Թաղապետի տեղակալն ընդդեմ նախարարի խորհրդականի. ո՞վ կհաղթի

Երևանի թիվ 17 հատուկ դպրոցի տնօրենի պաշտոնի շուրջ բարձրացած աղմուկը նոր ընթացք է ստանում: Այստեղ ՀՀ ԿԳ նախարար Լևոն Մկրտչյանի հրամանով տնօրեն է նշանակվել Վերգինե Եսայանը, որը նախարարի խորհրդական Բագրատ Եսայանի կինն է: Կոլեկտիվը, սակայն ընդդիմանում է՝ հայտարարելով, թե իրենք ունեն նախընտրած այլ թեկնածու, նույն կոլեկտիվի անդամ Հայարփի Մինասյանը և ուզում են, որ նա զբաղեցնի տնօրենի պաշտոնը: Վերջինս դպրոցի նախկին տնօրենի Ամալյա Հարությունյանի դուստրն է, միաժամանակ Նոր Նորք վարչական շրջանի ղեկավար Արմեն Ուլիխանյանի տեղակալի՝ Արմեն Ալավերդյանի քույրը: Նախկին տնօրենը, ով այս ուսումնական հաստատությունը ղեկավարել է ավելի քան 20 տարի, թոշակի գնալուց առաջ սեփական դստերը նախապատրաստել է որպես իրեն փոխարինող, վստահ լինելով, որ թաղապետի տեղակալ որդին տեխնիկական հարցերը կլուծի: Բայց վարչապետ Կարեն Կարապետյանի հանձնարականը, թե անթույլատրելի է դպրոցի տնօրենի պաշտոնը մորից աղջկան փոխանցել, ծրագիրը խափանեց: Ամեն դեպքում, փաստը մնում է փաստ, որ կրթության և գիտության նախարարը Երևանի թիվ 17 հատուկ դպրոցում որոշել է տնօրեն նշանակել իր խորհրդականի և դաշնակցական ընկերոջ տիկնոջը: Ինչ վերաբերում է Բագրատ Եսայանի կնոջը՝ Վերգինե Եսայանին, նա 9 տարի եղել է Երևանի բժշկամանկավարժական գնահատման կենտրոնի փոխտնօրենը և ըստ էության ոլորտի մասնագետ է: Երևանի թիվ 17 հատուկ դպրոցի կոլեկտիվի ընդդիմադիրները հայտարարել են, որ նրա մասնագիտական հմտությունները չեն վիճարկում, սակայն ուզում են, որ իրենց տնօրենը լինի նախկին տնօրենի դուստրը: Նշենք, որ դպրոցի տնօրենն ու կոլեկտիվի անդամները խոչընդոտել են նորանշանակ տնօրենին ներկայացնելու արարողությանը: Նրանք փակել են դուռը և թույլ չեն տվել, որ տնօրենն ու նրան ուղեկցող ԿԳՆ հանրակրթության վարչության պետը մտնեն դպրոց: ԿԳՆ այսօր նաև պաշտոնական հայտարարություն տարածեց, որ առաջիկայում թիվ 17 հատուկ դպրոցում նախարարությունը նախատեսում է աուդիտորական ստուգումներ իրականացնել: