Հրաժարականներ է պահանջում

Ուկրաինայի նախագահ Պյոտր Պորոշենկոն կոչ է արել երկրի վարչապետ Արսենի Յացենյուկին ու գլխավոր դատախազ Վիկտոր Շոկինին հրաժարական ներկայացնել «իշխանության նկատմամբ վստահության վերականգնման համար»: Այս մասին Twitter-ում գրել է Պորոշենկոյի մամլու քարտուղար Սվյատոսլավ Զեգոլկոն, տեղեկացնում է TASS-ը: «Իշխանության նկատմամբ վստահության վերականգնման համար նախագահը կոչ է արել գլխավոր դատախազին ու վարչապետին հրաժարական ներկայացնել»,- հավելել է նա: «Ակնհայտ է, որ թե´ հասարակությունը, թե´ իշխանությունը դժգոհ են երկրում փոփոխությունների տեմպերից: Ակնհայտ է, որ մեզ հարկավոր են դրական վերափոխումներ, հարկավոր է երկրորդ շնչառություն բացել բարեփոխումների անցկացման համար: Ակնհայտորեն, տարեսկզբից թուլացրել ենք արագությունը, իսկ ընդհանրապես՝ սկսել ենք արգելակել»,- ասվում է Պորոշենկոյի հայտարարության մեջ՝ ուղղված իր համաքաղաքացիներին, որը հրապարակվել է նրա կայքում: Պորոշենկոն նկատել է, որ «կառավարությունը կորցրել է կոալիցիայի աջակցությունը»: Բացի այդ, ըստ Ուկրաինայի նախագահի, «հասարակությունը ակնհայտորեն որոշել է, որ սխալները նախարարների կաբինետում, ավելի շատ են, քան ձեռքբերումները»: «Այսօր առավոտյան ես հանդիպել ու հանգամանալից խոսել եմ գլխավոր դատախազի հետ: Ես դիմել եմ Վիկտոր Նիկոլաևիչին առաջարկով, որ նա հրաժարականի դիմում ներկայացնի»,- ասել է Պորոշենկոն՝ ուկրաինացիներին ուղղված ուղերձում: Ուկրաինայի նախագահը հայտարարել է երկրի կառավարության կազմում «տոտալ» փոփոխությունների մասին: Նրա խոսքով՝ Ուկրաինայի կառավարության հանդեպ վստահության վերականգնման համար «թերապիան արդեն քիչ է, հարկավոր է վիրահատություն»: