Ես ադմինիստրատիվ աշխատող եմ.նախարար Ալթունյան
«Արդյունավետ աշխատանքի խանգարող հանգամանքը ստվերն է: Ստվերի դեմ պայքարելու համար պետք է հայտարարենք իրական բուժման գինը ու կկազմենք իդեալական բյուջե»,-այս մասին լրագրողների հետ հանդիպմանը ասաց ՀՀ Առողջապահության նախարար Լեւոն Ալթունյանը: «Բժշկական հաշտարարի համակարգի ներդրման ծրագիրը ներդրված է մոտ 40 զարգացած երկրներում եւ կփորձենք այն կիրառել մեզանում։ Ես ուզում եմ ընկալենք, որ վարձատրությունը, որ վճարում են հիվանդները եւ պետբյուջեից բժիշկներին հատկացվող գումարները, պետք մոտիվացիա հանդիսանան բժշկի համար` լավագույնս վերաբերվի, լավ բուժի հիվանդին»,-ասաց նախարարը: Նա առանձնացրեց առողջապահության ոլորտի հիմնական խնդիրները` ոչ բավարար ֆինանսավորումը, ոչ բավարար որակի ապահովումը: «Ես քաղաքական գործիչ չեմ, այլ ադմինիստրատիվ աշխատող եմ ինձ համարում։ Այս ութ ամսվա ընթացքում մենք բավականին ծրագրեր ենք նախանշել, որոնց արդյունքը կստանանք մի քանի տարուց։ Եթե որոշվի, որ աշխատելու եմ նոր Կառավարությունում, ապա այդ ծրագրերը կիրականացնենք, եթե ոչ, ապա ապահովագրության ոլորտ հաստատ չեմ վերադառնա. ունեմ մի քանի այլ ծրագրեր, որոնք չեմ մանրամասնի»,-պատասխանելով հարցին,թե արդյոք կառավարության հրաժարականից հետո Ալթունյանը կմնա կաշխատի նոր կառավարությունում,ասաց նախարարը:
Հետևեք մեզ Viber-ում
