Ալեն Սիմոնյանը «Հեղափոխության պահապաններին» առել է մի «տանիքի» տակ
Արդեն երկու տարի է՝ մենք բազում առիթներ ենք ունեցել գրելու, որ Նիկոլ Փաշինյանի թույլտվությամբ Հայաստանում գործում է ահաբեկչական խմբավորում՝ «Հեղափոխության պահապաններ» անվանումով, որոնք տասը տասնհինգ հոգով շրջապատում են Փաշինյանին քննադատած կամ վիրավորած մարդկանց ու ստիպում ներողություն խնդրել, կամ էլ սպառնում։ Փաշինյանը ձևավորել է խունվեյբինների բանդա, որն օգտագործում է ըստ կարիքի ու նպատակահարմարության։ Օրինակ ՀՅԴ-ական Հրանտ Մարգարյանին օրը ցերեկով թոռնիկի աչքի առաջ վիրավորելու եւ քաշքշելու առաքելությունն էլ սրանց էր տրված, Բակո Սահակյանին հեռահար գլուխ փշրելու հայտարարությունը նույնպես։
Այս խմբում են նաեւ այն տղաները, որոնք անցած տարի մի հրապարակման պատճառով ձվերով հարձակում էին գործել «Հայելի» մամուլի ակումբի վրա, թե բա «ո՞նց եք համարձակվում մեր վարչապետի դեմ բան գրեք», նրանք անհարգալից ու վիրավորական հայտարարություններ էին հնչեցրել ակումբի ղեկավարի եւ խմբագրության հասցեին ու այնքան լկտի ու ցինիկ գտնվեցին, որ ակումբի ղեկավար Անժելա Թովմասյանին խմբի անդամներից Հայկ Ստեփանյանը դատի է տվել վիրավորանքի եւ զրպարտանքի համար։
Չինաստանի հեղափոխությունից հետո էլ ճիշտ այսպիսի խմբեր էին ձեւավորվել, ովքեր բառի բուն իմաստով «սամասուդ» էին անում բոլոր նրանց, ովքեր կհանդգնեին հեղափոխականներին ասել՝ աչքիդ վերեւը հոնք կա։ Այդ խմբերը մոլեգնում էին ողջ երկրում, մինչեւ անգամ նրանց «զոհը» դարձավ հեղափոխությունից հետո իշխանության եկած Դեն Սյաոպինի որդին, ում դուրս էին նետել բարձրահարկ շենքի պատշգամբից, եւ երիտասարդ տղան անդամալույծ դարձավ։
Մենք այս մասին բազում հրապարակումներ ենք ունեցել, ընդհանրապես քննադատությունների պակաս չի եղել։ Սկզբում նրանց ֆինանսովորումը ստանձնել էր հայտնի գործարար Արթուր Ասատրայնը, որն ավելի հայտնի է Դոն Պիպո մականունով, հետո գործարարի եւ իշխանության ճամփաները հատվեցին ու ինչ-որ ժամանակ նրանց տիրություն էր անում հանրության կողմից առավելապես որպես Փաշինյանի «շիշ բռնող» հայտնի, պատգամավոր Հայկ Սարգսյանը։ Հենց նրա կուրացիայի ընթացքում է տեղի ունեցել Հայելու վրա հարձակումը։
Ինչ որ փուլ նրանց ֆինանսավորման հարցն իր վրա էր վերցրել նաեւ մոսկվայաբնակ գործարար Ռուբեն Ցոլակի Գրիգորյանը, ով ժամանակին ֆինանսավորում էր նաեւ Զարուհի Փոստանջյանի կուսակցությունը, բայց հիմա Պահապանները կարծես նոր տեր ունեն՝ ի դեմս ԱԺ փոխխոսնակ Ալեն Սիմոնյանի։ Երեկ Կիեւյան կամրջին մի քաղաքացու «փրկելու» էպոպեան նույնպես բացահայտեց այդ մասին։ Սկզբում Հեղափոխության պահապանների խմբի անդամ Հայկ Ստեփանյանը ֆեյսբուքի իր էջում հետեւյալ գրառումն արեց․«Ծանր աշխատանքային օրվա բարեհաջող ավարտը։
Երկու քաղաքացիները բանակցությունների արդյունքում կամրջից նետվելու մտադրությունից ետ կանգնեցին։
Հուսանք չի կրկնվի»։ Ավելի ուշ գրառմանն ավելացրեց «Alen Simonyan Բրավո՛ »։
Կարելի է ենթադրել, որ ԱԺ փոխնախագահը, ով նույնպես դեպքի վայրում էր, ցանկացել է, որ բարի գործը աննկատ չմնա ու որոշել է միայն իրեն վերցնել փառքի դափնին։ Նշենք, որ վերջերս էլ Ալեն Սիմոնյանի հետ խումբն Աշտարակի ձորում խնջույքի է մասնակցել եւ պարբերաբար նման հավաքներ են ունենում։
Անի Սահակյան
Հետևեք մեզ Viber-ում
