Երևանի ավագանու ընտրությունները ցավոք դառնում են քաղաքական.Անուշ Սեդրակյան

«Երևանի ավագանու ընտրությունները ցավոք  դառնում են  քաղաքական: Այն երկրում, որտեղ գործառույթները բաժանված են, քաղաքի ընտրությունները մունիցիպալ ընտրություններ են, քաղաքական ընտրությունները՝ քաղաքական։ Մեզ մոտ ամեն բան այնքան է խառնված, որ տեղափոխվում է քաղաքական դաշտ»,-Հայելի ակումբում հրավիրված ասուլիսում նման տեսակետ հայտնեց քաղաքագետ Անուշ Սեդրակյանը: «Նոր ավագանին թեև կարող է նոր շունչ բերել, բայց, օրինակ՝ հին կանաչ տարածքների ոչնչացման պատասխանը ինչ-որ մեկն ինչ-որ ձևով պետք է տա:Հայաստանում ավագանու մակարդակով ամենահեշտն է սկսել ձևավորել պատասխանատվության ինստիտուտը, որովհետև Երևան քաղաքի կառուցապատումից, ավտոտնակներից, կանաչապատումից սկսած՝ այնպիսի անպատասխանատու որոշումներ են կայացվել, որ պետք է նախ պահանջել հնի պատասխանատվության կրումը, նոր լծվել նոր գործի »,-ասաց նա: «Ցավոք  այդպես էլ չենք կարողանում ազատ, արդար ընտրություններ անցկացնել։ Նույնիսկ իշխող կուսակցությունը, որն ունի հնարավորություններ, այնուամենայնիվ, ընտրակաշառքով է փորձում ընտրություններին մասնակցել»,-  ասաց ասուլիսի մյուս բանախոս, քաղաքագետ Թևան Պողոսյանը: «Ընդդիմությունը մոտ 250%-ով բարելավել է իր դիրքերն ավագանիում։Նախկինում ունեինք 7 հոգի, հիմա 19-ն են։ Ավագանին այս անգամ կլինի ավելի հետաքրքիր։ Հաջորդ անգամ չեն ասի, որ Երևանի ավագանու ընտրությունները քաղաքական չեն։ Դրա հետ միասին՝ վերահսկողության ինստիտուտ կձևավորվի ավագանու ներսում, որ որոշումները ոչ միայն լինեն այս կամ այն շենքի վրա ինչ-որ ցուցանակ տեղադրելու մասին, այլ միտված լինեն քաղաքի զարգացմանը:Փոստանջյանի տեսակն ավագանիում հետաքրքիր կլինի»,- պարզաբանեց նա։ «Ցանկացած մարդու սեփական որոշելիքն է։  Նիկոլ Փաշինյանի հրաժարմանը ես համաձայն եմ։ Մինչ այդ էլ ասել եմ, որ, եթե հաղթելու է, պետք է մնա, իսկ եթե պարտվելու է, գնա ԱԺ, որովհետև ԱԺ-ում ավելի հետաքրքիր կլինի, քան ավագանիում, և կարող է համագործակցությամբ աշխատել ամենատարբեր հարցերում»,- ասաց նա: