ՀՀԿ շտաբներն առավել անմատչելի են, քան պետական սահմանները

Ի՞նչ է նախընտրական շտաբը։ Դա հանրային տարածք է, որտեղ փակցված է հանրային միջոցառմանը մասնակցող, այս դեպքում ընտրական պրոցեսի դերակատար կառույցի պաստառը։ Եթե այդ տարածքն անգամ մասնավոր անձի է պատկանում և տրամադրված է կամ վարձակալական հիմունքներով, կամ էլ անհատույց, միևնույն է, ընտրական գործընթացի ժամանակ նախընտրական շտաբի տարածքը դադարում է լինել որևէ մեկի սեփականությունը, այլ դառնում է հանրային միջոցառումների՝ տեղեկատվական բնույթի նյութերի, թեկնածուների հետ հանդիպումների, բուկլետների բաժանման համար նախատեսված տարածք։ Նախընտրական շտաբը բաց է բոլոր այցելուների համար, այն չի կարող փակվել ցանկացած քաղաքացու առջև։ Հիմա փորձենք հասկանալ, թե ինչ է իրենից ներկայացնում ՀՀԿ նախընտրական շտաբը։ Դա ամեն թաղում հիմնված քրեական հեղինակությունների որջն է, որտեղ կատարվում է ՀՀ քաղաքացիների վախեցման, կաշառման, հնազանդեցման ու ստորացման գործընթաց։ Այդ տարածքները պահպանվում են ՀՀ ոստիկանության կողմից և հռչակվում որպես սեփականություն, ինչպես պահպանվում էին բուտիկները՝ Մաշտոցի պուրակում, ՀՀԿ հենասյուն հանդիսացող օլիգարխների օբյեկտները, քանի որ այդ շտաբներում է պարփակված իշխանությունն ուզուրպացրած խմբակի ողջ տրամաբանությունը: Վերցնել, տանել, թալանել, յուրացնել այն, ինչ պատկանում է հանրությանը, այն, ինչ պետք է հավասարապես բաշխվի քաղաքացիների, այլ ոչ կլանային մտածողություն ունեցող մի քանի անձերի միջև: Այն, ինչ կատարվեց երեկ՝ Երևանի ավագանու ընտրության օրը, Երևանի քաղաքապետի թեկնածու Զարուհի Փոստանջյանի հետ, ՀՀԿ Ավանի վարչական շրջանի շտաբում, ևս մեկ անգամ ապացուցում է, որ հանրայինն ուզուրպացված և խլված է։ Միևնույն ժամանակ հանրային կարգի պահպանման և հանրային միջոցներով սնուցվող ՀՀ ոստիկանությունն իրավապահ համակարգից վերածվել է թիկնապահ համակարգի։ Թիկնապահները հավատարմորեն պահպանում են հանրությունից զավթված և հանրության համար անմատչելի հռչակված տարածքները։ ՀՀԿ շտաբներն առավել անմատչելի են, քան պետական սահմանները։ Այդ տարածք իրավունք չունի մուտք գործել անգամ ՀՀ ԱԺ անձեռնմխելի պատգամավորը, որն, ի դեպ, կարող է իր մանդատով անարգել այցելել ՔԿՀ-ներ և զինվորական զորամասեր։ ՀՀԿ շտաբի ամեն սանտիմետրը պահպանվում է ՀՀ ոստիկանության կողմից, իսկ ԼՂՀ 800 հեկտար հողի մասին, օրինակ, ՀՀԿ նախագահ Սերժ Սարգսյանը հայտարարեց, որ ապրիլյան մարտերի օրերին կորցրած 800 հեկտար տարածքը չունի որևէ ռազմավարական և մարտավարական նշանակություն: Ապա ՀՀ ԱԺ ՀՀԿ խմբակցության ղեկավար Վահրամ Բաղդասարյանը հաստատեց, որ «…այդ հողը, որի մասին խոսում ենք, ռազմավարական նշանակություն չունեցող հող էր՝ չմշակվող եւ ամայի տարածքներ: Պետք չէ ծանրանալ այդ խնդրի վրա»: Հիմա պատկերացրեք, թե ոնց է մշակված ՀՀԿ շտաբի ամեն սանտիմետրը ու ինչ ռազմավարական ու մարտավարական նշանակություն ունի։ Միայն պատկերացրեք։ Զարուհի Հովհաննիսյան