Բանակից թռածը իրավունք չունի օրենք գրել բանակում ծառայելու մասին
Շրջանառության մեջ է դրվել նոր օրենքի նախագիծ, համաձայն որի 27 տարին լրացած ՀՀ քաղաքացիները, ովքեր չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձ վճարելու դեպքում կազատվեն քրեական հետապնդումից։ Բացի այդ, վերոնշյալ գումարը վճարելուց և քրեական հետապնդումից արդեն իսկ ազատվելուց հետո առաջիկա երեք տարվա ընթացքում երկու տարի ժամկետով պայմանագրային զինվորական ծառայություն անցնելու դեպքում վճարված գումարն ամբողջությամբ հետ կստանան, ինչպես նաև՝ հանրային ծառայության անցնելու հնարավորություն։ Այս մամսին ՖԲ էջում գրառում էր կատարել ԱԺ պատգամավոր Մխիթար Հայրապետյանը։
Օրինագիծը հեղինակել են ԱԺ «Իմ քայլը» խմբակցության պատգամավորներ Մխիթար Հայրապետյանը և Անդրանիկ Քոչարյանը, ինչպես նաև անկախ պատգամավոր Արման Բաբաջանյանը։
«Առաջարկվող նախագիծն ուղղված է կարևորագույն երկու խնդիրների լուծմանը, առաջինը՝ ՀՀ պաշտպանության և անվտանգության բնագավառում ծագող հասարակական հարաբերությունների պաշտպանության նպատակով խստացվում են քրեաիրավական կարգավորումները ՝ երկարաձգելով 327-րդ հոդվածով արգելված արարքների համար սահմանված վաղեմության ժամկետները և բարձրացնելով ազատազրկման ձևով պատիժների նվազագույն և առավելագույն չափերը, ինչը զինվորական ծառայությունից խուսափելու նպատակով արտագաղթի լավագույն կանխարգելումն է, որը հետադարձ ուժ չունի: Երկրորդը՝ հայրենադարձության ապահովման նպատակով հետադարձ ուժ ունեցող՝ ՀՀ քրեական օրենսգրքի 327-րդ հոդվածում լրացվող նոր խրախուսող նորմն է»,- ասված է Ազգային ժողովի կայքում հրապարակված՝ նախագծի հիմնավորման մեջ։
Այսպիսով, հեղափոխական իշխանավորները փորձում են կանաչ լույս վառել բանակից խուսափողների համար։ Հատկանշական է, որ օրինագծի հեղինակները բանակում չեն ծառայել, ինչպես հայտնի է՝ Արման Բաբաջանյանի դեմ հայտնի դատական գործը հենց բանակից խուսափելու համար է հարուցվել։ Թերևս սեփական կյանքի սև էջը մաքրելու համար էլ որոշել է օրենքով լուծում տալ այդ հարցին։
Խնդիրն առաջին հերթին ունի բարոյական կողմ․ բանակից թռածն իրավունք չունի օրենք գրել բանակում ծառայելու մասին։
Բանակից թռած օրենսդիրները հազիվ թե իմանան, որ պատերազմական վիճակում գտնվող երկրում զորակոչի ֆունկցիան ոչ միայն տվյալ պահին բանակի համար զինվորներ ապահովելն է, այլ նաև պատրաստված պահեստազորի ռեզերվ ստեղծելը։
Նման օրենքը, եթե իհարկե այն ընդունվի, ոչ միայն հարցականի տակ կդնի մարտունակ ռեզերվ ունենալու հարցը, այլ նաև օրենքի ուժով կստեղծի հնարավորություն, որ փող ունեցողները բանակում չծառայեն։ Փոխարենը նրանք կփախնեն Հայաստանից, կսպասեն մինչև զորակոչի տարիքը լրանա, հետո կգան, կվճարեն այդ փողը և կապրեն հանգիստ կյանքով։
Ամեն դեպքում, հուսով ենք, որ Պաշտպանության նախարարությունը թույլ չի տա, որ այս անհեթեթությունը օրենք դառնա։ Իրականում սակայն խայտառակություն է, որ այս նախագծի հեղինակներից մեկը ԱԺ պաշտպանության հանձնաժողովի նախագահն է։
Հայկ Դավթյան
Հետևեք մեզ Viber-ում
