Չնայած ծանր ժամանակներին՝ Հայաստանը կարողացել է էներգիայի արտադրությունը մեծացնել 20 տոկոսով. Ռիչարդ Միլս
Այսօր Երևանում մեկնարկեց Հայաստանում վերականգնվող էներգիայի զարգացման հեռանկարներին նվիրված մեկօրյա համաժողով: ՀՀ-ում ԱՄՆ դեսպան Ռիչարդ Միլսը բացման խոսքում նշեց, որ շատ է կարևորում այս քննարկումը՝ կոչ անելով համաժողովին ներկա գործարարներին շատ ուշադիր հետևել քննարկումների ընթացքին և համագործակցել հայաստանյան մասնավոր սեկտորի ներկայացուցիչների հետ` վերլուծելով ՀՀ-ԱՄՆ միջև բոլոր հավանական առևտրային, ներառյալ էներգետիկ ոլորտում, համագործակցության հնարավորությունները: «Հայաստանը, չնայած նրան, որ շատ ծանր ժամանակներ է ունեցել, կարողացել է հաղթահարել դրանք ու, փաստացի, այսօր իր էներգիայի արտադրությունը աճել է 20%-ով: Եվ այդ է պատճառը, որ ԱՄՆ դեսպանատունը կարծում է, որ մեր ընկերությունների ներդրումային հնարավորությունները այս ոլորտում պետք է ուսումնասիրվի», - նշեց դեսպանը: Դեսպանն ընդգծեց այն փաստը, որ ՀՀ կառավարությունն արդեն սկսել է աշխատանքներ տանել՝ աջակցելով արևային էներգիայի ստացման և զարգացման ծրագրին: Բացի այդ Ռ. Միլսը նշեց, որ անհրաժեշտ է այս ոլորտում համատեղ իրականացնել մասնագետների և փորձի փոխանակման ծրագրեր:
Հետևեք մեզ Viber-ում
