Ուտող ուրացողներ. Հայաստանում նոր խավ է ձեւավորվում

2018 թվականի իշխանափոխությունից հետո նախին պաշտոնյաների մի խավ բացահայտվեց, որոնք, ինչպես ասում են, պապից ավելի կաթոլիկ գտնվեցին եւ ավելի շատ են ողջունում ներկա իշխանություններին, նրանց գործը, քան կանեն իրենք՝ հեղափոխականները: Բրիտանացի գիտնականները հուսով ենք մոտ ապագայում կպարզեն, թե մարդկային ինչպիսի հոգեվիճակի, հոգեկերտվածքի հետ գործ ունենք, երբ մարդը տարիներով կարող է բարձր պաշտոն զբաղեցնել մի իշխանության ժամանակ, օգտվել այդ օրերի բարիքներից, որեւէ անգամ, որեւէ ձեւով առարկություն ու դժգոհություն չհայտնել իշխանական պարագլուխներից, հակառակը՝ դառնալ ժամանակի շունչը, մասնիկն այն համակարգի, որը եղել է, բայց համակարգը փոխվելուց հետո180 աստիճանով փոխվել եւ հրեշտակի թեւերով ներկայանալ հանրությանը:

Հայաստանում ոչ բռնի, թավշյա հեղափոխությունից հետո Հայաստանում այդպիսինները հավակնում են խավ ստեղծել: Նրանք ամեն օր զարմացնում են նոր իշխանություններին գովերգելու իրենց մտքի նորանոր ստեղծարար թռիչքներով, իրենց էնտուզիազմով ու եռանդով: Օրինակ այդպիսիններից է նախկի վարչապետ Արմեն Դարբինյանը: Մարդը երկրորդ նախագահի պաշտոնավարման տարիներին երկրի վարչապետ է աշխատել, երրորդ նախագահի օրոք ու մինչ օրս համալսարանի ռեկտոր է:

Հիմա այս մարդը քծնում ու քծնում է Փաշինյանի իշխանությանը, բանը հասավ նրան, որ ինքն էլ միացավ վարչապետին՝ դառնալով սեռափոխված Մելի պաշտպանը, ասում է, թե չի ընդունել նախկիններին: Բայց չեք գտնի գեթ մեկ հիշատակում, որտեղ Դարբինյանը քննադատած լինի հանրապետականներին ու Սերժ Սարգսյանին՝ նրա պաշտոնավարման շրջանում: Հակառակը, 2018 թվականի ապրիլին նա ֆեյսբուքի իր էջում շնորհավորեց Սերժ Սարգսյանին վարչապետ ընտրվելու կապակցությամբ: Սակայն, երբ Սարգսյանը համաժողովրդական ճնշման ներքո ստիպված եղավ հրաժարական տալ, Դարբինյանը շտապեց հեռացնել գրառումը:

Այս դասի մյուս պատվավոր ներկայացուցիչը Հովհանես Մանուկյանն է, ով արդարադատության նախարար, Վրաստանում Հայաստանի դեսպան է աշխատել, այլ պաշտոններ էլ է զբաղեցրել, որոնք հնարավորություն են տվել օգտվել համակարգի բարիքներից: Մարդ, որն աչքի է ընկել բավականին աղմկոտ պատմություններով, նաեւ կոռուպցիոն գործարքներում է իր անունը շոշափվել, իսկ այսօր շշմեցնում է հեղափոխական հայացքներով:

Գլխավոր դատախազի նախկին տեղակալ Արմեն Դանիելյանը այս դասի ամենածայրահեղական ներկայացուցիչն է, ով քիչ է ասել, թե քծնում է իշխանություններին: Մարդը, որը նախկին համակարգում անգամ պատգամավոր է աշխատել, այսօր քննադատում է նախկինը եւ փառաբանում նորը:

Կամ ՀՔԾ նախկին պետ Անդրանիկ Միրզոյանը, ՊՆ հետախուզության վարչության պետ Արշակ Կարապետյանը, ում ցուցմունքը միակն է Ռոբերտ Քոչարյանի դեմ Մարտի 1-ի գործով:

Նրանք տեսակ են, ովքեր իրենց ժամանակներում երբեւէ աչքի չեն ընկել քննադատական խոսքով, մտքով, երբեւէ դժգոհություն չեն հայտնել նախկիններից, հեղափոխությունից հետո հանկարծ ասպարեզ են նետվել ու բացահայտել՝ ինքչան վատն էին նախկինները, ովքեր իրենց պաշտոն էին տվել, իրենք էլ տազ արած կյանքը վայելում էին:

Անի Սահակյան