Քոչարյանի Հայաստան վերադառնալուն պես նա բարձր աշտոններ է զբաղեցրել պետական ապարատում: 1997-ին, Զաքարյանը նշանակվել է Հայաստանի Հանրապետության մշակույթի, երիտասարդության հարցերի և սպորտի նախարարի տեղակալ ու այդ կարգավիճակում պաշտոնավարել է վեց տարի, այնուհետև դարձել է ֆիզիկական կուլտուրայի և սպորտի պետական կոմիտեի նախագահ։ Բարգավաճ Հայաստան կուսակցության ստեղծման նախաձեռնողն էլ Իշխան Զաքարյանն է եղել, ով ժամանակին Ռոբերտ Քոչարյանի համար քաղաքական հենարան է որոշել ձեւավորել, ապաեւ իր առաջարկով է Ծառուկյանը ստանձնել կուսակցության ղեկը՝ որպես ֆինանսներ տնօրինողի:

Իշխան Զաքարյանը նախորդ ընտրություններին էլ ԲՀԿ-ի կազմակերպչական ողջ աշխատանքներն իր վրա վերցրեց՝ արձանագրելով հաջողություններ: Այս օրերին, երբ իշխանությունը բացահայտ պատերազմ է հայտարարել նախկիններին եւ սեփականության վերաբաշխման գործընթաց է սկսել, հատկապես առավել դաժան է քաղաքական ամբիցիաներ ունեցող ԲՀԿ առաջնորդ Գագիկ Ծառուկյանի նկատմամբ, և այսպիսով, Իշխան Զաքարյանը հետապնդումներից չէր կարող անմասն մնալ, քանի որ հանրությունը լսում է նաև այլոց բիզնեսներում Փաշինյանի ընտանիքի ներգրավված լինելու մասին, մարդկանց ունեզրկելու մասին:

Շանգրիլան զրկվեց լիցենզիայից, այն ամիսներ շարունակ չի գործում, քրեական գործեր են հարուցվել այլ ուղղություններով, միլիարդավոր տուգանքներ են սահմանել, իրավապահները հետաքրքրություն են դրսեւորում նաեւ նրա կուսակիցների նկատմամբ, Վանիկ Ասատրյանին ու Աբրահամ Մանուկյանին կալանավորեցին: Ծառուկյանին այլ բան չի մնում, քան հանրահավաքներով պայքարել գործող ռեժիմի դեմ: Իսկ Իշխան Զաքարյանը իր հարաբերությունները պահպանում է թե Ծառուկյանի, թե Քոչարյանի, թե անգամ Սերժ Սարգսյանի հետ, թերեւս սա է պատճառը, որ իշխանությունը որոշել է վախեցնել Զաքարյանին, որպեզսզի մտքով չանցնի ակտիվ գործընթացներում ներգրավվել:

Անի Սահակյան